កម្ពុជា
ក្រសួងសុខាភិបាលកម្ពុជា អនុញ្ញាតឱ្យប្រើប្រាស់វ៉ាក់សាំងកូវីដ-១៩ ចំនួន ៣ ប្រភេទ
រហូតមកទល់ពេលនេះ មានវ៉ាក់សាំងជំងឺកូវីដ-១៩ ចំនួន ៣ ប្រភេទហើយដែលត្រូវបាន ក្រសួងសុខាភិបាលកម្ពុជាប្រកាសអនុញ្ញាតឱ្យប្រើប្រាស់ជាផ្លូវការ ។ វ៉ាក់សាំងទាំង ៣ ប្រភេទនោះ រួមមានវ៉ាក់សាំង SARS-CoV-2 (Sinopharm) វ៉ាក់សាំង Sinovac’s Covid-19 ផលិតដោយប្រទេសចិន និងវ៉ាក់សាំង AstraZeneca’s Covid-19 ផលិតដោយចក្រភព អង់គ្លេស ។
គួរបញ្ជាក់ថា វ៉ាក់សាំង SARS-CoV-2 Sinopharm ត្រូវបានក្រសួងសុខាភិបាលប្រកាស ឱ្យប្រើប្រាស់តាំងពីថ្ងៃទី៨ ខែកុម្ភៈ ។ ដោយឡែក វ៉ាក់សាំង Sinovac’s Covid-19 និងវ៉ាក់សាំង AstraZeneca’s Covid-19 ទើបត្រូវបានប្រកាសឱ្យប្រើប្រាស់ជាផ្លូវការនៅថ្ងៃទី១២ ខែកុម្ភៈ ។
សេចក្តីប្រកាសព័ត៌មានរបស់ក្រសួងសុខាភិបាលចុះថ្ងៃទី១២ ខែកុម្ភៈ បញ្ជាក់ថា វ៉ាក់សាំង Sinovac’s Covid-19 និងវ៉ាក់សាំង AstraZeneca’s Covid-19 ត្រូវបានប្រើប្រាស់ប្រកបដោយ សុវត្ថិភាពនៅក្នុងប្រទេសចិន និងចក្រភពអង់គ្លេស ព្រមទាំងបណ្តាប្រទេសមួយចំនួនក្នុង លក្ខខណ្ឌនៃការប្រើប្រាស់បន្ទាន់ (Emergency Use Authorization) ។
កាលពីថ្ងៃទី ៧ ខែកុម្ភៈ វ៉ាក់សំាង SARS-CoV-2 (Sinopharm) ចំនួន ៦០ ម៉ឺនដូសដែលជាជំនួយ របស់រដ្ឋាភិបាលចិនត្រូវបានបញ្ជូនមកដល់កម្ពុជា ក្នុងនោះ ៣០ ម៉ឺនដូសផ្តល់ទៅឱ្យក្រសួង សុខាភិបាល និង ៣០ ម៉ឺនដូសទៀត ប្រគល់ឱ្យក្រសួងការពារជាតិ ។ ចំណែកវ៉ាក់សាំងចំនួន ៤០ ម៉ឺនដូសផ្សេងទៀតដែលចិនបានសន្យាផ្តល់ឱ្យកម្ពុជានឹងបញ្ជូនមកជាបន្តបន្ទាប់នៅពេល ក្រោយទៀត ។
ក្រោយទទួលបានវ៉ាក់សាំងចំនួន ៦០ ម៉ឺនដូសពីប្រទេសចិន ក្រសួងសុខាភិបាល ក៏ដូចជា ក្រសួងការពារជាតិបានចាប់ផ្តើមយុទ្ធនាការចាក់វ៉ាក់សាំងចាប់ពីថ្ងៃទី ១០ ខែកុម្ភៈ ដល់ក្រុម បុគ្គលមានអាទិភាពដែលមានអាយុចាប់ពី ១៨ ដល់ ៥៩ ឆ្នាំ ។ លោកនាយករដ្ឋមន្រ្តី ហ៊ុន សែន ប្រកាសថាលោកមិនអាចទទួលការចាក់វ៉ាក់សាំងបានទេដោយសារវ័យរបស់លោក ។ ប៉ុន្តែលោកបានអនុញ្ញាតិឱ្យកូនៗមួយចំនួនរបស់លោកចូលរួមចាក់វ៉ាក់សាំងជំនួយរបស់ចិននេះ ។
យុទ្ធនាការចាក់វ៉ាក់សាំងធ្វើឡើងនៅតាមទីតាំង រួមមាន មន្ទីរពេទ្យកាល់ម៉ែត មន្ទីរពេទ្យព្រះ អង្គឌួង មន្ទីរពេទ្យមិត្តភាពខ្មែរ-សូវៀត មន្ទីរពេទ្យកុមារជាតិ និងមន្ទីរពេទ្យព្រះកេតុមាលា ៕
