អាស៊ាន
បាតុករមីយ៉ាន់ម៉ា នៅតែបន្តប្រមូលផ្តុំធ្វើបាតុកម្ម ទោះសមត្ថកិច្ចព្យាយាមបំបែក
រលកនៃបាតុកម្មប្រឆាំងមេដឹកនាំយោធា នៅក្នុងប្រទេសមីយ៉ាន់ម៉ា នៅតែបន្តកើតមាន និងមានទ្រង់ទ្រាយកាន់តែធំឡើងៗ ក្រោយពីពួកមេដឹកនាំយោធា បានធ្វើរដ្ឋប្រហារទម្លាក់រដ្ឋាភិបាលឈ្នះឆ្នោតនៃគណបក្សសម្ព័ន្ធ ដើម្បីលទ្ធិប្រជាធិបតេយ្យដឹកនាំដោយអតីតម្ចាស់ពានរង្វាន់ណូបែលសន្តិភាពអ្នកស្រី អ៊ុងសាន ស៊ូជី ។
Police fire a water cannon at protesters demonstrating against the coup in Naypyitaw, Myanmar. ©REUTERS / Stringer
សេចក្តីរាយការណ៍របស់សារព័ត៌មាន CNA ឱ្យដឹងថា ប៉ូលីសមីយ៉ានម៉ា នៅថ្ងៃទី ៨ ខែកុម្ភៈ នេះ បានប្រើកាណុងបាញ់ទឹក ដើម្បីបាញ់បំបែកហ្វូងបាតុករ នៅក្នុងរដ្ឋធានីណៃពិដរ ជាទីដែលក្រុមបាតុករគាំទ្រអ្នកស្រី អ៊ុងសាន ស៊ូជី បានប្រមូលផ្តុំគ្នាស្រែកទាមទារឱ្យមេដឹកនាំយោធា ដោះលែងអ្នកស្រី អ៊ុងសាន ស៊ូជី និងមន្រ្តីនៃគណបក្សសម្ព័ន្ធ ដើម្បីលទ្ធិប្រជាធិបតេយ្យ ដែលត្រូវបានពួកយោធាចាប់ឃុំខ្លួននៅក្នុងផ្ទះនៅចំថ្ងៃធ្វើរដ្ឋប្រហារ កាលពីថ្ងៃទី ១ ខែកុម្ភៈ និងទាមទារឱ្យស្តារប្រជាធិបតេយ្យ នៅក្នុងប្រទេសនេះឡើងវិញ ។
នេះគឺជាលើកដំបូង ដែលគេសង្កេតឃើញថាប៉ូលីសមីយ៉ាន់ម៉ា បានប្រើកាណុងបាញ់ទឹកលើហ្វូងបាតុករ ចាប់តាំងពីផ្ទុះការតវ៉ាធ្វើបាតុកម្មអស់រយៈពេល ៣ ថ្ងៃកន្លងទៅនេះ ។
គួរបញ្ជាក់ថា គណបក្សសម្ព័ន្ធ ដើម្បីលទ្ធិប្រជាធិបតេយ្យរបស់លោកស្រី អ៊ុងសាន ស៊ូជី បានឈ្នះឆ្នោតដឹកនាំរដ្ឋាភិបាលម្តងរួចហើយកាលពីឆ្នាំ ២០១៥ និងឈ្នះឆ្នោតជាថ្មីទៀត នៅក្នុងការបោះឆ្នោត កាលពីខែវិច្ឆិកា ឆ្នាំ២០២០ ។ ប៉ុន្តែក្រុមមេដឹកនាំយោធាមិនទទួលស្គាល់លទ្ធផលបោះឆ្នោត ដោយបានចោទប្រកាន់ថាការបោះឆ្នោតមានការលួចបន្លំសន្លឹកឆ្នោត ។ ទោះបីជាយ៉ាងណា គណៈកម្មាធិការជាតិរៀបចំការបោះឆ្នោតរបស់មីយ៉ាន់ម៉ាបានច្រានចោល ការចោទប្រកាន់របស់យោធា ។ ក្រុមមេដឹកនាំយោធាក៏បានធ្វើរដ្ឋប្រហារ និងបានប្រកាសដាក់ប្រទេស នៅក្នុងភាពអាសន្នរយៈពេល ១ ឆ្នាំ ។
