តំបន់&អន្តរជាតិ
មេបញ្ជាការយោធាជាន់ខ្ពស់អាមេរិក បារម្ភថាចិនវាយយកកោះតៃវ៉ាន់ នៅមុនឆ្នាំ ២០២៧
មេបញ្ជាការយោធាជាន់ខ្ពស់អាមេរិកសម្តែងការបារម្ភ និងខ្លាចថាប្រទេសចិននឹងលើកទ័ព ឈ្លានពានកោះតៃវ៉ាន់នៅក្នុងអំឡុងពេល ៦ ឆ្នាំខាងមុខ ។ នេះបើតាមការផ្សាយរបស់ ទីភ្នាក់ងារសារព័ត៌មាន Reuters នៅថ្ងៃទី១០ ខែមីនា នេះ ។
លោក Philip Davidson ដែលជាមន្រ្តីយោធាជាន់ខ្ពស់អាមេរិកប្រចាំតំបន់អាស៊ី ប៉ាស៊ីហ្វិក បានថ្លែងដូចនេះ នៅពេលលោកមើលឃើញថា ទីក្រុងប៉េកាំងកំពុងព្យាយាមរារាំងទប់ស្កាត់ អំណាចយោធាអាមេរិកនៅក្នុងតំបន់អាស៊ី ។
លោក Philip Davidson បញ្ជាក់ថា៖
«ខ្ញុំបារម្ភថាពួកគេ (ចិន) បង្កើនមហិច្ឆតារបស់ខ្លួនក្នុងការ ដណ្តើមកន្លែងសហរដ្ឋអាមេរិក និងតួនាទីដឹកនាំរបស់យើងនៅក្នុងសណ្តាប់ធ្នាប់អន្តរជាតិ ដែលផ្អែកលើច្បាប់នៅឆ្នាំ ២០៥០» ។
លោកបានថ្លែងប្រាប់គណៈកម្មាធិការព្រឹទ្ធសភាអាមេរិកបន្ថែមថា «កោះតៃវ៉ាន់ច្បាស់ណាស់ គឺជាមហិច្ឆិតាមួយរបស់ពួកគេ ហើយខ្ញុំគិតថាការគំរាមកំហែងត្រូវបានបង្ហាញក្នុងអំឡុង ពេលមួយទសវត្សរ៍នេះ ជាក់ស្តែងក្នុងរយៈពេល ៦ ឆ្នាំខាងមុខ» ។
ទោះជាយ៉ាងណា មន្រ្តីយោធាអាមេរិករូបនេះ មិនបានបង្ហាញនូវភស្តុតាងជាក់លាក់ចំពោះការ សន្និដ្ឋានរបស់លោកបែបនេះឡើយ ។
បែបនេះក្តី គេក៏ដឹងដែរថា ទីក្រុងប៉េកាំងតែងប្រកាសហើយប្រកាសទៀតថា នឹងមិនអនុញ្ញាត ឱ្យកោះតៃវ៉ាន់ប្រកាសឯករាជ្យជាដាច់ខាត និងបានគំរាមថានឹងប្រើកម្លាំងទ័ពវាយយកកោះ តៃវ៉ាន់តែម្តង ប្រសិនបើកោះតៃវ៉ាន់ប្រកាសឯករាជ្យនៅក្នុងពេលថ្ងៃណាមួយ ។
នាយករដ្ឋមន្រ្តីចិន លោក លី ឃឺជាំង ទើបបានបញ្ជាក់ជាថ្មីទៀតកាលពីពេលថ្មីៗនេះថា ចិន ប្រកាន់ខ្ជាប់នូវគោលការណ៍ចិនតែមួយចំពោះបញ្ហាតៃវ៉ាន់ ។ គោលការណ៍នេះមានន័យថា តៃវ៉ាន់ គ្រាន់តែជាខេត្តមួយរបស់ចិនដែលមិនអាចបំបែកចេញពីចិនបានឡើយ ។
គេនៅមិនទាន់ឃើញមានប្រតិកម្មបែបណាពីរដ្ឋាភិបាលចិនចំពោះការលើកឡើងរបស់មន្រ្តីយោធាជាន់ខ្ពស់អាមេរិកប្រចាំតំបន់អាស៊ី ប៉ាស៊ីហ្វិក នេះនៅឡើយទេ ។
កោះតៃវ៉ាន់បានបំបែកចេញពីចិនកាលពីចុងឆ្នំា ១៩៤៩ នៅពេលពួកកុម្មុនិស្តឡើង គ្រប់គ្រងអំណាចនៅក្នុងប្រទេសចិន ប៉ុន្តែកោះតៃវ៉ាន់ត្រូវបានសហរដ្ឋអាមេរិកទទួលស្គាល់ និងរក្សាទំនាក់ទំនងការទូតជាផ្លូវការរហូតដល់ឆ្នាំ ១៩៧៩ នៅពេលដែលសហរដ្ឋអាមេរិក ប្រែមកទទួលស្គាល់ទំនាក់ទំនងការទូតជាមួយទីក្រុងប៉េកាំងវិញម្តង ដោយនៅពេលនោះ អាមេរិកត្រូវការចាប់យកទីក្រុងប៉េកាំងដើម្បីទប់ទល់ជាមួយនឹងសហភាពសូវៀតនៅក្នុង សង្រ្គាមត្រជាក់ ។ បែបនេះក្តី សហរដ្ឋអាមេរិកនៅតែជាសម្ព័ន្ធមិត្ត និងជាអ្នកគាំទ្រ ផ្នែកយោធាដ៏សំខាន់បំផុតរបស់កោះតៃវ៉ាន់ ។
ក្រៅពីបញ្ហាកោះតៃវ៉ាន់ លោក Philip Davidson ក៏បានលើកឡើងពីសកម្មភាពយោធារបស់ទី ក្រុងប៉េកាំងនៅក្នុងសមុទ្រចិនខាងត្បូង ដែលលោកមើលឃើញថា ក៏ជាការគំរាមកំហែងដល់ កោះ Guam របស់អាមេរិកនៅក្នុងមហាសមុទ្រប៉ាស៊ីហ្វិកផងដែរ ។ លោកថា កោះ Gmam គឺ ជាផ្ទាំងស៊ីបរបស់ចិននៅក្នុងពេលបច្ចុប្បន្ន ។
លោកនិយាយថា ៖
«កោះ Guam ចាំបាច់ត្រូវការពារ ហើយវាចាំបាច់ត្រូវត្រៀមសម្រាប់ការ គំរាមកំហែង ដែលនឹងកើតឡើងនៅពេលអនាគត» ៕
