តំបន់&អន្តរជាតិ
អាមេរិកសារភាពថា ទាក់ទងកូរ៉េខាងជើង ប៉ុន្តែ កូរ៉េខាងជើងព្រមានថា កុំចង់បង្ករឿង
រដ្ឋបាលប្រធានាធិបតីអាមេរិក លោក ចូ បៃដិន សារភាពជាសាធារណៈថា បានទាក់ទងទៅ កាន់កូរ៉េខាងជើង ចាប់តាំងពីពាក់កណ្តាលខែកុម្ភៈ ឆ្នាំ ២០២១ មក ប៉ុន្តែមិនមានការឆ្លើយតប ពីភាគីកូរ៉េខាងជើងរហូតមកទល់ពេលនេះ ។
សារព័ត៌មាន Reuters បានចេញផ្សាយនៅព្រឹកថ្ងៃទី១៦ ខែមីនា ដោយស្រង់សម្តីអ្នកនាំពាក្យ សេតវិមានសហរដ្ឋអាមេរិក អ្នកស្រី Jen Psaki ដែលបានថ្លែងប្រាប់អ្នកកាសែតថា មន្រ្តីអាមេរិក បានទាក់ទងទៅកាន់កូរ៉េខាងជើងតាមរយៈបណ្តាញមួយចំនួនចាប់តាំងពីលោក បៃដិន ចូលកាន់តំណែងដើម្បីឱ្យមានការកិច្ចសន្ទនារវាងប្រទេសទាំងពីរ ។
អ្នកស្រី Jen Psaki និយាយថា «គោលដៅរបស់យើងគឺកាត់បន្ថយហានិភ័យនៃការកើនឡើង ភាពតានតឹង ។ ប៉ុន្តែមកដល់ពេលនេះ យើងមិនទាន់ទទួលបានការឆ្លើយតបណាមួយនៅ ឡើយទេ» ។
អ្នកស្រីមិនបានបញ្ជាក់ប្រភេទនៃការកើនឡើងភាពតានតឹងដែលសហរដ្ឋអាមេរិកបារម្ភនោះទេ ប៉ុន្តែគេដឹងថា កូរ៉េខាងជើងបានបោះបង់ការចរចាជាមួយអាមេរិកតាំងពីក្នុងរដ្ឋបាលរបស់ អតីតប្រធានាធិបតីអាមេរិក ដូណាល់ ត្រាំ ដែលធ្លាប់បានជួបចរចរគ្នាចំនួន ៣ លើក តែមិន បានជោគជ័យ ។ កូរ៉េខាងជើងបានសាកល្បងអាវុធនុយក្លេអ៊ែរចំនួន ៦ លើករួចមកហើយ ចាប់តាំងពីឆ្នាំ ២០០៦ ដល់ឆ្នំា ២០១៧ ដែលត្រូវបានសហគមន៍អន្តរជាតិចាត់ទុកថាជាផ្គើន របស់កូរ៉េខាងជើង និងជាការបង្កឱ្យមានភាពតានតឹង និងប៉ះពាល់ដល់សន្តិសុខនៅក្នុងតំបន់ ។
អ្នកស្រី Jen Psaki និយាយថា រដ្ឋបាលលោក ចូ បៃដិន បានពិគ្រោះជាមួយមន្រ្តីអាមេរិកនៅ ក្នុងរដ្ឋបាលលោក ដូណាល់ ត្រាំ ដែលធ្វើការងារជាមួយកូរ៉េខាងជើង ហើយក៏បានស្វែងរក ធាតុចូលពីសម្ព័ន្ធមិត្តរបស់ខ្លួននៅក្នុងតំបន់ដូចជាជប៉ុន និងកូរ៉េខាងត្បូងផងដែរ ។
