តំបន់&អន្តរជាតិ
នូវែលសេឡង់ ផ្អាកទំនាក់ទំនងកំរិតខ្ពស់ជាមួយមីយ៉ាន់ម៉ា
នាយករដ្ឋមន្រ្តីប្រទេស New Zealand អ្នកស្រី Jacinda Ardern បានប្រកាសនៅថ្ងៃទី៩ ខែកុម្ភៈ នេះថាប្រទេសរបស់អ្នកស្រីនឹងផ្អាករាល់ទំនាក់ទំនងកំរិតខ្ពស់ទាំងអស់ជាមួយប្រទេស មីយ៉ាន់ម៉ាដែលដឹកនាំដោយក្រុមយោធា ។
The Myanmar community was out in force to hear speakers like Foreign Minister Nanaia Mahuta denounce the actions of the military in the country, after it seized power last week. ROBERT KITCHIN/Stuff
សេចក្តីរាយការណ៍របស់សារព័ត៌មាន CNA ឱ្យដឹងថា នាយករដ្ឋមន្រ្តីស្រីរូបនេះ ក៏បានដាក់ បំរាមធ្វើដំណើរទៅលើក្រុមមេដឹកនាំយោធាមីយ៉ាន់ម៉ាផងដែរ ។
ប្រតិកម្មរបស់នាយករដ្ឋមន្រ្តី New Zealand នេះគឺជាការឆ្លើយតបទៅនឹងក្រុមយោធាមីយ៉ាន់ម៉ា ដែលបានធ្វើរដ្ឋប្រហារក្តោបក្តាប់អំណាចនិងបានចាប់ឃុំខ្លួនអ្នកស្រី អ៊ុងសាន ស៊ូជី និងអ្នក ទោសនយោបាយជាច្រើនរូបផ្សេងទៀតរបស់គណបក្សសម្ព័ន្ធដើម្បីលទ្ធិប្រជាធិបតេយ្យ NLD ។
អ្នកស្រី Jacinda Arden បានថ្លែងនាសន្និសីទកាសែតមួយថា ប្រទេស New Zealand ក៏នឹងធានា ថាកម្មវិធីជំនួយរបស់ខ្លួននឹងមិនរាប់បញ្ចូលគម្រោងដែលត្រូវបានផ្តល់ជូន ឬទទួលបាន អត្ថប្រយោជន៍ដល់រដ្ឋាភិបាលយោធានោះទេ ។
អ្នកស្រីបញ្ជាក់ថា ៖ « សារដ៏មុតមាំរបស់យើងគឺយើងនឹងធ្វើអ្វីដែលយើងអាចធ្វើបានពី ប្រទេស New Zealand ហើយរឿងមួយដែលយើងនឹងធ្វើគឺត្រូវបញ្ឈប់ការសន្ទនាថ្នាក់ខ្ពស់នោះ ហើយត្រូវប្រាកដថាថវិកាណាមួយដែលយើងបានដាក់នៅប្រទេសមីយ៉ាន់ម៉ានឹងមិនគាំទ្រដល់របបយោធានោះឡើយ» ។
គួរបញ្ជាក់ថា ចន្លោះពីឆ្នាំ ២០១៨ ដល់ឆ្នាំ ២០២១ នេះ កម្មវិធីជំនួយរបស់ប្រទេស New Zealand ដែលផ្តល់ដល់ប្រទេសមីយ៉ាន់ម៉ាមានប្រមាណ ៣០ លានដុល្លារអាមេរិក ។
នៅក្នុងសេចក្តីថ្លែងការណ៍ដាច់ដោយឡែកផ្សេងទៀត រដ្ឋមន្រ្តីក្រសួងការបរទេស New Zealand អ្នកស្រី Nanaia Mahuta បានប្រកាសថា ប្រទេស New Zealand មិនទទួលស្គាល់ភាព ស្របច្បាប់របស់រដ្ឋាភិបាលដែលដឹកនាំដោយយោធានោះទេ ។ អ្នកស្រីក៏បានអំពាវនាវឱ្យ យោធាដោះលែងមេដឹកនាំនយោបាយដែលជាប់ឃុំទាំងអស់ និងស្តារច្បាប់ស៊ីវិលឡើងវិញ ៕
