កម្ពុជា
លោក ហ៊ុន សែន និងភរិយា បានចាក់វ៉ាក់សាំង Astra Zeneca រួចហើយនៅព្រឹកថ្ងៃទី ៤ ខែមីនា
លោកនាយករដ្ឋមន្រ្តី ហ៊ុន សែន និងភរិយា នៅព្រឹកថ្ងៃទី៤ ខែមីនា បានទៅទទូលការចាក់វ៉ាក់ សាំងបង្ការជំងឺកូវីដ-១៩ ឈ្មោះ Astra Zeneca នៅមន្ទីរពេទ្យ កាល់ម៉ែត្រ រួចហើយ ក្រោយពី វ៉ាក់សាំងនេះត្រូវបានបញ្ជូនមកដល់ប្រទេសកម្ពុជា កាលពីថ្ងៃល្ងាចថ្ងៃទី២ ខែមីនា ដែលជា ជំនួយរបស់អង្គការសហប្រជាជាតិតាមរយៈយន្តការ COVAX ។
ប្រទេសកម្ពុជាគឺជាប្រទេសដំបូងគេនៅក្នុងតំបន់ដែលទទួលបានវ៉ាក់សាំង Astra Zeneca តាមយន្តការ COVAX ដែលយន្តការនេះទើបបានផ្តល់វ៉ាក់សាំងដល់ប្រទេសចំនួន ៣ ប៉ុណ្ណោះ ក្នុងចំណោមប្រទេសទាំង ១៤៣ ដែលស្ថិតនៅក្នុងបញ្ជីនៃយន្តការអន្តរជាតិនេះ ។ ប្រទេសពីរ ផ្សេងទៀតដែលទទូលបានវ៉ាក់សាំងតាមយន្តការនេះមុនកម្ពុជា គឺប្រទេសហ្កាណា (Ghana) និងកូឌីវ័រ (Ivory Coast) នៅក្នុងទ្វីបអាហ្រិក ។
រដ្ឋាភិបាលកម្ពុជាអះអាងថា តាមគម្រោងរបស់កូវ៉ាក់ កម្ពុជានឹងទទួលបានវ៉ាក់សាំង ២០% នៃប្រជាជនចំនួន ១៦ លាននាក់ ដែលស្មើនឹង ៣ លាន ២ សែន នាក់ ឬស្មើនឹងវ៉ាក់សាំងចំនួន ៦ លាន ៤ សែន ដូស ។ វ៉ាក់សាំងឈ្មោះ Astra Zeneca ដែលផលិតនៅប្រទេសឥណ្ឌាចំនួន ៣២៤.០០០ ដូស ដែលកម្ពុជាទើបទទួលបាន គឺស្ថិតក្នុងចំណោមវ៉ាក់សាំង ១.១០៤.០០០ ដូស ដែលកម្ពុជាត្រូវទទួលបានក្នុងឆមាសទី ១ ឆ្នាំ ២០២១ ដែលជាជំនួយបឋមផ្តល់ដោយមជ្ឈមណ្ឌលកូវ៉ាក់ (COVAX Facility) ។
គួរបញ្ជាក់ដែរថា ប្រទេសចិនបានផ្តល់ជំនួយវ៉ាក់សាំងបង្ការជំងឺកូវីដ-១៩ ឈ្មោះ Sinopharm ចំនួន ៦០ ម៉ឺនដូសដល់ប្រទេសកម្ពុជា ។ ប៉ុន្តែវ៉ាក់សាំង Sinopharm ដែលកម្ពុជាទទួលបានពីចិន ត្រូវបានភាគីចិន និងក្រសួងសុខាភិបាលកម្ពុជាប្រកាសថា សម្រាប់ចាក់តែទៅលើ មនុស្សដែលមានអាយុចាប់ពី ១៨ ដល់ ៥៩ ឆ្នាំប៉ុណ្ណោះ ។ លោកនាយករដ្ឋមន្រ្តី ហ៊ុន សែន បានប្រកាសថា លោកមិនអាចទៅទទួលវ៉ាក់សាំង Sinopharm បានទេ ដោយសារលោកមាន អាយុលើសពី ៥៩ ឆ្នាំ ។
រដ្ឋមន្រ្តីក្រសួងការពារជាតិកម្ពុជា លោក ទៀ បាញ់ បានអះអាងកាលពីថ្ងៃទី២ ខែមីនា ថា វ៉ាក់សាំង Sinopharm របស់ចិនចំនួន ៤០ ម៉ឺនដូសបន្ថែមទៀតដែលទីក្រុងប៉េកាំងសន្យាផ្តល់ ដល់កម្ពុជា នឹងមកដល់កម្ពុជានៅមុនពេលចូលឆ្នាំខ្មែរ ៕