អ្នកស្រី Jen Psaki បន្ថែមថា ក្នុងរយៈពេលជាងមួយឆ្នាំនេះ អាមេរិកគ្មានការសន្ទនាសកម្ម ជាមួយប្រទេសកូរ៉េខាងជើង បើទោះបីជាមានការព្យាយាមជាច្រើនពីសំណាក់សហរដ្ឋ អាមេរិកដើម្បីធ្វើឱ្យមានការចូលរួមក្តី ។ ប៉ុន្តែអ្នកស្រីថា សហរដ្ឋអាមេរិកនៅតែរំពឹងទុកថានឹង មានការបន្តពង្រីកការចូលរួមជាមួយដៃគូ និងសម្ព័ន្ធមិត្តនៅក្នុងតំបន់ ។
ចំណែកភាគីកូរ៉េខាងជើងវិញ មិនត្រឹមតែមិនមានការឆ្លើយតបចំពោះការបោះដៃរបស់អាមេរិក នោះទេ ប្អូនស្រីរបស់មេដឹកនាំកូរ៉េខាងជើង អ្នកស្រី គីម យ៉ូ ជុង នៅថ្ងៃទី១៦ មីនានេះ បានព្រមានសហរដ្ឋអាមេរិកថាកុំអោយបង្ករឿងជាមួយខ្លួនបើចង់មានសន្តិភាព ។
ការប្រកាសព្រមាននេះ ស្របពេលដែលសហរដ្ឋអាមេរិក និងកូរ៉េខាងត្បូងកំពុងធ្វើសមយុទ្ធ យោធារួមគ្នា និងមួយថ្ងៃមុនពេលដែលរដ្ឋមន្រ្តីក្រសួងការបរទេសអាមេរិក លោក Antony Blinken និងរដ្ឋមន្រ្តីក្រសួងការពារជាតិអាមេរិក លោក Lloyd Austin គ្រោងបំពេញទស្សនកិច្ច ទៅកាន់ប្រទេសកូរ៉េខាងត្បូង ។
អ្នកស្រី គីម យ៉ូ ជុង បានលើកឡើងនៅក្នុងសេចក្តីថ្លែងការណ៍និងត្រូវបានផ្សព្វផ្សាយដោយ ទូរទស្សន៍រដ្ឋកូរ៉េខាងជើង KCNA ថា៖
«យើងឆ្លៀតយកឱកាសនេះដើម្បីដាស់តឿនរដ្ឋបាល ថ្មីរបស់សហរដ្ឋអាមេរិកដែលកំពុងព្យាយាមយ៉ាងខ្លាំងដើម្បីផ្តល់នូវក្លិនម្សៅនៅក្នុងទឹកដីរបស់យើង ។ ប្រសិនបើអាមេរិកចង់គេងដោយសន្តិភាពក្នុងរយៈពេល ៤ ឆ្នាំខាងមុខនេះ អាមេរិកគួរតែជៀសវាងពីការធ្វើអោយមានក្លិនស្អុយនៅជំហានដំបូងរបស់ខ្លួន» ។
អ្នកស្រីបន្ថែមថា «ការធ្វើសមយុទ្ធសង្រ្គាម និងអរិភាព មិនដែលអាចទៅរួចជាមួយការសន្ទនា និងសហប្រតិបត្តិការនោះទេ» ។
នៅមិនទាន់មានការឆ្លើយតបបែបណា ពីសហរដ្ឋអាមេរិក ចំពោះការព្រមានរបស់ប្អូនស្រីមេដឹកនាំកំពូលកូរ៉េខាងជើង នៅឡើយទេ ។
ប៉ុន្តែកាលពីដើមខែមីនានេះ ក្រសួងការពារជាតិអាមេរិកបានសម្តែងការព្រួយបារម្ភ អំពី របាយការណ៍របស់អង្គការសហប្រជាជាតិដែលបង្ហាញពីដំណើរការឡើងវិញនូវកម្មវិធី ថាមពលនុយក្លេអ៊ែររបស់កូរ៉េខាងជើង ៕
