ប៉ូលីសវៀតណាមដាក់បុរសតស៊ូមតិប្រឆាំងរដ្ឋអំណាចក្នុងបញ្ជីតាមចាប់ខ្លួន

សមត្ថកិច្ចវៀតណាមទីក្រុងហាណូយមកពីនាយកដ្ឋានសន្តិសុខសាធារណៈបានចេញសេចក្តី ជូនដំណឹងអំពីការដាក់ក្នុងបញ្ជីតាមចាប់ខ្លួនអ្នកតស៊ូមតិជនជាតិយួនមួយរូបឈ្មោះ ឡេ វ៉ាំង យុង ( Lê Văn Dũng) ឬហៅថា ឡេ យុង វ៉ូវ៉ា (Lê Dũng Vova) ដោយរដ្ឋាភិបាលវៀតណាម បានចោទប្រកាន់បុរសរូបនេះពីបទឃោសនាប្រឆាំងរដ្ឋវៀតណាម ។

សារព័ត៌មានវៀតណាម VNS បានផ្សព្វផ្សាយនៅថ្ងៃទី១ ខែមិថុនា ថា លោក ឡេ វ៉ាំង យុង កើតនៅឆ្នាំ ១៩៧០ នៅក្នុងទីក្រុងហាណូយ ត្រូវបានរដ្ឋអំណាចវៀតណាមចោទប្រកាន់ ពីបទផលិត រក្សាទុក ចែកចាយ ឬផ្សព្វផ្សាយព័ត៌មាន ឯកសារ សម្ភារៈ ប្រឆាំងរដ្ឋអំណាចនៃ សាធារណរដ្ឋសង្គមនិយមវៀតណាម ក្រោមមាត្រា ១១៧ នៃក្រមព្រហ្មទណ្ឌ ឆ្នាំ ២០០៥ របស់ប្រទេសវៀតណាម ។

អាជ្ញាធរវៀតណាមឱ្យដឹងថា ទីតាំងស្នាក់នៅចុងក្រោយរបស់លោក ឡេ វ៉ាំង យុង គឺឋិតនៅ ក្នុងសង្កាត់ ហាកៅ ខណ្ឌហាដុង ទីក្រុងហាណូយ ។

បុរសតស៊ូមតិដើម្បីសេរីភាពជនជាតិយួនរូបនេះ ត្រូវបានអាជ្ញាធរចោទប្រកាន់ថា បានចូលរួម សកម្មភាព និងការតវ៉ាប្រឆាំងរដ្ឋអំណាចដែលបង្កការរំខានដល់សន្តិសុខ និងសណ្តាប់ធ្នាប់រដ្ឋ វៀតណាមចាប់តំាងពីឆ្នាំ ២០១១ មក ។ លោកក៏ត្រូវបានចោទប្រកាន់ថាបានចូលរួមជាមួយ ក្រុមវិទ្ធង្សនា និងចលនាមួយចំនួនដែលរដ្ឋអំណាចវៀតណាមចាត់ទុកថា ជាពួកប្រតិកិរិយា នៅក្នុងស្រុក និងក្រៅប្រទេស ។

សារព័ត៌មានវៀតណាមរាយការណ៍បន្ថែមថា ចាប់តំាងពីឆ្នាំ ២០១៨ មក លោក ឡេ វ៉ាំង យុង បានបង្កើតចលនាមួយឈ្មោះថា «ចលនាដើម្បីធ្វើឱ្យវៀតណាមរស់ឡើងវិញ» និងបានបង្កើត បណ្តាញ និងទំព័រផ្សព្វផ្សាយជាសាធារណៈ ដូចជា «ទូរទស្សន៍សំឡេងពលរដ្ឋ» «ទូរទស្សន៍អ៊ីវ៉ា» (Eva Tivi) និង«ទូរទស្សន៍រស់ឡើងវិញ» ជាដើម ដែលត្រូវបានផ្សព្វផ្សាយនៅ លើបណ្តាញសង្គមយូធូប (YouTube) និងហ្វេសប៊ុក (Facebook) ។

អ្នកតស៊ូមតិរូបនេះ ក៏ត្រូវបានរដ្ឋអំណាចចោទប្រកាន់ថាបានបង្ហោះផ្សព្វផ្សាយនូវវីដេអូដែល មួលបង្កាច់ និងបរិហារកេរិ៍្តរដ្ឋបាលការងារ និងអ្នកដឹកនាំមូលដ្ឋាននៅក្នុងប្រទេសវៀតណាម ដើម្បីទាក់ទាញការគាំទ្រសម្រាប់ការប្រឆាំងនឹងរដ្ឋអំណាចវៀតណាម ។

គេសង្កេតឃើញថា ជាទូទៅ រដ្ឋអំណាចវៀតណាមតែងចាត់វិធានការលើពលរដ្ឋដែលតស៊ូមតិ ដើម្បីសិទ្ធិសេរីភាពនៅក្នុងប្រទេសដែលកាន់របបកុម្មុយនិស្តនៅក្នុងតំបន់អាស៊ីអាគ្នេយ៍មួយនេះ​ ៕