លោក ចូ បៃដិន ជ្រើសរើសទ្វីបអឺរ៉ុបសម្រាប់ដំណើរទស្សនកិច្ចក្រៅប្រទេសដំបូង

ប្រធានាធិបតីអាមេរិក លោក ចូ បៃដិន នឹងចាប់ផ្តើមដំណើរទស្សនកិច្ចទៅកាន់ក្រៅប្រទេស ជាលើកដំបូងចាប់តាំងពីបានចូលកាន់ដំណែងជាប្រធានាធិបតីអាមេរិកនៅខែកុម្ភៈ ឆ្នាំ ២០២១ មក ដោយបានជ្រើសរើសទ្វីបអឺរ៉ុបជាគោលដៅដំបូងរបស់លោក ។

ក្នុងដំណើរទស្សនកិច្ចទៅកាន់ទ្វីបអឺរ៉ុបចាប់ពីចុងសប្តាហ៍នេះ លោក ចូ បៃដិន នឹងចូលរួមកិច្ច ប្រជុំកំពូលថ្នាក់ដឹកនាំប្រទេស G7 កិច្ចប្រជុំជាមួយបក្សសម្ព័ន្ធអង្គការណាតូ កិច្ចប្រជុំកំពូល សហភាពអឺរ៉ុប និងកិច្ចប្រជុំទ្វេភាគីជាមួយប្រធានាធិបតីរុស្សី លោក វ៉ា្លឌីមៀ ពូទីន (Vladimir Putin) ។

សម្រាប់កិច្ចប្រជុំកំពូល G7 ដែលមានរយៈពេលបីថ្ងៃចាប់ពីថ្ងៃសុក្រ ដល់ថ្ងៃអាទិត្យ ចុង សប្តាហ៍នេះ លោក ចូ បៃដិន នឹងជួបជាមួយថ្នាក់ដឹកនាំនៃចក្រភពអង់គ្លេស ប្រទេស កាណាដា បារាំង អាល្លឹម៉ង់ អ៊ីតាលី និងជប៉ុន នៅឯរមណីដ្ឋានមាត់សមុទ្រនៅក្នុងប្រទេសអង់ គ្លេសដែលធ្វើជាប្រធានប្តូរវេន G7 នៅឆ្នាំនេះ ។ នៅក្នុងចក្រភពអង់គ្លេសដដែលនោះ លោក ចូ បៃដិន ក៏នឹងចូលជួបម្ចាស់ក្សត្រីយ៍អង់គ្លេស អាលីហ្សាបែត ទី២ នៅប្រាសាទ វីនស័រ (Windsor) ផងដែរ ។

ចេញពីកិច្ចប្រជុំកំពូល G7 នៅចក្រភពអង់គ្លេស លោក ចូ​ បៃដិន នឹងធ្វើដំណើរទៅកាន់ទីក្រុង ប្រ៊ុសសែល ប្រទេសប៊ែលហ្សិក ដើម្បីចូលរួមកិច្ចប្រជុំកំពូលអង្គការណាតូ នៅថ្ងៃទី១៤ ខែមិថុនា ។ ចំណែកនៅថ្ងៃទី១៥ ខែមិថុនា លោកនឹងចូលរួមកិច្ចប្រជុំកំពូលសហភាពអឺរ៉ុប មុន នឹងហោះទៅជួបប្រធានាធិបតីរុស្សី លោក ពូទីន នៅថ្ងៃទី១៦ ខែមិថុនា នៅក្នុងប្រទេសស្វីស ។

លោក ចូ បៃដិន បានថ្លែងចាត់ទុកដំណើរទស្សនកិច្ចទៅកាន់ទ្វីបអឺរ៉ុបរបស់លោក គឺជាការ កំណត់សមរភូមិសម្រាប់លទ្ធិប្រជាធិបតេយ្យ ។ លោកបញ្ជាក់ថា ដំណើរទស្សនកិច្ចទៅកាន់ ទ្វីបអឺរ៉ុបរបស់លោករយៈពេលមួយសប្តាហ៍ខាងមុខនេះ គឺជាការបង្ហាញនូវភាពរឹងមាំរបស់ ប្រជាធិបតេយ្យដើម្បីឆ្លើយតបទៅនឹងអ្វីដែលលោកចាត់ទុកថាជាការគំរាមកំហែងនៅសម័យ ទំនើបបច្ចុប្បន្ន ៕