តំបន់&អន្តរជាតិ
នៅបង់ក្លាដែសសេះជាង ២០ ក្បាលងាប់ព្រោះអត់អាហារដោយសារជំងឺកូវីដ-១៩
ក្នុងរយៈពេលតែ ១ ខែ មានសេះជាង ២០ ក្បាលបានងាប់ដោយសារតែអត់អាហារនៅ ក្នុងតំបន់ទេសចរណ៍ដ៏មានប្រជាប្រិយបំផុតមួយនៅក្នុងប្រទេសបង់ក្លាដែស ។ នេះបើតាមការ ឱ្យដឹងរបស់ម្ចាស់ចិញ្ចឹមសេះកាលពីថ្ងៃទី៣០ ឧសភា ហើយត្រូវបានទីភ្នាក់ងារសារព័ត៌មាន AFP ផ្សព្វផ្សាយនៅព្រឹកថ្ងៃទី៣១ ខែឧភសា ។
ការរាតត្បាតនៃជំងឺកូវីដ-១៩ កំពុងធ្វើឱ្យប៉ះពាល់ធ្ងន់ធ្ងរដល់វិស័យទេសចរណ៍របស់ប្រទេស បង់ក្លាដែស ។ បង់ក្លាដែសដែលមានប្រជាជនចំនួន ១៦៨ លាននាក់កំពុងហែលឆ្លងកាត់ រលកថ្មីនៃជំងឺកូវីដ-១៩ ។
ម្ចាស់ចិញ្ចឹមសេះបានឱ្យដឹងថា ពួកគេកំពុងជួបប្រទះការលំបាកក្នុងជីវភាពដើម្បីផ្គត់ផ្គង់ ចំណីអាហារដល់សេះរបស់ខ្លួន ដោយហេតុតែវិស័យទេសចរណ៍ធ្លាក់ចុះ ។ ជាទូទៅ ពួកគេរក ចំណូលបានដោយយកសេះរបស់ខ្លួនទៅដឹកភ្ញៀវទេសចរណ៍ជិះលេងកំសាន្តនៅតាមឆ្នេរ សមុទ្រ ខក់ បាសា (Cox’s Bazar) ដែលជាឆ្នេរវែងបំផុតមួយនៅលើពិភពលោក ។
អ្នកស្រី ហ្វារីដា បេហ្គូម (Farida Begum) ដែលជាអ្នកនាំពាក្យ នៃសមាគមម្ចាស់សេះ ខក់ បាសា ឱ្យដឹងថា «ចាប់តាំងពីពេលជំងឺកូវីដ–១៩ វាយលុកកាន់តែខ្លាំង ចំនួនភ្ញៀវ ទេសចរណ៍បានធ្លាក់ចុះយ៉ាងខ្លាំង ។ ពួកយើងកំពុងជួបប្រទះការខ្វះខាតក្នុងជីវភាពប្រចាំថ្ងៃ ។ តើយើងអាចមានលទ្ធភាពផ្គត់ផ្គង់ចំណីអាហារដល់សត្វសេះទាំងអស់នោះដូចម្តេចបាន?»
អ្នកស្រីនិយាយថា យ៉ាងហោចណាស់ក៏មានសេះចំនួន ២១ ក្បាលដែរក្នុងចំណោមសេះសរុប ចំនួន ៩០ ក្បាលដែលសមាគមម្ចាស់សេះ ខក់ បាសា មានសម្រាប់យកទៅដឹកភ្ញៀវ ទេសចរណ៍ជិះកំសាន្ត ។ អ្នកស្រីថា ចំណែកសេះដែលនៅរស់ផ្សេងទៀត បច្ចុប្បន្នក៏កំពុងប្រ ឈមទៅនឹងការខ្វះចំណីអាហារ ដែលកំពុងធ្វើឱ្យរូបរាងរបស់ពួកវាស្គមស្គាំង ។
កាលពីឆ្នាំទៅ នៅពេលដែលមានការបិទខ្ទប់ដោយសារជំងឺកូវីដ-១៩ មានសេះចំនួន ៤១ ក្បាលបានងាប់ ក្នុងនោះក៏មានសេះផ្ទាល់ខ្លួនរបស់អ្នកស្រី បេហ្គូម ចំនួន ៨ ក្បាលផងដែរ ។
ដោយសារតែគ្មានលទ្ធភាពផ្គត់ផ្គង់ចំណីដល់សេះរបស់ខ្លួនដូចមុនបាន ម្ចាស់សេះមួយចំនូន បានព្រលែងសេះរបស់ខ្លួនដើរស្វែងរកចំណីដោយខ្លួនឯង ដោយសង្ឃឹមថាសេះរបស់ពួកគេ អាចរស់រានបានដោយសារការស៊ីស្មៅ ឬចំណីផ្សេងៗដែលពួកវាអាចរកបានដោយខ្លួនឯង ។
ម្ចាស់សេះនិយាយថា ពួកគេកំពុងជួបប្រទះការលំបាកក្នុងការផ្គត់ផ្គង់ជីវភាពគ្រួសាររបស់ខ្លួន ។ ក្នុងពេលជាមួយគ្នា ក៏មានអ្នកខ្លះទៀតបានខ្ចីលុយគេមកដើម្បីដោះស្រាយបញ្ហាជីវភាព និងត្រូវបានម្ចាស់បំណុលមកទារសឹងតែរាល់សប្តាហ៍ ។
អ្នកស្រី បេហ្គូម ដែលកំពុងជំពាក់បំណុលគេចំនួន ១.២០០ ដុល្លារអាមេរិកបានត្អូញត្អែរថា ម្ចាស់បំណុលបានមកផ្ទះរបស់អ្នកស្រីស្ទើរតែជារៀងរាល់សប្តាហ៍ដើម្បីទារបំណុល ប៉ុន្តែអ្នក ស្រីថា គ្មានលទ្ធភាពសងបំណុលនៅពេលនេះនោះទេ លុះណាតែមានអ្នកទេសចរណ៍មក ទៀត ទើបអ្នកស្រីអាចរកប្រាក់ចំណូល និងមានលទ្ធភាពសងបំណុលវិញ ។
ជាទូទៅ មានភ្ញៀវទេសចរណ៍ប្រមាណ ២ លាននាក់មកទស្សនាតំបន់ឆ្នេរ ខក់ បាសា ជារៀង រាល់ឆ្នាំ ។
ម្ចាស់សេះម្នាក់ទៀតឈ្មោះ សាវ៉ា អាសាម (Sarwar Azam) និយាយថា សេះរបស់គាត់មួយ ក្បាលបានងាប់កាលពីសប្តាហ៍មុន ហើយសេះមួយក្បាលទៀតក៏កំពុងប្រឈមនឹងការអត់ ចំណីអាហារផងដែរ ។
ចំណែកលោក នីសាន អាសាន (Nishan Ahsan) ដែលជាម្ចាស់សេះមួយរូបទៀត បានឱ្យដឹងថា កាលពីពេលមានអ្នកទេសចរណ៍មកលេងច្រើន សេះមួយក្បាលអាចរកលុយបានរហូតដល់ ២៣ ដុល្លារក្នុងមួយថ្ងៃ ។ លោកថា មួយចំណែកនៃប្រាក់ចំណូល ត្រូវបានប្រើប្រាស់ដើម្បីទិញ ចំណីអាហារល្អៗសម្រាប់សេះ ។ ប៉ុន្តែនៅពេលដែលគ្មានអ្នកទេសចរណ៍ ម្ចាស់សេះគ្មាន ចំណូលនោះទេ ៕
