តំបន់&អន្តរជាតិ
ស្ថានទូតអាមេរិក សហភាពអឺរ៉ុប ចក្រភពអង់គ្លេស ថ្កោលទោសរបបយោធាដែលបាញ់សម្លាប់មនុស្សប្រមាណ ៩០ នាក់នៅថ្ងៃទី២៧ ខែមីនា
ស្ថានទូតសហរដ្ឋអាមេរិកប្រចាំ នៅប្រទេសមីយ៉ាន់ម៉ា បានថ្កោលទោសរបបយោធា ចំពោះការ បាញ់សម្លាប់ជនស៊ីវិលនៅថ្ងៃសៅរ៍ ទី២៧ ខែមីនា ចំថ្ងៃដែលរបបយោធាប្រារព្ធទិវាកងទ័ព ។ នេះបើតាមផ្សាយរបស់សារព័ត៌មាន CNA ។
ស្ថានទូតអាមេរិកបានលើកឡើងនៅក្នុងសេចក្តីថ្លែងការណ៍របស់ខ្លួនដែលបង្ហោះនៅលើ បណ្តាញសង្គមហ្វេសប៊ុកថា កងកម្លាំងប្រដាប់អាវុធមីយ៉ាន់ម៉ាកំពុងតែបាញ់សម្លាប់ជនស៊ីវិល ក្នុងនោះមានទាំងកុមារផងដែរ បើទោះជារបបយោធាបានស្បថថាពួកគេមិនបាញ់សម្លាប់ កុមារនោះឡើយ ។
ស្ថានទូតអាមេរិកបញ្ជាក់ថា សកម្មភាពរបស់សមត្ថកិច្ចមីយ៉ាន់ម៉ាមិនមែនជាសកម្មភាពរបស់ កងទ័ព ឬកងកម្លាំងប៉ូលីសដែលមានវិជ្ចាជីវៈនោះទេ ។
បើតាមសេចក្តីរាយការណ៍នានា និងសាក្សី មានមនុស្សយ៉ាងហោចណាស់ក៏ ៩០ នាក់ដែរត្រូវ បានសមត្ថកិច្ចបាញ់សម្លាប់ដែលជាចំនួនខ្ពស់បំផុតមិនធ្លាប់មានតាំងពីមានរដ្ឋប្រហារនៅថ្ងៃទី ១ ខែកុម្ភៈ មក ។
ក្រៅពីស្ថានទូតអាមេរិក ស្ថានទូតសហភាពអឺរ៉ុប និងស្ថានទូតចក្រភពអង់គ្លេសប្រចាំនៅ មីយ៉ាន់ម៉ា ក៏បានថ្កោលទោសការបាញ់សម្លាប់ជនស៊ីវិលដែលគ្មានអាវុធក្នុងដៃ ។
ស្ថានទូតសហភាពអឺរ៉ុបប្រចាំមីយ៉ាន់ម៉ាបានធ្វើការកត់សម្គាល់នៅលើបណ្តាញសង្គមរបស់ខ្លួន ដោយចាត់ទុកទិវាកងទ័ពមីយ៉ាន់ម៉ាលើកទី ៧៦ គឺជាថ្ងៃនៃភេរវកម្ម និងភាពអាម៉ាស់ និងថា ការសម្លាប់ជនស៊ីវិលគ្មានអាវុធ រួមទាំងកុមារផងនោះ គឺជាសកម្មភាពដែលមិនអាចប្រកែក បាន ។
ចំណែកចក្រភពអង់គ្លេសដែលជាអតីតប្រទេសអាណានិគមរបស់មីយ៉ាន់ម៉ា ឬភូមា បាននិយាយថាកងកម្លាំងសន្តិសុខរបស់មីយ៉ាន់ម៉ាបានធ្វើឱ្យអាម៉ាស់មុខដោយការបាញ់ សម្លាប់ជនស៊ីវិលដែលគ្មានអាវុធ ។
