កម្ពុជា
កម្មករប្រមូលសម្រាមនៅរាជធានីភ្នំពេញនឹងទទួលបានវ៉ាក់សាំងជំងឺកូវីដ-១៩ Sinopharm
កម្មករប្រមូលសម្រាមនៅរាជធានីភ្នំពេញ គឺជាមនុស្សអាទិភាពបន្តដែលត្រូវទទួលបានការ ចាក់វ៉ាក់សាំងបង្ការជំងឺកូវីដ-១៩ ពីក្រសួងសុខាភិបាលកម្ពុជា ។
សេចក្តីជូនដំណឹងរបស់ក្រសួងសុខាភិបាល លើកឡើងថា ការចាក់វ៉ាក់សាំងកូវីដ-១៩ Sinopharm ដែលជាជំនួយរបស់ប្រទេសចិន ត្រូវបានអនុញ្ញាតិឱ្យចាក់ជូនកម្មករប្រមូលសម្រាម នៅរាជធានីភ្នំពេញ បន្ថែមលើកក្រុមមនុស្សដែលជាបុគ្គលិកសុខាភិបាល កងកម្លាំងប៉ូលីសជាតិ និងអាជ្ញាធរជួរមុខ ដូចជាគណៈអភិបាលខេត្ត គណៈអភិបាលក្រុង/ស្រុក/ខណ្ឌ គណៈកម្មការ ភូមិ/ឃុំ/សង្កាត់ ។
ក្រសួងប្រកាសឱ្យពលរដ្ឋដែលជាកម្មករប្រមូលសម្រាមនៅរាជធានីភ្នំពេញ ដែលមានអាយុ ចាប់ពី ១៨ ដល់ ៥៩ ឆ្នាំ ទៅទទួលការចាក់វ៉ាក់សាំងដោយឈរលើគោលការណ៍ស្ម័គ្រចិត្ត ។
ក្រសួងប្រកាសថានឹងបន្តជូនដំណឹងដល់សាធារណជនក្នុងក្រុមអាយុពី ១៨ ដល់ ៥៩ ឆ្នាំ ផ្សេងទៀត ឱ្យមកទទួលវ៉ាក់សាំងកូវីដ-១៩ ដោយស្ម័គ្រចិត្តនៅពេលក្រោយៗទៀត ៕
