កម្ពុជា
ក្រសួងសុខាភិបាលចាប់ផ្តើមចាក់វ៉ាក់សាំងជំងឺកូវីដ-១៩ ចាប់ពីថ្ងៃទី១០ ខែកុម្ភៈ
ក្រសួងសុខាភិបាលកម្ពុជាប្រកាសថា នឹងចាប់ផ្តើមចាក់វ៉ាក់សាំងបង្ការជំងឺកូវីដ-១៩ ពីថ្ងៃទី ១០ ខែកុម្ភៈ ឆ្នាំ ២០២១ តទៅ ។ ការប្រកាសនេះ ធ្វើឡើងមួយថ្ងៃក្រោយពីវ៉ាក់សាំងចំនួន ៦០ ម៉ឺនដូស ដែលជាជំនួយរបស់រដ្ឋាភិបាលចិន ត្រូវបានដឹកជញ្ជូនមកដល់ប្រទេសកម្ពុជា ។ 
សេចក្តីប្រកាសព័ត៌មានរបស់ក្រសួងសុខាភិបាលផ្សព្វផ្សាយនៅថ្ងៃទី ៨ ខែកុម្ភៈ ឱ្យដឹងថា គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ នឹងរៀបចំកម្មវិធីចាក់វ៉ាក់សំាង Sinopharm សម្រាប់បង្ការជំងឺកូវីដ-១៩ ដល់បុគ្គលដែលជាឥស្សរជនជាន់ខ្ពស់អាយុចាប់ពី ១៨ ឆ្នាំដល់ ៥៤ ឆ្នាំ ដោយការស្ម័គ្រចិត្ត ។
ក្រសួងសុខាភិបាលបញ្ជាក់ថា ពេលវេលានៃការចាក់វ៉ាក់សំាងបង្ការនឹងប្រព្រឹត្តទៅចាប់ពីថ្ងៃទី ១០ ខែកុម្ភៈ ទៅតាមទីតាំង រួមមាន មន្ទីរពេទ្យកាល់ម៉ែត សម្រាប់ឥស្សរជនជាទេសរដ្ឋមន្រ្តី រដ្ឋមន្រ្តី រដ្ឋលេខាធិការ ឬមានឋានៈស្មើ ។ មន្ទីរពេទ្យព្រះអង្គឌួង សម្រាប់ឥស្សរជនជា អនុរដ្ឋលេខាធិការ ឬមានឋានៈស្មើ ។ មន្ទីរពេទ្យមិត្តភាពខ្មែរ-សូវៀត សម្រាប់ឥស្សរជន ជាអភិបាលនៃគណៈអភិបាលរាជធានី ខេត្ត និងមន្ទីរពេទ្យកុមារជាតិ សម្រាប់អ្នកសារព័ត៌មាន ។
គួរបញ្ជាក់ថា នាសន្និសីទសារព័ត៌មាននៅក្នុងពិធីប្រគល់ ទទួលអំណោយវ៉ាក់សាំង SARS-CoV-2 (Sinopharm) ពីរដ្ឋាភិបាលសាធារណរដ្ឋប្រជាមានិតចិនចំនួន ៦០ ម៉ឺនដូស នៅព្រលានយន្តហោះអន្តរជាតិភ្នំពេញ កាលពីថ្ងៃទី ៧ ខែកុម្ភៈ លោកនាយករដ្ឋមន្រ្តី ហ៊ុន សែន បានប្រកាសថា អ្នក សារព័ត៌មានគឺជាបុគ្គលអាទិភាព ដែលត្រូវចាក់វ៉ាក់សាំង បង្ការជំងឺកូវីដ-១៩ ផងដែរ ។
រដ្ឋាភិបាលកម្ពុជាបានប្រកាសថា ប្រទេសចិនផ្តល់វ៉ាក់សាំងជំងឺកូវីដ-១៩ ចំនួន ១ លានដូស ។ ចំណែកវ៉ាក់សាំងចំនួន ៤០ ម៉ឺនដូសទៀតនឹងត្រូវដឹកជញ្ជូនមកកម្ពុជាជាបន្តបន្ទាប់នៅ ពេលក្រោយ ។
មតិខ្លះរិះគន់ថា រដ្ឋាភិបាលមិនគួរទទួលយកវ៉ាក់សាំងជំងឺកូវីដ-១៩ របស់ប្រទេសចិនឈ្មោះ Sinopharm នោះទេ ដោយហេតុថាវ៉ាក់សាំងនេះ មិនទាន់ត្រូវបានប្រកាសទទួលស្គាល់ដោយ អង្គការសុខភាពពិភពលោក (WHO) នៅឡើយទេ ។ ប៉ុន្តែ ក្រសួងសុខាភិបាលកម្ពុជា កាលពីថ្ងៃទី ៤ ខែកុម្ភៈ បានចេញសេចក្តីប្រកាសអនុញ្ញាតិឱ្យប្រើប្រាស់ជាផ្លូវការនូវវ៉ាក់សាំង Sinopharm Covid-19 ដែលផលិតដោយវិទ្យស្ថាន Beijing Institute of Biological Products Co., Ltd នៃប្រទេសចិន ដោយក្រសួងអះអាងថា វ៉ាក់សំាងនេះត្រូវបានប្រើប្រាស់ប្រកបដោយ សុវត្ថិភាពនៅក្នុងប្រទេសចិន និងប្រទេសមួយចំនួនក្នុងលក្ខខណ្ឌនៃការប្រើប្រាស់ជាបន្ទាន់ (Emergency Use Authorization) ។
លោកនាយករដ្ឋមន្រ្តី ហ៊ុន សែន បានប្រកាសនៅថ្ងៃទី ៥ ខែកុម្ភៈ ថា នឹងមិនចូលរួមចាក់ វ៉ាក់សំាង Sinopharm នៅថ្ងៃទី ១០ ខែកុម្ភៈ ឡើយ ដោយលោកបញ្ជាក់ថាលោកបានទទួលព័ត៌មាន តាមរយៈក្រសួងសុខាភិបាល ដែលបានទទួលលិខិតផ្លូវការពីការិយាល័យនៃ ទីប្រឹក្សាសេដ្ឋកិច្ច និងពាណិជ្ជកម្មប្រចាំស្ថានទូតចិនប្រចាំប្រទេសកម្ពុជាដែលបញ្ជាក់ថា វ៉ាក់សាំង ឈ្មោះ Sinopharm ចាក់បានតែមនុស្សមានអាយុពី ១៨ ឆ្នាំទៅ ៥៩ ឆ្នាំតែប៉ុណ្ណោះ ។ ចំណែកលោក មានអាយុជាង ៦៨ ឆ្នាំទៅហើយ ដូច្នេះគឺមិនទាន់អាចចាក់បាននៅឡើយទេ ៕
