តំបន់&អន្តរជាតិ
នាយករដ្ឋមន្រ្តីថៃបាញ់ទឹកសំអាតដៃលើអ្នកកាសែត ក្រោយសួរសំណួរ ដែលលោកមិនសប្បាយចិត្ត
នាយករដ្ឋមន្រ្តីថៃ លោក ប្រាយុទ្ធ ចាន់អូចា នៅថ្ងៃទី១០ ខែមីនា នេះបានយកទឹកបាញ់សំអាត ដៃការពារជំងឺកូវីដ-១៩ បាញ់ទៅលើអ្នកកាសែតនៅក្នុងសន្និសីទសារព័ត៌មានមួយ ក្រោយពី អ្នកកាសែតសួរសំណួរដែលលោកមិនសប្បាយចិត្ត ។ នេះបើតាមការផ្សាយរបស់សារព័ត៌មាន BBC នៅថ្ងៃនេះ ។
ប្រតិកម្មជាកាយវិការតបរបស់លោក ចាន់អូចា ទៅលើអ្នកកាសែតនៅពេលលោកត្រូវបានអ្នក កាសែតសួរអំពីការរុះរើគណរដ្ឋមន្រ្តី នៃរដ្ឋាភិបាលរបស់លោក ។ លោកមិនបានឆ្លើយសំណួរ នោះទេ ស្រាប់តែលោកចាប់យកដបទឹកសំអាតដៃ ដើរបាញ់ទៅលើអ្នកកាសែតដែលកំពុងនៅ ពីមុខលោក ។
លោក ចាន់អូចា បានឡើងកាន់អំណាចនៅប្រទេសថៃតាំងពីក្រោយរដ្ឋប្រហារយោធានៅឆ្នាំ ២០១៤ ។ លោកក៏ត្រូវបានពលរដ្ឋថៃធ្វើបាតុកម្មទាមទារឱ្យចាកចេញពីតំណែងរហូតមកទល់ ពេលបច្ចុប្បន្ន ។
នេះមិនមែនជារឿងថ្មីទេ ដែលលោកប្រាយុទ្ធ ចាន់អូចា បានបង្ហាញកាយវិការខឹងសម្បារ ជាមួយអ្នកកាសែត ។ កន្លងទៅ លោកធ្លាប់យកដៃទៅទះតិចៗលើក្បាល និងទាញស្លឹក ត្រចៀកអ្នកកាសែតម្នាក់ផងដែរ ៕
