កម្ពុជា
សមាគមការពារអ្នកកាសែត ទាមទារតុលាការទម្លាក់បទចោទ លើអតីតអ្នកកាសែត The Cambodia Daily
មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) សមាគមសម្ព័ន្ធអ្នកសារព័ត៌មាន កម្ពុជា (CamboJA) និងក្លឹបអ្នកសារព័ត៌មានបរទេស នៃកម្ពុជា (OPCC) នៅថ្ងៃទី២៥ ខែកុម្ភៈ បានរួមគ្នាទាមទារឱ្យតុលាការកម្ពុជាទម្លាក់ចោលរាល់បទចោទប្រកាន់ទៅលើអតីតអ្នកកាសែត The Cambodia Daily ចំនួន ២ រូប គឺលោក អូន ភាព និងលោក Zsombor Peter ។
សមាគមទាំង ៣ បានលើកឡើងនៅក្នុងសេចក្តីថ្លែងការណ៍ អំពាវនាវឱ្យតុលាការពន្លឿនដំ ណើរការករណីអ្នកទាំងពីរ និងអំពាវនាវដល់ព្រះរាជអាជ្ញា ឱ្យបង្ហាញភស្តុតាងដែលអាច បញ្ជាក់ថា អ្នកកាសែតទាំងពីរមានពិរុទ្ធក្នុងបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» ឬបើមិនដូច្នោះទេ សូមទម្លាក់ចោលពាក្យប្តឹងឧទ្ធរណ៍ដែលស្នើឱ្យបន្តរឿងក្តីនេះ ។
សមាគមទាំង ៣ អះអាងថា កាលពីខែវិច្ឆិកា ឆ្នាំ ២០២០ សាលាដំបូងខេត្តរតនគិរី បានទម្លាក់ ចោលការចោទប្រកាន់មកលើអ្នកកាសែតទាំង ២ រួចហើយ ខណៈដែលដើមបណ្តឹងក៏បានដក ពាក្យបណ្តឹងវិញដែរ ។ សមាគមទាំង ៣ ចោទសួរថា ហេតុអ្វីបានជាព្រះរាជអាជ្ញាប្តឹងឧទ្ធរណ៍ ចំពោះសេចក្តីសម្រេចរបស់សាលាដំបូងខេត្តរតនគិរីទៀត ?
ពួកគេអះអាងថា អ្នកកាសែតទាំងពីរបានរងការធ្វើទុក្ខបុកម្នេញចំពោះការងារចុះរាយការណ៍ ព័ត៌មាននៅឆ្នាំ ២០១៧ ដើម្បីសម្ភាសពលរដ្ឋអំពីការបោះឆ្នោតក្រុមប្រឹក្សាឃុំ សង្កាត់ នៅឆ្នាំ នោះ ។ ការបន្តចំណាត់ការតាមផ្លូវតុលាការលើពួកគេ គឺជាការវាយប្រហារទៅលើវិជ្ជាជីវៈ របស់អ្នកសារព័ត៌មាន ក៏ដូចជាសេរីភាពសារព័ត៌មាននៅកម្ពុជា ក្រោមការអះអាងថា ជាការ អនុវត្តច្បាប់ ។
សមាគមទាំង ៣ ប្តេជ្ញាថានឹងនៅជាមួយអ្នកកាសែតទាំង ២ ដោយសាមគ្គីភាព និងនៅតែបន្ត ទាមទារឱ្យទម្លាក់ចោលបណ្តឹងប្រឆាំងអ្នកទាំង ២ ។
ឆ្លើយតបចំពោះការអំពាវនាវនេះ អ្នកនាំពាក្យក្រសួងយុត្តិធម៌ លោក គឹម សន្តិភាព បានសរ សេរនៅលើហ្វេសប៊ុករបស់លោកថា ការទាមទារឱ្យព្រះរាជអាជ្ញាបង្ហាញភស្តុតាង ឬតុលាការ ទម្លាក់ចោលបទចោទប្រកាន់របស់សមាគមសម្ព័ន្ធអ្នកសារព័ត៌មានកម្ពុជា (CamboJA) គឺជា ទម្រង់មួយនៃការប៉ុនប៉ងជ្រៀតជ្រែកចូលក្នុងកិច្ចការរបស់តុលាការ ដែលជាស្ថាប័នឯករាជ្យ របស់កម្ពុជា ។
លោកថា ជនត្រូវចោទ ឬជនជាប់ចោទ មានសិទ្ធិដឹងអំពីបទចោទប្រកាន់មកលើខ្លួន មានសិទ្ធិ ពឹងពាក់មេធាវីការពារខ្លួន ហើយមេធាវីមានសិទ្ធិដឹងអំពីសំណុំរឿង និងកិច្ចដំណើរការសំណុំ រឿង ។
អ្នកនាំពាក្យក្រសួងយុត្តិធម៌រូបនេះ ក៏បានចោទសួរទៅកាន់ CamboJA វិញហាក់ក្នុងន័យឌឺដង ឱ្យ CamboJA បង្ហាញទៅមើលថានៅស្រុកណាដែលព្រះរាជអាជ្ញា ត្រូវយកភស្តុតាងនៃសំណុំ រឿងមកបង្ហាញ មុននឹងដំណើរការចោទប្រកាន់ ?
ទោះជាយ៉ាងណា សមាគមទាំង ៣ នៅតែចាត់ទុកការអូសបន្លាយសំណុំរឿងលើអ្នកកាសែត ទាំង ២ គឺជាគោលដៅនៃយុទ្ធនាការនៃការយាយី និងការបំភិតបំភ័យតាមផ្លូវតុលាការដែល មិនមានការបង្ហាញភស្តុតាងផ្លូវច្បាប់ត្រឹមត្រូវ ៕
