តំបន់&អន្តរជាតិ
ក្រុមប្រឹក្សាសន្តិសុខអង្គការសហប្រជាជាតិ ថ្កោលទោសអំពើហិង្សានៅមីយ៉ាន់ម៉ា
ក្រុមប្រឹក្សាសន្តិសុខអង្គការសហប្រជាជាតិនៅថ្ងៃទី១១ ខែមីនា នេះ អំពាវនាវជាឯកច្ឆន្ទឱ្យ បញ្ចប់អំពើរដ្ឋប្រហារយោធានៅប្រទេសមីយ៉ាន់ម៉ា និងថ្កោលទោសយ៉ាងខ្លាំងចំពោះអំពើ ហិង្សាប្រឆាំងនឹងក្រុមអ្នកតវ៉ាដោយសន្តិវិធី និងបានអំពាវនាវឱ្យក្រុមយោធាមានការ អត់ធ្មត់បំផុត ។ នេះបើតាមការផ្សាយរបស់សារព័ត៌មាន AP នៅថ្ងៃនេះ ។
ប្រទេសចិនដែលត្រូវបានគេមើលឃើញថាជាមិត្តរបស់មីយ៉ាន់ម៉ាក៏បានចេញមុខដូចគេដូចឯង ក្នុងការថ្កោលទោសនូវអំពើហិង្សាប្រព្រឹត្តដោយក្រុមយោធាលើក្រុមអ្នកតវ៉ាដោយសន្តិវិធីផងដែរ ។
ក្រុមប្រឹក្សាសន្តិសុខអង្គការសហប្រជាជាតិមានសមាជិកចំនួន ១៥ ក្នុងនោះ ៥ គឺជាសមាជិក អចិន្រ្តៃយ៍ដែលរួមមាន សហរដ្ឋអាមេរិក អង់គ្លេស បារាំង រុស្សី និងចិន ។ ប្រសិនបើមាន ប្រទេសណាមួយក្នុងចំណោមប្រទេសទាំង ៥ ដែលជាសមាជិកអចិន្ត្រៃយ៍នេះបោះឆ្នោត មិនគាទ្រ ឬវ៉េតូ សេចក្តីសម្រេចណាមួយរបស់ក្រុមប្រឹក្សាសន្តិសុខមិនអាចចេញបានឡើយ ។
ឯកអគ្គរដ្ឋទូតចិនប្រចាំអង្គការសហប្រជាជាតិ លោក Zhang Jun បានលើកឡើងនៅក្នុង សេចក្តីថ្លែងការណ៍ថា វាសំខាន់ណាស់ដែលសមាជិកទាំងអស់និយាយសំឡេងតែមួយ ។ លោកប្រកាសថា វាដល់ពេលហើយដែលត្រូវបន្ធូរបន្ថយនូវភាពតានតឹង ត្រូវប្រើនូវការទូត និងការសន្ទនា ។
ចំណែកឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ អ្នកស្រី Thomas-Greenfield ដែលជាប្រធាន នៃក្រុមប្រឹក្សាសន្តិសន្តិសុខអង្គការសហប្រជាជាតិនៅពេលនេះ គូសបញ្ជាក់ថា សមាជិកទាំងអស់នៃក្រុមប្រឹក្សាបាននិយាយសំឡេងតែមួយក្នុងការថ្កោល ទោសការប្រើអំពើហិង្សាលើអ្នកតវ៉ាដោយសន្តិវិធី ។
អ្នកស្រីបន្ថែមថា ៖ «សហរដ្ឋអាមេរិកនឹងបន្តធ្វើការជាមួយដៃគូអន្តរជាតិយ៉ាងទូលំទូលាយ ដើម្បីលើកកម្ពស់ការទទួលខុសត្រូវចំពោះរដ្ឋប្រហារ និងអ្នកដែលទទួលខុសត្រូវចំពោះ អំពើហិង្សា ហើយនឹងធ្វើការដើម្បីស្តាររដ្ឋាភិបាលដែលជាប់ឆ្នោតតាមបែបប្រជាធិបតេយ្យ» ។
មិនទាន់ឃើញមានប្រតិកម្មពីរបបយោធាភូមាចំពោះការថ្កោលទោសរបស់សមាជិកក្រុម ប្រឹក្សាសន្តិសុខអង្គការសហប្រជាជាតិនៅពេលនេះនៅឡើយទេ ។
គិតចាប់តាំងពីមានរដ្ឋប្រហារដោយក្រុមយោធានៅថ្ងៃទី១ ខែកុម្ភៈ មក មានប្រជាជន មីយ៉ាន់ម៉ាជាង ៦០ នាក់ហើយបានស្លាប់ដោយសារការបង្រ្កាបរបស់ក្រុមយោធា និងមនុស្ស ជាង ១.៨០០ នាក់ទៀតត្រូវបានយោធាចាប់ឃុំខ្លួន ។
ចំណែកអគ្គលេខាធិការអង្គការសហប្រជាជាតិ លោក Antonio Guterres បានសម្តែងក្តីសង្ឃឹម ថា សេចក្តីថ្លែងការណ៍របស់ក្រុមប្រឹក្សាសន្តិសុខនេះ នឹងធ្វើឱ្យរបបយោធាដឹងថា «វាពិតជាចាំ បាច់ក្នុងការដោះលែងអ្នកទោសទាំងអស់ វាពិតជាចាំបាច់ណាស់ក្នុងការគោរពលទ្ធផល នៃការបោះឆ្នោត និងអនុញ្ញាតឱ្យមានស្ថានភាពវិលត្រឡប់ទៅរកការផ្លាស់ប្តូរតាមបែបលទ្ធិ ប្រជាធិបតេយ្យវិញ» ៕
