WHO ថាមិនអាចបង្ខំចិនផ្តល់ព័ត៌មានបន្ថែមពីប្រភពនៃជំងឺកូវីដ-១៩ បាននោះទេ

មន្រ្តីជាន់ខ្ពស់នៃអង្គការសុខភាពពិភពលោក (WHO) និយាយថា ស្ថាប័ននេះមិនអាចបង្ខំ ប្រទេសចិនឱ្យផ្តល់ព័ត៌មានបន្ថែមទៀតអំពីប្រភពចំលងនៃជំងឺកូវីដ-១៩ នោះទេ ។

នៅពេលត្រូវបានសួរដោយអ្នកកាសែតអំពីវិធានការរបស់ WHO ក្នុងការជំរុញឱ្យប្រទេសចិន មានការបើកចំហបន្ថែមទៀតជុំវិញការស៊ើបអង្កេតនៃប្រភពចំលងជំងឺកូវីដ-១៩ លោក ម៉ៃ រ៉ាយអិន (Mike Ryan) ដែលជានាយកកម្មវិធីសង្រ្គោះបន្ទាន់នៃ WHO បានឆ្លើយតបនៅក្នុង សន្និសីទកាសែតថា អង្គការសុខភាពពិភពលោកមិនមានអំណាចបង្ខំអ្នកណាម្នាក់នៅក្នុងរឿង នេះនោះទេ ។

សារព័ត៌មាន Aljazeera បានផ្សាយដោយស្រង់សំដីរបស់លោក រ៉ាយអិន ថា អង្គការសុខភាព ពិភពលោករំពឹងថានឹងទទួលបានកិច្ចសហប្រតិបត្តិការពេញលេញ ទទួលបានធាតុចូល និង ការគាំទ្រពីរដ្ឋជាសមាជិករបស់ WHO ទាំងអស់ ។

ពាក់ព័ន្ធនឹងប្រភពចំលងនៃជំងឺកូវីដ-១៩ មានការលើកឡើងផ្សេងៗគ្នាថា ជំងឺនេះមានប្រភព ចំលងមកពីសត្វប្រចៀវដែលបានចំលងមេរោគទៅកាន់សត្វមួយផ្សេងទៀតមុននឹងចំលងបន្ត ទៅកាន់មនុស្ស ។ ប៉ុន្តែគេនៅមិនទាន់អាចបញ្ជាក់បាននៅឡើយទេថា សត្វដែលទទួលបាន ការចំលងពីសត្វប្រចៀវមុននឹងចំលងទៅកាន់មនុស្ស ជាសត្វអ្វីពិតប្រាកដនៅឡើយ​ ។ ក្នុង ពេលជាមួយគ្នា ក៏មានការលើកឡើងដែរថា ជំងឺកូវីដ-១៩ អាចមានប្រភពលេចមេរោគចេញពី មន្ទីរពិសោធន៍វេជ្ជសាស្រ្តនៅក្នុងទីក្រុងវូហាន ខេត្តហ៊ូបិ ប្រទេសចិន ។

ការលើកឡើងចុងក្រោយនេះហើយ គឺជាប្រធានបទនៃការជជែកគ្នារបស់ក្រុមអ្នកវិទ្យាសាស្រ្ត ក្នុងរយៈពេលចុងក្រោយដែលឈានដល់ការស្នើឱ្យមានការស៊ើបអង្កេតពេញលេញជាថ្មីអំពី ប្រភពចំលងនៃជំងឺនេះ ។ ទោះជាយ៉ាងណាក៏ដោយ ប្រទេសចិនបានបដិសេធហើយថា មន្ទីរវេជ្ជសាស្រ្តចិនមិនមែនជាប្រភពចំលងនៃជំងឺកូវីដ-១៩ នោះទេ ។

គួរបញ្ជាក់ថា អង្គការសុខភាពពិភពលោក ធ្លាប់បានបញ្ជូនក្រុមស៊ើបអង្កេតរបស់ខ្លួនទៅកាន់ ប្រទេសចិនដើម្បីស្វែងរកប្រភពចំលងនៃជំងឺកូវីដ-១៩ ម្តងរួចមកហើយ ។ ក្រោយការស៊ើប អង្កេតនោះ ក្រុមស៊ើបអង្កេតសន្និដ្ឋានថា លទ្ធភាពដែលថាជំងឺកូវីដ-១៩ មានប្រភពចេញពី មន្ទីរពិសោធន៍វេជ្ជសាស្រ្តចិន គឺពិបាកឱ្យជឿបានណាស់ ។ ទោះជាយ៉ាងណាក៏ដោយ សមាជិកនៃក្រុមស៊ើបអង្កេតនេះទទួលស្គាល់ថា ពួកគេមិនអាចទទួលបានទិន្នន័យទាំងអស់ពី រដ្ឋាភិបាលចិននោះទេ ។ ការប្រកាសដូចនេះ បានជំរុញឱ្យមានកិច្ចពិភាក្សាអំពីការប្តេជ្ញាចិត្ត និងតម្លាភាពរបស់រដ្ឋាភិបាលចិនចំពោះការស៊ើបអង្កេតនេះ ។

អតីតប្រធានាធិបតីអាមេរិក លោក ដូណាល់ ត្រាំ បានចោទប្រកាន់ប្រទេសចិនថាមានចេតនា បញ្ចេញមេរោគជំងឺកូវីដ-១៩ ចេញពីមន្ទីរពិសោធន៍វេជ្ជសាស្រ្តរបស់ខ្លួន​ ។ ចំណែករដ្ឋមន្រ្តីការ បរទេស​នៃរដ្ឋបាល លោក ដូណាល់ ត្រាំ លោក ម៉ៃ ប៉ុមប៉េអូ និយាយថា គេមានភស្តុតាំង សំខាន់ៗដែលអាចបញ្ជាក់ថា មេរោគជំងឺកូវីដ-១៩ មានប្រភពចេញពីមន្ទីរពិសោធន៍ក្នុង ប្រទេសចិន ។ យ៉ាងណាក្តី រដ្ឋបាលលោក ដូណាល់ ត្រាំ មិនបានបញ្ចេញភស្តុតាំងទាំង នោះឡើយ ។

ចំណែកប្រធានាធិបតីអាមេរិក លោក ចូ បៃដិន កាលពីពេលថ្មីៗនេះ បានចេញបញ្ជាឱ្យអ្នក ជំនាញពាក់ព័ន្ធរបស់អាមេរិកបើកការស៊ើបអង្កេតទៅលើប្រភពចំលងនៃជំងឺកូវីដ-១៩  និងត្រូវឆ្លើយតបមកលោកអំពីលទ្ធផលស៊ើបអង្កេតនេះ ក្នុងរយៈពេល ៩០ ថ្ងៃ ៕