តំបន់&អន្តរជាតិ
ទណ្ឌកម្មអន្តរជាតិ បន្តធ្លាក់មកលើរបបយោធាមីយ៉ាន់ម៉ា
របបយោធាមីយ៉ាន់ម៉ា កំពុងទទួលរងជាបន្តបន្ទាប់នូវទណ្ឌកម្ម ដាក់ដោយសហគមន៍អន្តរជាតិ ចំពោះទង្វើរដ្ឋប្រហារយោធា ដែលពួកគេបានប្រព្រឹត្តចាប់តាំងពីថ្ងៃទី ១ ខែកុម្ភៈ មក ។
សហរដ្ឋអាមេរិកនៅថ្ងៃទី ២៣ ខែកុម្ភៈ នេះ បានដាក់ទណ្ឌកម្មទៅលើឧត្តមសេនីយ៍យោធា មីយ៉ាន់ម៉ាចំនួន ២ រូបទៀត គឺលោក មួង មួង យ៉ (Maung Maung Kyaw) ដែលជាមេបញ្ជាការ ទ័ពអាកាស និងលោក ម៉ូ យីន ទុន (Moe Myint Tun) ។
សេចក្តីរាយការណ៍របស់សារព័ត៌មាន CNA ឱ្យដឹងថា រដ្ឋាភិបាលអាមេរិកនឹងបង្កកទ្រព្យ សម្បត្តិ ព្រមទាំងផ្អាកមិនឱ្យធ្វើដំណើរចូលទឹកដីអាមេរិករបស់មន្រ្តីជាន់ខ្ពស់យោធាទាំងពីរ នាក់នេះ ។
ក្រសួងរតនាគារអាមេរិកបានលើកឡើងនៅក្នុងសេចក្តីថ្លែងការណ៍របស់ខ្លួនថា របបយោធា ត្រូវតែបញ្ចប់សកម្មភាពរបស់ខ្លួន និងស្តារលទ្ធិប្រជាធិបតេយ្យនៅក្នុងប្រទេសឡើងវិញ បើមិនដូច្នោះទេ ស្ថាប័នមួយនេះនឹងមិនអល់អែកដើម្បីចាត់វិធានការបន្ថែមទៀតនោះទេ ។
បន្ថែមពីលើនេះ រដ្ឋមន្រ្តីក្រសួងការបរទេសអាមេរិក លោក អាន់តូនី ប្លីងខេន (Antony Blinken) ថ្លែងថា សហរដ្ឋអាមេរិកនឹងមិនស្ទាក់ស្ទើរចាត់វិធានការបន្ថែមប្រឆាំងនឹងអ្នកដែលប្រព្រឹត្តអំពើ ហិង្សា និងគាបសង្កត់ដល់ឆន្ទៈរបស់ប្រជាពលរដ្ឋឡើយ ។
លោក ប្លីងខេន បញ្ជាក់នៅក្នុងសេចក្តីថ្លែងការណ៍ថា «យើងអំពាវនាវឱ្យយោធា និងប៉ូលីស បញ្ឈប់រាល់ការវាយប្រហារទៅលើក្រុមអ្នកតវ៉ាដោយសន្តិវិធី សូមដោះលែងអ្នកដែលត្រូវបាន ឃុំឃាំងដោយអយុត្តិធម៌ បញ្ឈប់ការវាយប្រហារ និងការបំភិតបំភ័យអ្នកសារព័ត៌មាន និងសកម្មជន និងស្តាររដ្ឋាភិបាលដែលបានជ្រើសរើសតាមបែបប្រជាធិបតេយ្យឡើងវិញ» ។
សហរដ្ឋអាមេរិកក៏បានដាក់ទណ្ឌកម្មរួចហើយទៅលើឥស្សរជនកំពូលៗផ្សេងទៀតនៃរបប យោធាមីយ៉ាន់ម៉ា រួមមាន ឧត្ដមសេនីយ៍ មីន អុង លាំង (Min Aung Hlaing) ដែលជាមេ បញ្ជាការយោធា និងជាអ្នកគ្រប់គ្រងប្រទេសមីយ៉ាន់ម៉ាក្រោយរដ្ឋប្រហារ ។
ការប្រកាសដាក់ទណ្ឌកម្មរបស់សហរដ្ឋអាមេរិកនេះ ធ្វើឡើងប៉ុន្មានម៉ោងប៉ុណ្ណោះបន្ទាប់ពី សហភាពអឺរ៉ុប ក៏បានអនុម័តទណ្ឌកម្មដែលជាការបង្កើនសម្ពាធអន្តរជាតិមកលើរបបយោធា មីយ៉ាន់ម៉ា ។
ប្រធានផ្នែកគោលនយោបាយការបរទេសរបស់សហភាពអឺរ៉ុប លោក Josep Borrell បានថ្លែង ថា សហភាពអឺរ៉ុបបានទទួលយកកិច្ចព្រមព្រៀងនយោបាយដើម្បីអនុវត្តទណ្ឌកម្មដែលផ្តោត លើរបបយោធាដែលទទួលខុសត្រូវចំពោះការធ្វើរដ្ឋប្រហារ និងផលប្រយោជន៍សេដ្ឋកិច្ចរបស់ ពួកយោធា ។
លោកសង្កត់ធ្ងន់ថា ៖ «រាល់ការគាំទ្រហិរញ្ញវត្ថុដោយផ្ទាល់ពីប្រព័ន្ធអភិវឌ្ឍន៍របស់យើងដល់ កម្មវិធីកំណែទម្រង់របស់រដ្ឋាភិបាលមីយ៉ាន់ម៉ាត្រូវបានរារាំង» ។
ទោះជាយ៉ាងណា របបយោធាហាក់មិនចុះញ៉មនឹងសម្ពាធសហគមន៍អន្តរជាតិនៅឡើយ ។ របបយោធាបានព្រមានថា ខ្លួនមានឆន្ទៈប្រើកម្លាំងដ៍សាហាវ ដើម្បីបង្ក្រាបបាតុកម្មទ្រង់ទ្រាយធំដែលកាន់តែខ្លាំងឡើង ។ ការប្រកាសដូចនេះ បន្ទាប់ពីបាតុករខ្លះត្រូវបានបាញ់សម្លាប់ក្នុង ពេលធ្វើបាតុកម្ម ៕
