ម៉ាឡេស៊ីប្រើយន្តហោះដ្រូនចាប់យកកំដៅរាងកាយអ្នកដែលអាចឆ្លងកូវីដ-១៩

ប៉ូលីសនៅក្នុងរដ្ឋ ធើរេនហ្កានូ (Terengganu) នៃប្រទេសម៉ាឡេស៊ី កំពុងប្រើប្រាស់យន្តហោះ ដូ្រនដើម្បីចាប់យកកំដៅរាងកាយរបស់មនុស្សនៅតាមទីសាធារណៈ ។ ការប្រើប្រាស់នេះក្នុង ពេលដែលប្រទេសម៉ាឡេស៊ីកំពុងអនុវត្តការបិទខ្ទប់នៅទូទាំងប្រទេសជាលើកទី ៣ ។

សារព័ត៌មានសឹង្ហបុរី CNA បានផ្សាយថា យន្តហោះដ្រូនដែលប៉ូលីសម៉ាឡេស៊ីកំពុងប្រើប្រាស់ នេះ អាចចាប់យកកំដៅមនុស្សក្នុងរយៈកំពស់ ២០ ម៉ែត្រពីលើដី ។

A DJI Mavic 2 Enterprise drone equipped with a thermal sensor used by municipal police in Treviolo for checking people’s temperature is pictured in flight on April 9, 2020 in Treviolo, near Bergamo, during the country’s lockdown aimed at stopping the spread of the COVID-19 pandemic, caused by the novel coronavirus. (Photo by MIGUEL MEDINA / AFP)

មេប៉ូលីសរដ្ឋ Terengganu លោក រ៉ូហាយមី អ៊ីសា (Rohaimi Md Isa) និយាយថា «ប្រសិនបើ យន្តហោះដ្រូនចាប់បានកំដៅរាងកាយអ្នកណាម្នាក់ ដូចជាកំដៅលើសពី ៣៧.៥ ដឺក្រេ វានឹង បញ្ចេញពន្លឺក្រហម ពេលនោះ មន្រ្តីអនុវត្តរបស់យើងនឹងទៅកាន់ទីតាំងដែលមនុស្សនោះ កំពុងឋិតនៅដើម្បីពិនិត្យរោគសញ្ញា» ។

មេប៉ូលីសដដែលនិយាយថាការប្រើប្រាស់យន្តហោះដ្រូននេះបានជួយមន្រ្តីអនុវត្តបានយ៉ាងច្រើន ។ លោកថា បើទោះជាក្រុមលោកមានក្រុមត្រួតពិនិត្យរហូតដល់ ១៥៧ ក៏ដោយ  ពួកគេត្រូវធ្វើដំណើរពីកន្លែងមួយទៅកន្លែងមួយ ។ ប៉ុន្តែបញ្ហានៅត្រង់ថា ពួកគេមិនអាចត្រួត ពិនិត្យគ្រប់ទីកន្លែងទាំងអស់នៅពេលតែមួយ ដូចជាការចាប់យករោគសញ្ញាពីបុគ្គលអាចឆ្លង ជំងឺកូវីដ-១៩ នៅតាមទីសាធារណៈជាដើម ។

យន្តហោះដ្រូនដែលត្រូវបានរដ្ឋ Terengganu នៃប្រទេសម៉ាឡេស៊ីកំពុងប្រើប្រាស់នៅពេលនេះ ត្រូវបានក្រុមហ៊ុនឯកជនមួយរបស់ម៉ាឡេស៊ីឱ្យអាជ្ញាធរខ្ចីដើម្បីប្រើប្រាស់ក្នុងអំឡុងពេលនៃការ បិទខ្ទប់ទូទាំងប្រទេសនៅម៉ាឡេស៊ី ។

គួររំលឹកដែរថា កាលពីខែមេសា ឆ្នាំ ២០២០ ប៉ូលីសនៅរដ្ឋ Terengganu ក៏បានប្រើយន្តហោះ ដ្រូនដើម្បីតាមដានការបំលាស់ទី និងចាប់យកកំដៅរាងកាយពលរដ្ឋនៅតំបន់ ដុនហ្គុន (Dungun) នៅក្នុងអំឡុងពេលនៃការគ្រប់គ្រងការបំលាស់ទីផងដែរ ។

ប្រទេសម៉ាឡេស៊ីកំពុងអនុវត្តការបិទខ្ទប់ប្រទេសទាំងស្រុងជាថ្មីទៀត រយៈពេលពីរសប្តាហ៍ ចាប់ពីថ្ងៃទី១ ដល់ថ្ងៃទី ១៤ ខែមិថុនា ក្នុងពេលដែលរលកទី៣ នៃការឆ្លងរាលដាលជំងឺកូវីដ-១៩ កំពុងបោកបក់នៅក្នុងប្រទេសអាស៊ីអាគ្នេយ៍មួយនេះ ៕