ក្រោយមកពលរដ្ឋមីយ៉ាន់ម៉ារាប់ពាន់អ្នកក្នុងនោះ រួមមានទាំងកម្មករ គ្រួបង្រៀន អ្នកច្បាប់ អ្នកធ្វើការងារក្នុងវិស័យហិរញ្ញវត្ថុ ធនាគារ និងមន្រ្តីបំរើការក្នុងជួររដ្ឋាភិបាលផង បាននាំគ្នាធ្វើ កូដកម្មមិនព្រមចូលធ្វើការ និងបានប្រមូលផ្តុំគ្នា នៅតាមទីសាធារណៈដើម្បីទាមទារឱ្យ រដ្ឋាភិបាលយោធាដោះលែងលោកស្រី អ៊ុងសាន ស៊ូជី និងបក្ខពួក ។
ការប្រើកាណុងបាញ់ទឹកបំបែកហ្វូងបាតុករ ត្រូវបានគេរាយការណ៍ថា បានបណ្តាលឱ្យមនុស្ស មួយចំនួនរងរបួស ។
បាតុករម្នាក់ ដែលជាកម្មកររោងចក្រកាត់ដែរ បានថ្លែងប្រាប់សារព័ត៌មាន AFP ថា ទោះជាចំថ្ងៃធ្វើការក្តី ប៉ុន្តែរូបគេមិនទៅធ្វើការនោះទេ បើទោះជាប្រាក់ខែរបស់លោកត្រូវបានគេកាត់ ក៏ដោយ ។ ក្រោយរដ្ឋប្រហារ រដ្ឋាភិបាលដឹកនាំដោយក្រុមយោធាបានធ្វើការផ្លាស់ប្តូររដ្ឋមន្រ្តីនៅតាម បណ្តាក្រសួង និងបានបិទខ្ទប់បណ្តាញទំនាក់ទំនងសង្គមនៅក្នុងប្រទេសដូចជា Facebook Twitter និង Instagram ជាដើម ដោយបារម្ភថា ពលរដ្ឋប្រើប្រាស់បណ្តាញសង្គមទាំងនេះដើម្បី ប្រកាសប្រមូលផ្តុំគ្នាកាន់តែច្រើនធ្វើបាតុកម្មប្រឆាំងនឹងរបបយោធា ។
ទោះជាយ៉ាងណា រដ្ឋាភិបាលយោធាមិនអាចបញ្ឈប់ក្រុមបាតុករមីយ៉ានម៉ាដែលជាអ្នកគាំទ្រ លោកស្រី អ៊ុងសាន ស៊ូជី និងដែលកំពុងស្រេកឃ្លានលទ្ធិប្រជាធិបតេយ្យមិនឱ្យចេញផ្លូវតវ៉ា បាននោះឡើយ ។ ក្រោយរដ្ឋប្រហារ ប្រទេសប្រជាធិបតេយ្យធំៗមួយចំនួនរួមមានសហរដ្ឋ អាមេរិក និងប្រទេស នៅក្នុងសហភាពអឺរ៉ុបបានចេញមុខថ្កោលទោសពួកមេដឹកនាំយោធា និងទាមទារឱ្យ ដោះលែងអ្នកប្រជាធិបតេយ្យដែលត្រូវបានយោធាឃុំខ្លួន និងស្តារលទ្ធិប្រជាធិបតេយ្យឡើង វិញ ។ ប្រទេសប្រជាធិបតេយ្យធំៗទាំងនេះ បានព្រមានរបបយោធាថានឹងចាត់វិធានការផ្សេង ៗបើរបបយោធាភូមាមិនព្រមដោះលែងលោកស្រី អ៊ុងសាន ស៊ូជី និងស្តារលទ្ធិប្រជាធិបតេយ្យ ឡើងវិញនោះ ។
ចំណែកបណ្តាប្រទេសដែលជាសមាជិករបស់អាស៊ាន ខ្លះបានត្រឹមសម្តែងការបារម្ភ ខណៈខ្លះ ទៀតមិនបានបញ្ចេញប្រតិកម្មអ្វីធ្ងន់ធ្ងរឡើយ ដោយចាត់ទុកថា រដ្ឋប្រហាររបស់មេដឹកនាំ យោធាគឺជារឿងនយោបាយផ្ទៃក្នុងរបស់មីយ៉ានម៉ា ៕
