កម្ពុជា
ក្រសួងការពារជាតិប្រកាសចាក់វ៉ាក់សាំងដល់មន្រ្តីក្រោមចំណុះ
ក្រុមវ៉ាក់សាំងកូវីដ១៩ ក្រសួងការពារជាតិ គ្រោងចាប់ផ្តើមចាក់វ៉ាក់សាំង SARS Cov-2 Sinopharm ដល់ថ្នាក់ដឹកនាំ ប្រធានស្ថាប័នចំណុះក្រសួងការពារជាតិ អគ្គបញ្ជាការដ្ឋាន នៃកង យោធពលខេមរភូមិន្ទ ដែលមានអាយុចាប់ពី ១៨ ឆ្នាំ រហូតដល់អាយុលើសពី ៥៩ ឆ្នាំ តាមការ ស្ម័គ្រចិត្ត ។
សេចក្តីប្រកាសព័ត៌មានរបស់ក្រសួងការពារជាតិ ស្តីពី៖ ការចាក់វ៉ាក់សាំងបង្ការជម្ងឺកូវិដ-១៩
សេចក្តីប្រកាសព័ត៌មានរបស់ក្រសួងការពារជាតិ ផ្សព្វផ្សាយនៅថ្ងៃទី៩ ខែកុម្ភៈ បញ្ជាក់ថា ការចាក់វ៉ាក់សំាងនេះ អនុវត្តតាមប្រសាសន៍របស់លោកនាយករដ្ឋមន្រ្តី ហ៊ុន សែន និងក្រោម ការដឹកនាំរបស់លោក ទៀ បាញ់ រដ្ឋមន្រ្តីក្រសួងការពារជាតិ ។
សេចក្តីប្រកាសព័ត៌មានឱ្យដឹងថា ការចាក់វ៉ាក់សំាងនឹងប្រព្រឹត្តទៅចាប់ពីថ្ងៃទី១០ ខែកុម្ភៈ វេលាម៉ោង ២ រសៀល នៅមន្ទីរពេទ្យព្រះកេតុមាលា ។ ដោយឡែក ការចាក់វ៉ាក់សាំងដល់ នាយទាហាន នាយទាហានរង និងពលទាហាន តាមស្ថាប័ន កងឯកភាពក្នុងកងយោធពល ខេមរភូមិន្ទ ក្រុមវ៉ាក់សាំងកូវីដ១៩ ក្រសួងការពារជាតិ នឹងជូនដំណឹងពីកាលបរិច្ឆេទ និងទីតាំងជាក់លាក់នៅពេលក្រោយ ។
ដោយឡែកក្រសួងសុខាភិបាលកាលពីថ្ងៃទី៨ ខែកុម្ភៈ បានប្រកាសថា ពេលវេលានៃការចាក់ វ៉ាក់សំាងបង្ការនឹងប្រព្រឹត្តទៅចាប់ពីថ្ងៃទី ១០ ខែកុម្ភៈ ទៅតាមទីតាំង រួមមាន មន្ទីរពេទ្យ កាល់ម៉ែត សម្រាប់ឥស្សរជនជាទេសរដ្ឋមន្រ្តី រដ្ឋមន្រ្តី រដ្ឋលេខាធិការ ឬមានឋានៈស្មើ ។ មន្ទីរពេទ្យព្រះអង្គឌួង សម្រាប់ឥស្សរជនជា អនុរដ្ឋលេខាធិការ ឬមានឋានៈស្មើ ។ មន្ទីរពេទ្យមិត្តភាពខ្មែរ-សូវៀត សម្រាប់ឥស្សរជន ជាអភិបាលនៃគណៈអភិបាលរាជធានី ខេត្ត និងមន្ទីរពេទ្យកុមារជាតិ សម្រាប់អ្នកសារព័ត៌មាន ។
រូបភាពកិច្ចប្រជុំពិភាក្សាវឌ្ឍនភាពការងារសម្របសម្រួល ទទួលទុកដាក់ ប្រើប្រាស់ និងចាក់វ៉ាក់សាំងការពារជំងឺកូវីដ១៩ ជូនកងទ័ពក្នុងកងយោធពលខេមរភូមិន្ទ និងគ្រួសារ
