តំបន់&អន្តរជាតិ
តៃវ៉ាន់ ស្វែងរកមីស៊ីលបាញ់ចំងាយឆ្ងាយ ពីអាមេរិក ក្នុងពេលមានភាពតានតឹងខ្លាំងជាមួយចិន
កោះតៃវ៉ាន់កំពុងស្វែងរកទិញកាំជ្រួចមីស៊ីលបាញ់ចំងាយឆ្ងាយ និងមីស៊ីលបាញ់ពីលើអាកាស ពីសហរដ្ឋអាមេរិក ក្នុងពេលដែលកោះមួយនេះកំពុងមានភាពតានតឹងខ្លាំងជាមួយទីក្រុង ប៉េកាំងដែលក្នុងមួយរយៈពេលចុងក្រោយនេះបានបញ្ជូនយន្តហោះចំបាំងហោះឆ្វែលចូលទៅក្បែរដែនអាកាសរបស់តៃវ៉ាន់ ដែលត្រូវបានតៃវ៉ាន់ចាត់ទុកជាដែនអធិបតេយ្យភាពរបស់ខ្លួន ។
Taiwan’s President Tsai Ing-wen applauds during the launch ceremony for Taiwan Navy’s domestically built amphibious transport dock “Yushan” in Kaohsiung, Taiwan, April 13, 2021. REUTERS/Ann Wang
សារព័ត៌មាន Reuters បានផ្សាយនៅថ្ងៃទី១៩ ខែមេសា ដោយលើកឡើងសម្តីរបស់ប្រធានផ្នែក ផែនការយុទ្ធសាស្រ្តនៃក្រសួងការពារជាតិតៃវ៉ាន់ លោក Lee Shih-chiang ដែលនិយាយថា មីស៊ីលដែលតៃវ៉ាន់កំពុងស្វែងរកពីអាមេរិកមានឈ្មោះ Lockheed Martin Corp’s AGM-158 ។
គេនៅមិនទាន់ដឹងថា តើសហរដ្ឋអាមេរិកនឹងអាចផ្តល់នូវប្រភេទកាំជ្រួចមីស៊ីលតាមការចង់ បានរបស់តៃវ៉ាន់នៅពេលនេះនៅឡើយទេ ។ ប៉ុន្តែលោក Lee Shih-chiang និយាយថា តៃវ៉ាន់ កំពុងស្ថិតនៅក្នុងដំណើរការស្វែងរកមីស៊ីលប្រភេទនេះ ហើយថាដំណើរការទំនាក់ទំនង ជាមួយសហរដ្ឋអាមេរិកកំពុងប្រព្រឹត្តទៅយ៉ាងរលូនល្អ និងធម្មតា ។
គួរបញ្ជាក់ថា មីស៊ីល AGM-158 ដែលតៃវ៉ាន់កំពុងស្វែងរកនេះ អាចបាញ់បានចំងាយ ១០០០ គីឡូម៉ែត្រ និងអាចបំពាក់នៅលើយន្តហោះចំបាំង F-16 ដែលតៃវ៉ាន់កំពុងមាន ។
កោះតៃវ៉ាន់កំពុងព្យាយាមធ្វើទំនើបកម្មផ្នែកយោធារបស់ខ្លួនក្នុងពេលភាពតានតឹងជាមួយចិន កំពុងតែមានកាន់តែខ្លាំងឡើងៗ ពីមួយថ្ងៃទៅមួយថ្ងៃ ។ សហរដ្ឋអាមេរិក គឺជាប្រទេសផ្គត់ផ្គង់ អាវុធដ៏សំខាន់បំផុតមួយរបស់កោះតៃវ៉ាន់ ។
កោះតៃវ៉ាន់មិនចង់រស់នៅស្ថិតក្រោមការគ្រប់គ្រងរបស់ចិននោះឡើយ ប៉ុន្តែទីក្រុងប៉េកាំងនៅ តែចាត់ទុកកោះតៃវ៉ាន់ គឺជាទឹកដីរបស់ខ្លួន ។ ទីក្រុងប៉េកាំងតែងប្រកាសថា ខ្លួននឹងមិន ញញើតនៅក្នុងការប្រើកម្លាំងទ័ពដើម្បីវាយយកកោះតៃវ៉ាន់ដាក់ឱ្យឋិតនៅក្រោមការ គ្រប់គ្រងរបស់ខ្លួននោះឡើយ បើកោះតៃវ៉ាន់ហ៊ានប្រកាសឯករាជ្យនៅថ្ងៃណាមួយ ។
ទោះជាយ៉ាងណា ប្រធានាធិបតីតៃវ៉ាន់ អ្នកស្រី ត្សៃ អិង វ៉ែន (Tsai Ing-wen) ធ្លាប់និយាយថា កោះតៃវ៉ាន់ហាក់ដូចជាប្រទេសឯករាជ្យមួយបាត់ទៅហើយ ហើយដែលអ្នកស្រីថាឈ្មោះវាគឺ «សាធារណរដ្ឋតៃវ៉ាន់» ៕
