តំបន់&អន្តរជាតិ
យោធាមីយ៉ាន់ម៉ាបាញ់សម្លាប់មនុស្ស ៧ នាក់បន្ថែមទៀតនៅថ្ងៃទី១១ មីនា
របបយោធាមីយ៉ាន់ម៉ានៅថ្ងៃទី១១ ខែមីនា នេះបានបាញ់សម្លាប់បាតុករចំនួន ៧ នាក់ទៀត បើទោះជាក្រុមប្រឹក្សាសន្តិសុខអង្គការសហប្រជាជាតិទើបតែបានចេញមុខថ្កោលទោសអំពើ ហិង្សាប្រព្រឹត្តដោយក្រុមយោធាក្តី ។
សារព័ត៌មាន Aljazeera បានរាយការណ៍នៅថ្ងៃទី១១ មីនា នេះថា ប៉ូលីសបានបើកការបាញ់ ប្រហារទៅអ្នកតវ៉ាដែលបានបណ្តាលឱ្យមនុស្ស ៦ នាក់ស្លាប់នៅកណ្តាលទីក្រុង Myaing និង ម្នាក់ទៀតស្លាប់នៅខណ្ឌ North Dagon នៃទីក្រុងយ៉ាងហ្គូន ដែលជាទីក្រុងធំបំផុតរបស់ មីយ៉ាន់ម៉ា ។
បើតាមសមាគមផ្តល់ជំនួយសម្រាប់អ្នកទោសនយោបាយ បានឱ្យដឹងថា រហូតទល់ពេលនេះ មានមនុស្សជាង ៦០ នាក់ត្រូវបានសម្លាប់ និងប្រមាណ ២.០០០ នាក់ផ្សេងទៀតត្រូវបានចាប់ ខ្លួនដោយក្រុមយោធាចាប់តាំងពីមានរដ្ឋប្រហារនៅថ្ងៃទី១ ខែកុម្ភៈ មក ។
ការបាញ់ប្រហារទៅលើអ្នកតវ៉ា កើតឡើងក្នុងថ្ងៃតែមួយដែលរបបយោធាបានចោទប្រកាន់ អ្នកស្រី អ៊ុងសាន ស៊ូជី និងមន្រ្តីជាន់ខ្ពស់ដទៃទៀតនៃគណបក្សសម្ព័ន្ធដើម្បីលទ្ធិ ប្រជាធិបតេយ្យ NLD ពាក់ព័ន្ធនឹងអំពើពុករលួយ ការទទួលសំណូក ។ល។
ក្រុមប្រឹក្សាសន្តិសុខអង្គការសហប្រជាជាតិនៅថ្ងៃទី១១ ខែមីនា នេះ អំពាវនាវជាឯកច្ឆន្ទឱ្យ បញ្ចប់អំពើរដ្ឋប្រហារយោធានៅប្រទេសមីយ៉ាន់ម៉ា និងថ្កោលទោសយ៉ាងខ្លាំងចំពោះអំពើ ហិង្សាប្រឆាំងនឹងក្រុមអ្នកតវ៉ាដោយសន្តិវិធី និងបានអំពាវនាវឱ្យក្រុមយោធាមានការ អត់ធ្មត់បំផុត ។ ប្រទេសចិនក៏បានចូលរួមនៅក្នុងការថ្កោលទោសនេះផងដែរ ។ ទោះជាយ៉ាងណា ក្រុមយោធាមីយ៉ាន់ម៉ា ហាក់មិនទាន់ឃើញបន្ធូរដៃទៅលើក្រុមបាតុករ នៅឡើយ ៕
