តំបន់&អន្តរជាតិ
លោក បៃដិន៖ ចិនត្រូវប្រឈមផលវិបាក ដោយការរំលោភសិទ្ធិមនុស្ស
ប្រធានាធិបតីសហរដ្ឋអាមេរិក លោក ចូ បៃដិន (Joe Biden) ថ្លែងថាប្រទេសចិននឹងត្រូវប្រឈម មុខនឹងការផលវិបាកដោយសារតែការរំលោភបំពានលើសិទ្ធិមនុស្សរបស់ប្រទេសនេះ ។
លោក បៃដិន ថ្លែងបែបនេះ ខណៈឆ្លើយតបទៅនឹងសំណួរនៅក្នុងព្រឹត្តិការណ៍មួយ ដោយមានផ្សាយតាមទូរទស្សន៍ផងដែរ ។
នេះគឺជាលើកទី ១ ដែលគេបានឮប្រធានាធិបតីអាមេរិករូបនេះថ្លែងអំពីបញ្ហារំលោភសិទ្ធិ មនុស្សរបស់ប្រទេសចិនជាសាធារណៈចាប់តាំងពីលោកបានចូលកាន់តំណែងជាប្រធានាធិបតីអាមេរិកចាប់ពីថ្ងៃទី ២០ ខែមករា មក ។
លោក បៃដិន បានថ្លែងបញ្ជាក់ថា ប្រទេសចិននឹងសងនូវតំលៃនៃការរំលោភសិទ្ធិមនុស្ស របស់ខ្លួន ដែលនេះលោក បៃដិន ចង់សង្កត់ធ្ងន់ទៅលើការរំលោភសិទ្ធិមនុស្ស និងការចាប់ ឃុំឃាំងជនជាតិអ៊ុយហ្គួរកាន់សាសនាអ៊ីស្លាម នៅក្នុងជំរំដោយអាជ្ញាធរចិន ។
លោកបន្ថែមថា សហរដ្ឋអាមេរិកនឹងវាយតម្លៃឡើងវិញនូវតួនាទីរបស់ខ្លួន នៅលើពិភពលោក ក្នុងការនិយាយពីសិទ្ធិមនុស្ស ហើយថាលោកនឹងធ្វើការជាមួយសហគមន៍អន្តរជាតិដើម្បីជំរុញ ឱ្យប្រទេសចិនគោរពសិទ្ធិរបស់ជនជាតិអ៊ុយហ្គួរ ។
សារព័ត៌មាន CNA បានស្រង់សម្តីលោក ចូ បៃដិន ដោយបានកត់សម្គាល់ថា «ប្រទេសចិន កំពុងព្យាយាមយ៉ាងខ្លាំងដើម្បីក្លាយជាមេដឹកនាំពិភពលោក ហើយដើម្បីអាចធ្វើដូច្នេះបាន ពួកគេត្រូវតែទទួលបានទំនុកចិត្តពីប្រទេសដទៃទៀត» ។
លោកបន្ថែមថា ដរាបណាប្រទេសចិនចូលរួមក្នុងសកម្មភាពដែលផ្ទុយនឹងសិទ្ធិមនុស្សជា មូលដ្ឋាន វានឹងពិបាកសម្រាប់ពួកគេក្នុងការក្លាយជាមេដឹកនាំពិភពលោក ។
នៅមិនទាន់មានការឆ្លើយតបបែបណាពីរដ្ឋាភិបាលចិននៅឡើយទេចំពោះការលើកឡើង របស់លោក បៃដិន នេះ ។
គេនៅចាំបានថា នៅក្នុងកិច្ចសន្ទនាតាមទូរស័ព្ទរវាងលោក បៃដិន និងប្រធានាធិបតីចិន លោក ស៊ី ជីនពីន កាលពីពេលថ្មីៗ នេះ លោក Biden បានសង្កត់ធ្ងន់លើអាទិភាពរបស់ សហរដ្ឋអាមេរិកក្នុងការថែរក្សាតំបន់ ឥណ្ឌូ-ប៉ាស៊ីហ្វិក មួយប្រកបដោយភាពសេរី និងបើក ចំហ ។ តំបន់ ឥណ្ឌូ-ប៉ាស៊ីហ្វិក នេះហើយ ដែលជាទីតាំងយុទ្ធសាស្រ្តប្រទាញប្រទង់អំណាច គ្នារវាងចិន និងសហរដ្ឋអាមេរិក ។
ក្រៅពីនោះ លោក បៃដិន ក៏បានប្រាប់លោក ស៊ី ជីនពីន អំពីការបារម្ភរបស់សហរដ្ឋអាមេរិក ទៅលើការអនុវត្តពាណិជ្ជកម្មមិនត្រឹមត្រូវ និងបញ្ហាសិទ្ធិមនុស្ស ដូចជាករណីបង្រ្កាបនៅទីក្រុង ហុងកុង ការឃុំឃាំងជនជាតិអ៊ុយហ្គួរនៅខេត្តស៊ីងជាំង និងការដាក់សម្ពាធរបស់ចិនទៅលើ កោះតៃវ៉ាន់ ជាដើម ៕
