កម្ពុជា
រដ្ឋបាលខេត្តព្រះសីហនុ ឱ្យម្ចាស់ក្រុមហ៊ុនរថយន្តផ្អាកអាជីវកម្មដឹកអ្នកដំណើរ ចេញចូលក្រុងដោយសារកូវីដ
រដ្ឋបាលខេត្តព្រះសីហនុនៅរសៀលថ្ងៃទី៤ ខែមីនា បានចេញសេចក្តីជូនដំណឹងឱ្យម្ចាស់ រថយន្តដឹកអ្នកដំណើរ អ្នកបើកបររថយន្តឈ្នួល អ្នកបើកបររថយន្តតាក់ស៊ី ផ្អាកធ្វើអាជីវកម្ម ដឹកអ្នកដំណើរតាមរថយន្តក្រុង រថយន្តឈ្នួល រថយន្តតាក់ស៊ី និងមធ្យោបាយដឹកអ្នកដំណើរ គ្រប់ប្រភេទចេញ-ចូល ខេត្តព្រះសីហនុមួយរយៈសិន រហូតដល់មានការជូនដំណឹងជាថ្មី ដើម្បី ចៀសវាងមានការឆ្លងរាលដាលជំងឺកូវីដ-១៩ បន្ថែមទៀត ទៅដល់ទីតាំងដទៃនាំឱ្យមានការពិ បាកគ្រប់គ្រង ។
ទោះជាយ៉ាងណា ចំពោះរថយន្តដឹកជញ្ជូនទំនិញនៅបន្តដំណើរការជាធម្មតា ប៉ុន្តែត្រូវកម្រិត ចំនួនមនុស្សជាក់លាក់ត្រឹម ២ នាក់ គឺអ្នកបើកបរ និងជំនួយការអ្នកបើកបរ ។
ព្រមពេលជាមួយគ្នា រដ្ឋបាលខេត្តព្រះសីហនុ ក៏ស្នើឱ្យប្រជាពលរដ្ឋដែលកំពុងស្នាក់នៅក្នុង ខេត្តព្រះសីហនុ ផ្អាកការធ្វើដំណើរចេញ-ចូល ទៅ-មក រាជធានី ខេត្ត ផ្សេងមួយរយៈសិន រហូតដល់មានការជូនដំណឹងជាថ្មី ។
វិធានការរបស់អាជ្ញាធរខេត្តព្រះសីហនុនេះ ក្នុងពេលដែលចំនួនអ្នកឆ្លងជំងឺកូវីដ-១៩ ក្នុង ព្រឹត្តិការណ៍សហគមន៍នៅក្នុងក្រុងព្រះសីហនុ ខេត្តព្រះសីហនុ មានការកើនឡើងជារៀងរាល់ ថ្ងៃ ៕
