តំបន់&អន្តរជាតិ
ជនជាតិអ៊ុយហ្គួរតវ៉ាប្រឆាំងចិន ខណៈរដ្ឋមន្រ្តីការបរទេសចិន បំពេញទស្សនកិច្ចនៅតួគី
ជនជាតិអ៊ុយហ្គួរប្រមាណ ១ ពាន់នាក់បានប្រមូលផ្តុំគ្នាតវ៉ានៅក្នុងទីក្រុងអ៊ីស្តាន់បូល ប្រទេសតួគី ក្នុងពេលដែលរដ្ឋមន្រ្តីការបរទេសចិន លោក វ៉ាង យី កំពុងបំពេញទស្សនកិច្ច និងពិភាក្សាការងារជាមួយសមភាគីតួគីអំពីបញ្ហាវ៉ាក់សាំងជំងឺកូវីដ-១៩ និងកិច្ចព្រមព្រៀង បត្យាប័នរវាងប្រទេសចិន និងតួគី ។ នេះបើតាមការផ្សាយរបស់ទីភ្នាក់ងារព័ត៌មាន AFP នៅថ្ងៃទី២៦ ខែមីនា ។
ក្នុងដំណើរទស្សនកិច្ចនៅតួគី លោក វ៉ាង យី ក៏បានជួបពិភាក្សាជាមួយប្រធានាធិបតីតួគី លោក Recep Tayyip Erdogan ផងដែរ ។
ប្រទេសតួគីកំពុងប្រើប្រាស់វ៉ាក់សាំង ស៊ីណូវ៉ាក់ ផលិតដោយប្រទេសចិន ហើយបច្ចុប្បន្នកំពុង តែចរចរជាមួយចិនអំពីការដឹកជញ្ជូនវ៉ាក់សាំងថ្មី ។
ប៉ុន្តែសហគមន៍ជនជាតិអ៊ុយហ្គួរដែលមានប្រមាណ ៥ ម៉ឹននាក់នៅក្នុងប្រទេសតួគី ព្រួយ បារម្ភថា ការដឹកជញ្ជូនវ៉ាក់សាំងពីចិនមកតួគីបន្ថែមទៀត គឺវាអាស្រ័យទៅលើការចុះសច្ចាប័ន របស់តួគីទៅលើកិច្ចព្រមព្រៀងធ្វើបត្យាប័នរវាងប្រទេសទាំងពីរ ដែលកិច្ចព្រមព្រៀងនេះត្រូវ បានរដ្ឋសភាចិនបានអនុម័តរួចហើយកាលពីចុងឆ្នាំ ២០២០ ។
ទោះជាយ៉ាងណា ទាំងប្រទេសចិន និងតួគី បានបដិសេធចំពោះការព្រួយបារម្ភនេះ ហើយថា គេមិនបានយករឿងទាំងពីរនេះមកផ្សាភ្ជាប់គ្នានោះទេ ។
រដ្ឋមន្រ្តីការបរទេសតួគី លោក Mevlut Cavusoglu អះអាងថា ប្រទេសតួគី និងចិននឹងពង្រឹងកិច្ច សហប្រតិបត្តិការដើម្បីពង្រឹងការប្រយុទ្ធប្រឆាំងទៅនឹងជំងឺរាតត្បាត ។
ប្រទេសចិនត្រូវបានប្រទេសលោកខាងលិចដែលរួមមានសហរដ្ឋអាមេរិក ចក្រភពអង់គ្លេស សហភាពអឺរ៉ុប និងកាណាដា ជាដើម បានចោទប្រកាន់ថាបានរំលោភសិទ្ធិមនុស្សធ្ងន់ធ្ងរទៅ លើជនជាតិអ៊ុយហ្គួរដែលរួមមានការចាប់ឃុំខ្លួនជនជាតិអ៊ុយហ្គួរប្រមាណ ១ លាននាក់ដាក់ នៅក្នុងជំរំ ការបង្ខំឱ្យធ្វើពលកម្ម និងការលាងសំអាតខួរក្បាល ។ល។ ទីក្រុងវ៉ាស៊ីនតុនថែមទាំងចោទ ប្រទេសចិនថាបានប្រព្រឹត្តអំពើប្រល័យពូជសាសន៍លើ ជនជាតិអ៊ុយហ្គូរដែលជាអ្នកកាន់សាសនាឥស្លាមទៀតផង ។
