អាស៊ាន
បាតុករមីយ៉ាន់ម៉ាបន្តតវ៉ាថ្ងៃទី ៤ ទោះមានការចាប់ខ្លួន និងបង្រ្កាប
បាតុករគាំទ្រអ្នកស្រី អ៊ុងសាន ស៊ូជី បន្តប្រមូលផ្តុំគ្នាតវ៉ាបើទោះជាមានការចាប់ខ្លួននិងបង្រ្កាប ពីប៉ូលីសមីយ៉ាន់ម៉ា ។ នេះបើតាមសេចក្តីរាយការណ៍របស់សារព័ត៌មានអង់គ្លេស BBC ចុះ ផ្សាយនៅថ្ងៃទី១០ ខែកុម្ភៈ ។
រូបភាព បាតុកម្មនៅមីយ៉ាន់ម៉ា
បាតុករបានប្រមូលផ្តុំគ្នាតវ៉ាប្រឆាំងនឹងរបបដឹកនាំយោធាចាប់តាំងពីថ្ងៃទី៦ ខែកុម្ភៈ នៅក្នុង ទីក្រុងធំៗ ដូចជា យ៉ាងហ្គូន (Yangon) ម៉ាន់ដាឡាយ (Mandalay) និងរដ្ឋធានី ណៃពិដរ (Naypyidaw) ។ បើទោះជាបាតុកម្មអហិង្សា តែប៉ូលីសមីយ៉ាន់ម៉ា បានប្រើកាណុងបាញ់ទឹក បាញ់ស្រោចដើម្បីបំបែកហ្វូងបាតុករ ចាប់ខ្លួនបាតុករ និងបាញ់គ្រាប់កម្លាំងជ័រទៅលើហ្វូង បាតុករផងដែរ ។ របបយោធាក៏បានចេញច្បាប់អាជ្ញាសឹកដោយហាមប្រាមមិនឱ្យពលរដ្ឋ មីយ៉ាន់ម៉ា ប្រមូលផ្តុំគ្នាចាប់ពី ៤ នាក់ឡើងទៅផងដែរ ។ ទោះជាយ៉ាងណា ព្រឹត្តិការណ៍ទាំង អស់នេះ មិនអាចបញ្ឈប់សកម្មភាពតវ៉ារបស់បាតុករដែលកំពុងស្រេកឃ្លានសិទ្ធិសេរីភាព និងប្រជាធិបតេយ្យបាននោះទេ ។
បាតុករនៅតែបន្តទាមទារឱ្យដោះលែងអ្នកស្រី អ៊ុងសាន ស៊ូជី និងអ្នកទោសនយោបាយដទៃ ទៀត និងស្តារលទ្ធិប្រជាធិបតេយ្យឡើងវិញ ។ ពួកគេចាត់ទុកការធ្វើរដ្ឋប្រហារក្តោបក្តាប់ អំណាចជាថ្មីរបស់ក្រុមយោធា គឺជាការប្រមាថមើលងាយទៅលើឆន្ទៈរបស់ប្រជាពលរដ្ឋ មីយ៉ាន់ម៉ា ។
គួរបញ្ជាក់ថា គណបក្សសម្ព័ន្ធដើម្បីលទ្ធិប្រជាធិបតេយ្យ (NLD) របស់អ្នកស្រី អ៊ុងសាន ស៊ូជី បានឈ្នះឆ្នោតដឹកនាំប្រទេសរយៈពេល ៥ ឆ្នាំបន្តទៀត កាលពីខែវិច្ឆិកា ឆ្នាំ ២០២០ ប៉ុន្តែក្រុម យោធាបានច្រានចោលលទ្ធផលបោះឆ្នោត និងបានធ្វើរដ្ឋប្រហារកាលពីថ្ងៃទី ១ ខែកុម្ភៈ និងបានចាប់ឃុំខ្លួនអ្នកស្រី អ៊ុងសាន ស៊ូជី នៅក្នុងផ្ទះ ។ប្រទេសប្រជាធិបតេយ្យ រួមមានសហភាពអឺរ៉ុប សហរដ្ឋអាមេរិក និងអង្គការសហប្រជាជាតិ បានទាមទារឱ្យរបបយោធាភូមាស្តារប្រជាធិបតេយ្យឡើងវិញ និងថ្កោលទោសការប្រើអំពើ ហិង្សាលើហ្វូងបាតុករ ។
មេដឹកនាំយុវបាតុករម្នាក់បានថ្លែងប្រាប់សារព័ត៌មាន Reuters ថា ពួកគេមិនអាចនៅស្ងៀមបាន ទេ ។ លោកថា ប្រសិនបើមានការបង្ហូរឈាមទៅលើបាតុកម្មអហិង្សារបស់ពួកគេ នោះមនុស្ស ម្នានឹងចេញមកកាន់តែច្រើនថែមទៀត ។
បាតុករដែលចូលរួលធ្វើបាតុកម្មរួមមាន យុវជន កម្មកររោងចក្រកាត់ដេរ គ្រូបង្រៀន មន្រ្តី រាជការ និងគ្រូពេទ្យជាដើម ។ប្រទេសនូវែលសេឡង់បានប្រកាសផ្អាកទំនាក់ទំនងកម្រិតខ្ពស់ជាមួយមីយ៉ាន់ម៉ា ព្រមទាំង ដាក់បំរាមធ្វើដំណើរដល់មេដឹកនាំយោធា និងព្រមានកាត់ផ្តាច់កម្មវិធីជំនួយដល់របបយោធា ។ចំណែកសហរដ្ឋអាមរិកក៏កំពុងពិនិត្យឡើងវិញពីការផ្តល់ជំនួយដល់ប្រទេសមីយ៉ាន់ម៉ា និងបានព្រមានដែរថាអ្នកទទួលខុសត្រូវចំពោះរដ្ឋប្រហារនឹងត្រូវទទួលរងនូវផលវិបាក ៕
