តំបន់&អន្តរជាតិ
ហ្វីលីពីន ត្រៀមចល័តកងទ័ពទៅកាន់សមុទ្រចិនខាងត្បូង ក្នុងពេលមានបញ្ហាជាមួយចិន
ប្រធានាធិបតីហ្វីលីពីនលោក Rodrigo Duterte និយាយថា លោកមានឆន្ទៈក្នុងការបញ្ជូននាវា យោធាហ្វីលីពីនទៅកាន់សមុទ្រចិនខាងត្បូងដើម្បីការពារដែនទឹកដែលហ្វីលីពីនអះអាងថាជា អធិបតេយ្យភាពរបស់ខ្លួន ។
ទីភ្នាក់ងារព័ត៌មាន AFP បានផ្សាយនៅថ្ងៃទី២០ ខែមេសា ដោយស្រង់សម្តីរបស់លោក Rodrigo Duterte ដែលបានលើកឡើងអំពីតំបន់ដែនទឹកដែលកំពុងមានជម្លោះនោះថា «ឥឡូវខ្ញុំមិនចាប់អារម្មណ៍ច្រើនក្នុងការនេសាទទេ ។ ខ្ញុំមិនគិតថាមានត្រីគ្រប់គ្រាន់ដើម្បី ឈ្លោះប្រកែកគ្នាទេ ។ ប៉ុន្តែនៅពេលដែលយើងចាប់ផ្តើមរុករករ៉ែ នៅពេលដែលយើង ចាប់ផ្តើមទទួលបានអ្វីក៏ដោយនៅក្នុងសមុទ្រចិនខាងត្បូង ប្រេងរបស់យើង នៅពេលនោះ ខ្ញុំនឹងបញ្ជូននាវាទៅទីនោះដើម្បីបញ្ជាក់ពីការទាមទាររបស់យើង» ។
កន្លងទៅ ប្រធានាធិបតីហ្វីលីពីន ត្រូវបានគេមើលឃើញថា ហាក់មានភាពទន់ភ្លន់ជាមួយ ប្រទេសចិននៅក្នុងជម្លោះនៅសមុទ្រចិនខាងត្បូង ។ ភាពទន់ភ្លន់របស់លោកចំពោះប្រទេស ចិននេះ បង្ហាញថាលោកហាក់មានភាព ស្ទាក់ស្ទើរនៅក្នុងការប្រឈមជាមួយប្រទេសចិន ប្រឆាំងទៅនឹងសកម្មភាពរបស់ចិននៅសមុទ្រចិនខាងត្បូង ជាពិសេសសកម្មភាពរបស់ ចិននៅលើដែនទឹកដែលហ្វីលីពីនចាត់ទុកថាជាដែនអធិបតេយ្យភាពរបស់ខ្លួន ។
ទោះជាយ៉ាងណា ភាពតានតឹងជាមួយប្រទេសចិនបានកើនឡើងជាថ្មីទៀតក្នុងរយៈពេល ចុងក្រោយ នៅពេលដែលហ្វីលីពីនរកឃើញថាមាននាវាចិនរាប់សិបគ្រឿងចតនៅទីតាំងថ្ម ប្រប្រះទឹក នៃប្រជុំកោះ Spratly ដែលហ្វីលីពីន ប្រទេសចិន និងប្រទេសមួយចំនួនទៀតកំពុង ទាមទារអធិបតេយ្យភាព ។
ហ្វីលីពីននិយាយថានាវាទាំងនោះជានាវារបស់កងទ័ពចិន និងបានទាមទារឱ្យទីក្រុង ប៉េកាំងដកនាវាទាំងនោះចេញពីតំបន់ ប៉ុន្តែចិនបដិសេធមិនព្រមដកចេញតាមការទាមទារ ហ្វីលីពីន ហើយនិយាយថា នាវាទាំងនោះគ្រាន់តែជាទូកនេសាទរបស់ចិនប៉ុណ្ណោះ ។
នៅក្នុងករណីនេះ កន្លងទៅសហរដ្ឋអាមេរិកបានបង្ហាញការគាំទ្រចំពោះការទាមទាររបស់ ហ្វីលីពីន និងបានអំពាវនាវឱ្យទីក្រុងប៉េកាំងនាំយកនាវាចិនចេញពីតំបន់នោះ ។
ប្រទេសដែលកំពុងមានជម្លោះដែនទឹកនៅសមុទ្រចិនខាងត្បូងជាមួយប្រទេសចិន រួមមាន តៃវ៉ាន់ ហ្វីលីពីន ប្រ៊ុយណេ ម៉ាឡេស៊ី និងវៀតណាម ។ ប្រទេសចិនបានប្រកាស អធិបតេយ្យភាពរបស់ខ្លួនទៅលើដែនទឹកស្ទើរតែទាំងអស់នៃសមុទ្រចិនខាងត្បូង ដែល គេជឿថាមានសម្បត្តិធនធានធម្មជាតិដ៏ច្រើនសន្ធឹកសន្ធាប់នៅទីនោះ ៕