ក្នុងពេលតវ៉ានៅទីក្រុងអ៊ីស្តាន់បូល ជនជាតិអ៊ុយហ្គួរក៏បានស្រែកទាមទារឱ្យប្រទេសចិន បញ្ឈប់នូវអំពើប្រល័យពូជសាសន៍ប្រព្រឹត្តលើប្រជាជនអ៊ុយហ្គូរ ។
អ្នកតវ៉ាអាយុ ៦២ ឆ្នាំម្នាក់បាននិយាយថា «ខ្ញុំភ្ញាក់ផ្អើល ហេតុអ្វីបានជាប្រទេសតួគីទទូលរដ្ឋ មន្រ្តីការបរទេសចិន ។ ពួកគេបានធ្វើរឿងគ្រោះថ្នាក់ជាច្រើននៅ Turkestan ខាងកើត» ។
រដ្ឋមន្រ្តីការបរទេសតួគី លោក Mevlut Cavusoglu បានប្រកាសថា ការផ្តល់សច្ចាប័នរបស់តួគី ទៅលើកិច្ចព្រមព្រៀងបត្យាប័នរវាងប្រទេសទាំងពីរ មិនមែនមានន័យថាប្រទេសតួគីនឹងបញ្ជូន ជនជាតិអ៊ុយហ្គូរទៅឱ្យប្រទេសចិននោះទេ ។
ប៉ុន្តែសហគមន៍អ៊ុយហ្គួរនៅក្នុងប្រទេសតួគី ចង់ឱ្យប្រទេសចិនចូលរួមជាមួយប្រទេសផ្សេង ទៀតនៅក្នុងសហភាពអឺរ៉ុបដាក់ទណ្ឌកម្មទៅលើមន្រ្តីចិនដែលប្រព្រឹត្តអំពើរំលោភសិទ្ធិមនុស្ស ទៅលើប្រជាជនអ៊ុយហ្គូរនៅក្នុងខេត្តស៊ីងជាំង ប្រទេសចិន ដែលសហភាពអឺរ៉ុប ចក្រភព អង់គ្លេស និងកាណាដា ទើបបានព្រួតដៃគ្នាដាក់ទណ្ឌកម្មទៅលើមន្រ្តីចិនរួចហើយ ។
បាតុករអ៊ុយហ្គួរម្នាក់ឈ្មោះ Rahile Seker និយាយថា «យើងបារម្ភពីអនាគតរបស់យើង តើវានឹង មានអ្វីកើតឡើងចំពោះកូនចៅរបស់យើង ប្រទេសតួគីគួរបើកភ្នែករបស់ខ្លួន និងឈរខាងប្រជា ជនស្លូតត្រង់អ៊ុយហ្គួរ» ។
ចំណែកបាតុករម្នាក់ទៀតឈ្មោះ Feyzullah Kaymak និយាយថា តួគីត្រូវតែសួររដ្ឋមន្រ្តីការ បរទេសចិនអំពីអ្វីដែលកំពុងកើតឡើងនៅក្នុងជំរំក្នុងប្រទេសចិន ។
លោកថា «យើងចង់អោយតួកគីសួររដ្ឋមន្ត្រីការបរទេសចិនថាមានអ្វីកើតឡើងនៅទីនោះ … យើងចង់អោយតួកគីបញ្ចេញសំឡេង» ។
មិនឃើញមានការឆ្លើយតបពីរដ្ឋាភិបាលចិនចំពោះការតវ៉ារបស់ប្រជាជនអ៊ុយហ្គួរនៅក្នុង ប្រទេសតួគីនៅពេលនេះ ។ ប៉ុន្តែប្រទេសចិនតែងបានច្រានចំពោះការចោទប្រកាន់ ដែលថាអាជ្ញាធរខ្លួនបានប្រព្រឹត្តអំពើប្រល័យពូជសាសន៍ទៅលើជនជាតិអ៊ុយហ្គួរនៅក្នុង ប្រទេសចិន ៕
