តំបន់&អន្តរជាតិ
សម្តេចសង្ឃកាតូលិក ប៉ាប ហ្វ្រង់ស៊ីស អំពាវនាវឱ្យរុស្សីនិងអ៊ុយក្រែនផ្សះផ្សាគ្នាខណៈរុស្សីកំពុងបង្ហាញសាច់ដុំយោធាដាក់អ៊ុយក្រែន
ក្នុងពេលដែលភាពតានតឹងផ្នែកយោធារវាងរុស្សី និងប្រទេសអ៊ុយក្រែនកាន់តែកើនឡើងខ្លាំង សម្តេចសង្ឃកាតូលិក ប៉ាប ហ្វ្រង់ស៊ីស បានអំពាវនាវឱ្យប្រទេសជិតខាងទាំងពីរនេះស្វែងរក ការផ្សះផ្សាគ្នាដើម្បីបញ្ចៀសនូវជម្លោះរវាងប្រទេសទាំងពីរ ។
ក្នុងរយៈពេលចុងក្រោយនេះ ប្រទេសរុស្សីបានបង្កើនចំនួនកងទ័ពជាច្រើនទៅកាន់តំបន់ក្បែរ ព្រំដែនជាមួយប្រទេសអ៊ុយក្រែន ដែលមិនធ្លាប់មានចាប់តាំងពីប្រទេសមហាអំណាចមួយនេះ បានក្តោបក្តាប់យកតំបន់គ្រីមា (Crimea) ពីអ៊ុយក្រែននៅឆ្នាំ ២០១៤ មក ។
ការបង្កើនចំនួនកងទ័ពនេះកំពុងធ្វើឱ្យប្រទេសអ៊ុយក្រែនមានការព្រួយបារម្ភអំពីការឈ្លានពាន របស់រុស្សីមកលើប្រទេសរបស់ខ្លូន ។ ដូច្នេះហើយបានជាប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡិនស្គី (Volodymyr Zelensky) បានធ្វើនយោបាយការទូតយ៉ាងមមាញឹកក្នុង រយៈពេលចុងក្រោយនេះដើម្បីស្នើឱ្យប្រទេសមហាអំណាចលោកខាងលិចជួយដល់ប្រទេស របស់ខ្លួនក្នុងពេលដែលអ៊ុយក្រែនកំពុងស្ថិតនៅក្រោមការគំរាមកំហែងផ្នែកយោធារបស់រុស្សី ។ អ៊ុយក្រែនក៏ចង់អោយអង្គការបក្សសម្ព័ន្ធយោធាណាតូ (NATO) ទទួលយកខ្លួនចូលជា សមាជិកនៃបក្សសម្ព័ន្ធយោធានេះកាន់តែឆាប់ផងដែរ ។
ឆ្លើយតបចំពោះរឿងនេះ ប្រទេសរុស្សី តែងអះអាងថា ការចល័តកងទ័ពនៅក្នុងទឹកដីរបស់ខ្លួន មិនមានជាការគំរាមកំហែងដល់ប្រទេសណាមួយនោះទេ ។ ទោះជាយ៉ាងណា គេដឹងថា ប្រទេសរុស្សីបានជួយក្រុមផ្តាច់ទឹកដីនិយមនៅភាគខាងកើតប្រទេសអ៊ុយក្រែនចាប់តាំងពីឆ្នាំ ២០១៤ មក ។
មហាអំណាចលោកខាងលិច ដែលរួមមាន សហរដ្ឋអាមេរិក បារាំង អាល្លឺម៉ង់ និងអង់គ្លេស សុទ្ធតែបានសម្តែងការគាំទ្រចំពោះការគោរពអធិបតេយ្យភាព និងបូរណភាពទឹកដីរបស់ ប្រទេសអ៊ុយក្រែន ។ ប្រធានាធិបតីបារាំង លោក អីម៉ានូអែល ម៉ាក្រុង (Emmanuel Macron) ថែមទាំងបានលើកឡើងពីការកំណត់បន្ទាន់ក្រហមសម្រាប់ប្រទេសរុស្សី ខណៈដែលប្រ ទេសអង់គ្លេសត្រូវបានគេរាយការណ៍ថាកំពុងបញ្ជូននាវាចំបាំងរបស់ខ្លួនទៅកាន់សមុទ្រខ្មៅ ដែលជាសមុទ្រជាប់ប្រទេសអ៊ុយក្រែន និងរុស្សី ។
អាជ្ញាធរអ៊ុយក្រែននិយាយថាកិច្ចព្រមព្រៀងនៃបទឈប់បាញ់រវាងអ៊ុយក្រែននិងក្រុមបំបែក ទឹកដីត្រូវបានរំលោភបំពានជាញឹកញាប់ ហើយថាចាប់តាំងពីដើមឆ្នាំ ២០២១ នេះមក មានកង ទ័ពអ៊ុយក្រែនចំនួន ៣០ នាក់ហើយបានបាត់បង់ជីវិត ។
អ៊ុយក្រែនបានចោទរុស្សីថាបានចល័តកងទ័ពចំនួន ៤១,០០០ នាក់ទៅក្បែរព្រំដែនប៉ែកខាង កើតប្រទេសខ្លួន និងកងទ័ពចំនួន ៤២,០០០ នាក់ទៀតទៅកាន់តំបន់គ្រីមាដែលរុស្សីមាន មូលដ្ឋានទ័ពជើងទឹកនៅទីនោះ ។
នៅចំពោះមុខភាពតានតឹងគួរឱ្យបារម្ភនេះ ប្រមុខសាសនាកាតូលិក សម្តេច ប៉ាប ហ្រ្វង់ស៊ីស មានបន្ទូលអំពាវនាវឱ្យរុស្សី និងអ៊ុយក្រែនបញ្ចៀសនូវភាពតានតឹង និងធ្វើការផ្សះផ្សាគ្នាឡើង វិញ ។
សម្តេច ប៉ាប ហ្រ្វង់ស៊ីស បានលើកឡើង និងត្រូវបានសារព័ត៌មាន AP ស្រង់បន្ទូល យ៉ាងដូច្នេះថា «សូមយកចិត្តទុកដាក់ចំពោះស្ថានភាពមនុស្សធម៌ដ៏ធ្ងន់ធ្ងរដែលប្រជាជន កំពុងប្រឈមមុខ ហើយដែលខ្ញុំសូមបង្ហាញនូវភាពស្និទ្ធស្នាលចំពោះពួកគេ» ៕
