តំបន់&អន្តរជាតិ
មេដឹកនាំកំពូលសាសនាថា អ៊ីរ៉ង់មិនប្តូរជំហរឱ្យអាមេរិក ដកទណ្ឌកម្មចេញពីអ៊ីរ៉ង់ជាមុននោះទេ
មេដឹកនាំកំពូលសាសនាអ៊ីរ៉ង់ លោក Ayatollah Ali Khamenei បានថ្លែងបញ្ជាក់ជំហរថា ប្រទេសអ៊ីរ៉ង់មិនចុះញ៉មនឹងសម្ពាធរបស់សហរដ្ឋអាមេរិកដើម្បីជាថ្នូរនឹងការដកទណ្ឌនោះទេ ។
លោក Ayatollah Ali Khamenei បានថ្លែងទៅកាន់ប្រជាជាតិរបស់ខ្លួនកាលពីថ្ងៃទី២១ ខែមីនា និងត្រូវបានផ្សព្វផ្សាយដោយសារព័ត៌មាន Aljazeera ថា សហរដ្ឋអាមេរិកបានបរាជ័យនៅក្នុង ការដាក់ទណ្ឌកម្មទៅលើប្រទេសអ៊ីស្លាមអ៊ីរ៉ង់តាំងពីក្នុងអាណត្តិរបស់អតីតប្រធានាធិបតី អាមេរិកលោក ដូណាល់ ត្រាំ មកម៉្លេះ ។
លោក Ayatollah Ali Khamenei បាននិយាយបែបចំអកដាក់អាមារិកថា លោក ដូណាល់ ត្រាំ បានបរាជ័យរួចហើយ និងបានធ្វើឱ្យអាមេរិកមានកេរ្តិ៍ឈ្មោះមិនសូវល្អទៀតផង ហើយថា សហរដ្ឋអាមេរិកត្រូវដឹងពីរឿងនេះ ។ លោកបន្ថែមថា ប្រសិនបើរដ្ឋបាលប្រធានាធិបតី លោក ចូ បៃដិន ចង់បន្តធ្វើដូចរដ្ឋបាលមុនដែរនោះ ពួកគេនឹងទទួលនូវបរាជ័យដូចគ្នា ។
កាលពីឆ្នាំ ២០១៨ លោក ដូណាល់ ត្រាំ បានដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ ឆ្នាំ ២០១៥ ដែលត្រូវបានរដ្ឋបាលលោក បារ៉ាក់ អូបាម៉ា បង្កើតឡើងជាមួយប្រទេសមួយចំនួន ផ្សេងទៀត រួមមាន អ៊ីរ៉ង បារាំង អង់គ្លេស អាល្លឺម៉ង់ រុស្សី និងចិន ។ លោក ដូណាល់ ត្រាំ ក៏បានដាក់ទណ្ឌកម្មសេដ្ឋកិច្ចជាថ្មីទៅលើប្រទេសអ៊ីរ៉ង់ដែលត្រូវបានរដ្ឋបាលលោក បារ៉ាក់ អូបាម៉ា បានដកចេញ ។
នៅមិនទាន់មានការឆ្លើយតបយ៉ាងណាពីភាគីអាមេរិកនៅឡើយចំពោះការលើកឡើងរបស់ មេដឹកនាំកំពូលសាសនាអ៊ីរ៉ង់នៅពេលនេះ ។
ប៉ុន្តេរដ្ឋាភិបាលលោក ចូ បៃដិន តែងបានអះអាងថា ដរាបណាអ៊ីរ៉ង់មិនវិលត្រឡប់មកអនុវត្ត តាមកិច្ចព្រមព្រៀងឆ្នាំ ២០១៥ ជាមុននោះទេ អាមេរិកនឹងមិនដកទណ្ឌកម្មចេញពីអ៊ីរ៉ង់នោះ ឡើយ ។ ប៉ុន្តែអ៊ីរ៉ង់បានទាមទារឱ្យអាមេរិកដកទណ្ឌកម្មជាមុនសិន មុននឹងនិយាយដល់រឿង កិច្ចព្រមព្រៀងដែលខ្លួនបានចុះកាលពឆ្នាំ ២០១៥ ។ អ៊ីរ៉ង់តែងចោទអាមេរិកថា មិនបានគោរព តាមស្មារតីនៃកិច្ចព្រមព្រៀងនោះទេ ។
លោក Ayatollah Ali Khamenei បញ្ជាក់ជាថ្មីថា អាមេរិកត្រូវដកទណ្ឌកម្មឱ្យអស់ចេញពីអ៊ីរ៉ង់ ជាមុនសិន ។
លោកក៏បានណែនាំដល់អ្នកនយោបាយអ៊ីរ៉ង់ឱ្យចេះដោះស្រាយការអភិវឌ្ឍន៍សេដ្ឋកិច្ចរបស់ អ៊ីរ៉ង់តាមរបៀបផ្សេងក្នុងពេលដែលអ៊ីរ៉ង់កំពុងទទួលរងនូវទណ្ឌកម្ម និងមិនត្រូវផ្សាភ្ជាប់រឿង ទណ្ឌកម្មទៅនឹងការអភិវឌ្ឍន៍សេដ្ឋកិច្ចនោះទេ ៕
