កម្ពុជា
ក្រសួងសុខាភិបាលប្រកាសផ្អាកការចាក់វ៉ាក់សាំង Sinopharm សម្រាប់អ្នកចាក់លើកទី ១
ក្រសួងសុខាភិបាលកម្ពុជាប្រកាសនៅថ្ងៃទី១១ ខែមីនា នេះថា ក្រសួងនឹងផ្អាកការចាក់ វ៉ាក់សាំងបង្ការជំងឺកូវីដ-១៩ Sinopharm ដែលជាជំនួយរបស់ចិនសម្រាប់អ្នកចាក់លើកទី១ (ដូសទី១) ជាបណ្តោះអាសន្នចាប់ពីថ្ងៃនេះ ។
ក្រសួងសុខាភិបាលបញ្ជាក់ថា ការផ្អាកនេះ ដោយសារបច្ចុប្បន្ននេះវ៉ាក់សាំង Sinopharm ដែលជាជំនួយរបស់ចិនមានចំនួនកំណត់ ហើយក្រសួងមានភាពចាំបាច់ដែល ត្រូវរក្សាទុកវ៉ាក់សាំងមួយចំនួនសម្រាប់ការចាក់លើកទី២ (ដូសទី២) ជូនដល់ក្រុមមនុស្សមួយ ចំនួនដែលបានចាក់ដូសទី១ រួចហើយ ។ ប៉ុន្តែនៅតែបន្តដំណើរការចាក់វ៉ាកសាំងនេះជាធម្មតា សម្រាប់អ្នកដែលត្រូវចាក់លើកទី២ ។
ក្រសួងប្រកាសថា នឹងបន្តជម្រាបជូនដំណឹងឡើងវិញនូវការចាក់វ៉ាក់សាំង Sinopharm សម្រាប់ លើកទី១ (ដូសទី១) នៅពេលដែលមានវ៉ាក់សាំងមកដល់ជាបន្តបន្ទាប់នៅពេលខាងមុខ ។
រដ្ឋមន្រ្តីក្រសួងការពារជាតិកម្ពុជាលោក ទៀ បាញ់ ធ្លាប់បានបញ្ជាក់ថា វ៉ាក់សាំងចំនួន ៤០ ម៉ឺន ដូសទៀតដែលរដ្ឋាភិបាលចិនបានសន្យាផ្តល់ដល់កម្ពុជានឹងមកដល់នៅមុនពេលចូលឆ្នាំខ្មែរ ខាងមុខ បន្ថែមទៅលើវ៉ាក់សំាង ៦០ ម៉ឺនដូសដែលកម្ពុជាបានទទួលពីចិនរួចហើយកាលពី ដើមខែកុម្ភៈ ។
ក្រសួងសុខាភិបាលបញ្ជាក់ដែរថា ការចាក់វ៉ាក់សាំងកូវីសែល (Covisheld) ដែលទទួល អាជ្ញាបណ្ណផលិតដោយក្រុមហ៊ុន AstraZeneca សម្រាប់ក្រុមមនុស្សអាយុចាប់ពី ៦០ ឆ្នាំឡើង នៅបន្តចាក់ជាធម្មតា ៕
