តំបន់&អន្តរជាតិ
របបយោធាមីយ៉ាន់ម៉ាព្រមានបាញ់បាតុករចំក្បាល
របបសឹកយោធាមីយ៉ាន់មានបានព្រមានបាតុករថាអាចមានគ្រោះថ្នាក់ដោយសារការបាញ់ចំ ក្បាល ។ នេះបើតាមការចេញផ្សាយដោយទូរទស្សន៍រដ្ឋមីយ៉ាន់ម៉ា និងត្រូវបានផ្សាយបន្ត ដោយសារព័ត៌មាន Reuters នៅយប់ថ្ងៃទី២៦ ខែមីនា ។
ការប្រកាសគំរាមរបស់របបយោធា ស្របពេល ដែលសកម្មជនប្រឆាំងរដ្ឋប្រហារមីយ៉ាន់ម៉ាអំពាវ នាវឱ្យមានការបង្ហាញក្នុងទ្រង់ទ្រាយធំប្រឆាំងទៅនឹងទិវាកងកម្លាំងប្រដាប់អាវុធរបស់ប្រទេស មីយ៉ាន់ម៉ា ដែលធ្វើឡើងនៅថ្ងៃសៅរ៍ ទី២៧ ខែមីនា ។
ព័ត៌មានផ្សព្វផ្សាយ នៅលើបណ្តាញសារព័ត៌មាន MRTV របស់មីយ៉ាន់ម៉ា ដែលនិយាយ សំដៅផ្ទាល់ដល់អ្នកតវ៉ាបញ្ជាក់ថា «អ្នកឯងគួររៀនសូត្រ…ថាអ្នកអាចឋិតនៅក្នុងគ្រោះថា្នក់ ដោយសារការបាញ់ចំក្បាល ឬខ្នង» ។
បើតាមសមាគមផ្តល់ជំនួយសម្រាប់អ្នកទោសនយោបាយមីយ៉ាន់ម៉ា (AAPP) មានមនុស្សប្រ មាណ ៣២០ នាក់ហើយបានស្លាប់ដោយសារការបង្រ្កាបរបស់របបសឹកយោធា ចាប់តាំពីមាន រដ្ឋប្រហារទម្លាក់រដ្ឋាភិបាលដឹកនាំដោយគណបក្សសម្ព័ន្ធដើម្បីលទ្ធិប្រជាធិបតេយ្យនៅថ្ងៃទី១ ខែកុម្ភៈ មក ។
សមាគមនេះអះអាងថា ក្នុងចំណោមអ្នកស្លាប់ទាំងអស់នេះ ២៥ ភាគរយនៃពួកគេបានស្លាប់ ដោយសារការបាញ់នៅត្រង់ក្បាល ដែលធ្វើឱ្យមានការសង្ស័យថា ពួកគេត្រូវបានរបបយោធា កំណត់គោលដៅសម្លាប់ដោយចេតនា ៕