កាលពីថ្ងៃទី៧ ខែកុម្ភៈ វ៉ាក់សាំងជំងឺកូវីដ-១៩ ឈ្មោះ Sinopharm ចំនួន ៦០ ម៉ឺនដូសដែលជា អំណោយរបស់ប្រទេសចិនត្រូវបានដឹកមកដល់ប្រទេសកម្ពុជា ។ ក្នុងនោះ ៣០ ម៉ឺនដូស ផ្តល់ឱ្យក្រសួងសុខាភិបាលកម្ពុជា ហើយ ៣០ ម៉ឺនដូសទៀតប្រគល់ឱ្យក្រសួងការពារជាតិ ។
ប្រទេសចិនប្រកាសថានឹងផ្តល់វ៉ាក់សាំងចំនួន ១ លានដូសដល់កម្ពុជា ។ មានន័យថា វ៉ាក់សាំងចំនួន ៤០ ម៉ឺនដូសបន្ថែមទៀតនឹងត្រូវបញ្ជូនមកជាបន្តបន្ទាប់នៅពេលក្រោយ ។
មតិខ្លះយល់ថា រដ្ឋាភិបាលមិនគួរទទួលយកវ៉ាក់សាំងជំងឺកូវីដ-១៩ របស់ប្រទេសចិនឈ្មោះ Sinopharm នោះទេ ដោយហេតុថាវ៉ាក់សាំងនេះ មិនទាន់ត្រូវបានប្រកាសទទួលស្គាល់ដោយ អង្គការសុខភាពពិភពលោក (WHO) នៅឡើយទេ ។ ប៉ុន្តែក្រសួងសុខាភិបាលកម្ពុជាកាល ពីថ្ងៃទី៤ ខែកុម្ភៈ បានចេញសេចក្តីប្រកាសអនុញ្ញាតិឱ្យប្រើប្រាស់ជាផ្លូវការនូវវ៉ាក់សាំង Sinopharm Covid-19 ដែលផលិតដោយវិទ្យស្ថាន Beijing Institute of Biological Products Co., Ltd នៃប្រទេសចិន ដោយក្រសួងអះអាងថា វ៉ាក់សំាងនេះត្រូវបានប្រើប្រាស់ប្រកបដោយ សុវត្ថិភាពនៅក្នុងប្រទេសចិន និងប្រទេសមួយចំនួនក្នុងលក្ខខណ្ឌនៃការប្រើប្រាស់ជាបន្ទាន់ (Emergency Use Authorization) ។
លោកនាយករដ្ឋមន្រ្តី ហ៊ុន សែន បានប្រកាសនៅថ្ងៃទី៥ ខែកុម្ភៈ ថា នឹងមិនចូលរួមចាក់ វ៉ាក់សំាង Sinopharm នៅថ្ងៃទី១០ ខែកុម្ភៈ ឡើយ ដោយលោកបញ្ជាក់ថាលោកបានទទួល ព័ត៌មាន តាមរយៈក្រសួងសុខាភិបាលដែលបានទទួលលិខិតផ្លូវការពីការិយាល័យនៃ ទីប្រឹក្សាសេដ្ឋកិច្ច និងពាណិជ្ជកម្មប្រចាំស្ថានទូតចិនប្រចាំប្រទេសកម្ពុជាដែលបញ្ជាក់ថា វ៉ាក់សាំង ឈ្មោះ Sinopharm ចាក់បានតែមនុស្សមានអាយុពី ១៨ ឆ្នាំទៅ ៥៩ ឆ្នាំតែប៉ុណ្ណោះ ។ ចំណែកលោក មានអាយុជាង ៦៨ ឆ្នាំទៅហើយ ដូច្នេះគឺមិនទាន់អាចចាក់បាននៅឡើយទេ ។ ទោះជាយ៉ាងណា លោកបញ្ជាក់ថា នឹងឱ្យកូនប្រុសទាំង ៣ រូបរបស់លោក គឺលោក ហ៊ុន ម៉ាណែត ហ៊ុន ម៉ានិត និង ហ៊ុន ម៉ានី ទៅចាក់វ៉ាក់សាំងដែលជាអំណោយរបស់ចិននេះដើម្បី បង្ហាញសាធារណជនអំពីទំនុកចិត្តទៅលើវ៉ាក់សាំងរបស់ចិន ៕
