តំបន់&អន្តរជាតិ
បៃដិនហៅពូទីន ថា ឃាតកក្នុងរឿងជ្រែតជ្រែកការបោះឆ្នោតឆ្នាំ ២០២០ នៅអាមេរិក
ភាពតានតឹងរវាងរដ្ឋបាលប្រធានាធិបតីសហរដ្ឋអាមេរិក លោក ចូ បៃដិន កំពុងមានបន្ថែម ទៀត បន្ទាប់ទីភ្នាកងារសម្ងាត់អាមេរិកបានបញ្ចេញរបាយការណ៍កាលពីថ្ងៃទី១៦ ខែមីនា រកឃើញថា ប្រទេសរុស្សីបានជ្រែតជ្រែកចូលក្នុងកិច្ចការបោះឆ្នោតជ្រើសរើសប្រធានាធិបតីរវាងលោក ដូណាល់ ត្រាំ និងលោក ចូ បៃដិន កាលពីឆ្នាំ ២០២០ ។
របាយការណ៍ដែលត្រូវបានផ្សព្វផ្សាយដោយការិយាល័យនាយកនៃទីភ្នាក់ងារសម្ងាត់ជាតិអាមេរិក សន្និដ្ឋានថា ទីក្រុងមូស្គូបានព្យាយាមជ្រៀតជ្រែកចូលក្នុងការបោះឆ្នោតរបស់អាមេរិក ដោយព្យាយាមបំបាក់លោក ចូ បៃដិន និងជួយជំរុញដល់លោក ដូណាល់ ត្រាំ ។
របាយការណ៍ក៏បានសន្និដា្ននដែរថា ប្រធានាធិបតីរុស្សី លោក វ៉្លាឌីមៀ ពូទីន បានដឹង និង ប្រហែលជាបានដឹកនាំយុទ្ធនាការនេះទៀតផង ។
ឆ្លើយតបចំពោះរឿងនេះ សារព័ត៌មាន Aljazeera បានផ្សព្វផ្សាយដោយស្រង់សម្តីរបស់ លោក ចូ បៃដិន ដែលនិយាយថា លោក ពូទីន នឹងត្រូវបង់តំលៃចំពោះទង្វើរបស់រុស្សីមកលើការបោះ ឆ្នោតនៅអាមេរិកនេះ និងថា លោក ពូទីន នឹងទទួលផលវិបាកចំពោះរឿងនេះ ។
ទោះជាយ៉ាងណា លោក បៃដិន មិនបានពន្យល់បន្ថែមថាតើលោក ពូទីន នឹងត្រូវទទួលផល វិបាកបែបណានោះទេ ប៉ុន្តែមានសេចក្តីរាយការណ៍ថា សហរដ្ឋអាមេរិកគ្រោងដាក់ទណ្ឌកម្ម បន្ថែមទៅលើប្រទេសរុស្សីក្នុងពេលឆាប់ៗខាងមុខ ។
គួររម្លឹកថា កាលពីដើមខែនេះ សហរដ្ឋអាមេរិកបានដាក់ទណ្ឌកម្មលើមន្ត្រីជាន់ខ្ពស់រុស្ស៊ីចំនួន ៤ រូបរួចមកហើយ ជុំវិញការបំពុល និងការដាក់ពន្ធនាគារអ្នកនយោបាយប្រឆាំងរុស្សីលោក Alexey Navalny ។
កាលពីថ្ងៃទី១៧ ខែមីនា ក្រសួងពាណិជ្ជកម្មអាមេរិកបាននិយាយថាខ្លួនក៏កំពុងរឹតបន្តឹង ការដាក់ទណ្ឌកម្មលើការនាំចេញមួយចំនួនទៅកាន់ប្រទេសរុស្ស៊ីផងដែរ ដើម្បីឆ្លើយតបទៅនឹង ការពុល កាលពីខែមីនា ឆ្នាំ ២០១៨ ទៅលើអតីតភ្នាក់ងារចារកម្មយោធារុស្ស៊ីលោក Sergei Skripal និងកូនស្រីរបស់គាត់នៅទីក្រុង Salisbury ប្រទេសអង់គ្លេស ដោយសារធាតុពុលម្យ៉ាង ហៅថាភ្នាក់ងារសរសៃប្រសាទ ឬ Nerve Agent ផលិតដោយយោធារុស្សី ។
ទោះជាយ៉ាងណា ទីក្រុងមូស្គូ បានច្រើនចោលចំពោះការចោទប្រកាន់ថាខ្លួនបានពាក់ព័ន្ធ ទៅនឹងការវាយប្រហារក្នុងករណីទាំងពីរនេះ ។
ជាការឆ្លើយតបនឹងរបាយការណ៍របស់ទីភ្នាកងារសម្ងាត់ជាតិអាមេរិក ទីក្រុងមូស្គូ កាលពីថ្ងៃទី១៧ ខែមីនា និយាយថា របាយការណ៍នេះគ្មានមូលដ្ឋាន និងភស្តុតាងជាក់លាក់ នោះទេ ។ ទីក្រុងមូស្គូ ក៏បានព្រមានដែរថា រាល់ការដាក់ទណ្ឌកម្មបន្ថែមលើប្រទេសរុស្សីនឹង ធ្វើឱ្យប៉ះពាល់ដល់ទំនាក់ទំនងរវាងរុស្សី និងអាមេរិក ៕
