ជា​ប្រវត្តិ​សាស្រ្ត WTO មាន​អគ្គនាយក​ជា​ស្រ្តី​លើក​ទី ១

អង្គការ​ពាណិជ្ជកម្ម​ពិភពលោក (WTO​) នៅ​ថ្ងៃទី ១៥ ខែកុម្ភៈ បាន​បោះឆ្នោត​ជ្រើសរើស​អ្នកស្រី Ngozi Okonjo​-Iweala ឱ្យ​កាន់​តំណែង​ជា​អគ្គនាយក​ទី ៧ នៃ​ស្ថាប័ន​ពាណិជ្ជកម្ម​អន្តរជាតិ មួយ​នេះ ។

អ្នកស្រី Ngozi Okonjo​-Iweala គឺជា​ជនជាតិ​នីហ្សេរីយ៉ា (Nigeria​) ។ អ្នកស្រី​គឺជា​ស្រ្តី​ដំបូងបង្អស់ និង​ជា​ស្រ្តី​ដំបូង​មក​ពី​ទ្វីប​អាហ្រិក​ផង​ដែរ ដែល​បាន​ក្លាយជា​អគ្គនាយក​របស់ WTO ចាប់តាំងពី ស្ថាប័ន​ពិភពលោក​មួយ​នេះ​ត្រូវ​បាន​បង្កើត​ឡើងជា​ផ្លូវការ​ចាប់តាំងពី​ថ្ងៃទី ១ ខែមករា ឆ្នាំ ១៩៩៥ ។ បច្ចុប្បន្ន WTO មាន​រដ្ឋ​ជាស​មា​ជិ​កចំនួន ១៦៤ និង​មាន​ការិយាល័យ​កណ្តាល​នៅ ក្នុង​ទីក្រុង​ហ្សឺណែវ ប្រទេស​ស្វីស ។

អ្នកស្រី Ngozi Okonjo​-Iweala នឹង​ចូលកាន់​តំណែង​ចាប់ពី​ថ្ងៃទី១ ខែមីនា ឆ្នាំ២០២១ និង​បញ្ចប់ អាណត្តិ​នៅ​ថ្ងៃទី៣១ ខែសីហា ឆ្នាំ ២០២៥ ។ ការ​ចូលកាន់​តំណែង​របស់ អ្នកស្រី Ngozi Okonjo​-Iweala គឺ​ចំ​ពេល​ដែល​ស្ថានភាព​សេដ្ឋកិច្ច និង​ពាណិជ្ជកម្ម​របស់​ពិភពលោក​មិនសូវ​ល្អ​ដោយសារតែ​វិបត្តិ​នៃ​ជំងឺ​កូ​វីដ​-១៩ ។

ក្រោយ​ត្រូវ​បាន​ជ្រើសរើស​ជា​អគ្គនាយក​ថ្មី នៃ WTO អ្នកស្រី Ngozi Okonjo​-Iweala មានប្រសាសន៍​ថា ការងារ​ជាអាទិភាព​របស់​អ្នកស្រី​គឺ​ធ្វើការងារ​ជាមួយ​សមាជិក​ដើម្បី​រក ដំណោះស្រាយ​ឱ្យ​បាន​ឆាប់រហ័ស​ដើម្បី​ឆ្លើយតបទៅនឹង​ផលវិបាក​ផ្នែក​សេដ្ឋកិច្ច និង​សុខាភិបាល​ដែល​បាន​បង្កឡើង​ដោយ​ជំងឺរាតត្បាត​សកល​កូ​វីដ​-១៩ ។

អ្នកស្រី​បាន​ថ្លែង​និង​ត្រូវ​បាន​ស្រង់​សម្តី​ដោយ WTO ថា ៖ «ខ្ញុំ​ពិតជា​មាន​កិត្តិយស​ដែល​សមាជិក របស់ WTO បាន​ជ្រើសរើស​ខ្ញុំ​ឱ្យធ្វើ​ជា​អគ្គនាយក WTO» ។

អ្នកស្រី​ថ្លែង​បន្ត​ថា ៖ «អង្គការ​ពាណិជ្ជកម្ម​ពិភពលោក​ដ៏​រឹងមាំ​មាន​សារៈសំខាន់​ណាស់ ប្រសិនបើ​យើង​ត្រូវ​ស្តារ​ឡើងវិញ​ពេញលេញ និង​ឆាប់រហ័ស​ពី​ការ​បំផ្លិច​បំផ្លាញ​ដែល​បង្ក ឡើង​ដោយ​ជំងឺរាតត្បាត​កូ​វីដ​–១៩ ។ ខ្ញុំ​ទន្ទឹង​រង​ចាំ​ធ្វើការ​ជាមួយ​សមាជិក​ដើម្បី​រៀបចំ និង​អនុវត្ត​ការ​ឆ្លើយតប​គោលនយោបាយ​ដែល​យើង​ត្រូវការ​ដើម្បី​ធ្វើ​ឱ្យ​សេដ្ឋកិច្ច​ពិភពលោក​មានដំណើរ​ទៅមុខ​ទៀត ។ អង្គការ​របស់​យើង​ប្រឈមមុខនឹង​បញ្ហា​ជាច្រើន ប៉ុន្តែ​ការ​ធ្វើការ​រួមគ្នា យើង​អាច​ធ្វើ​ឱ្យ​អង្គការ​ពាណិជ្ជកម្ម​ពិភពលោក​កាន់តែ​រឹងមាំ មាន​ភាព​រហ័សរហួន និង​សម្រប ខ្លួន​ទៅ​នឹង​ភាព​ពិត​នា​ពេល​បច្ចុប្បន្ន​នេះ »។

អ្នកស្រី Ngozi Okonjo​-Iweala បច្ចុប្បន្ន​អាយុ ៦៧ ឆ្នាំ ទទួល​បាន​សញ្ញាប័ត្រ​បណ្ឌិត​សេដ្ឋកិច្ច ពី​សហរដ្ឋអាមេរិក និង​ជា​អ្នកជំនាញ​ផ្នែក​អភិវឌ្ឍន៍​អន្តរជាតិ ។ អ្នកស្រី​ធ្លាប់​មានបទពិសោធន៍ ការងារ​ជាច្រើន​ឆ្នាំ​នៅក្នុង​ស្ថាប័ន​ហិរញ្ញវត្ថុ​អន្តរ​ជា​តិ​ធំៗ ក្នុង​នោះ​រួមមាន​ធនាគារពិភពលោក ផង​ដែរ ។ អ្នកស្រី​ក៏​ធ្លាប់ធ្វើ​ជារ​ដ្ឋ​មន្រ្តី​ក្រសួងហិរញ្ញវត្ថុ​របស់​ប្រទេស នីហ្សេរីយ៉ា ចំនួន ២ អាណត្តិ ហើយក៏​ជា​ស្រ្តី​ដំបូងបង្អស់​ដែល​បាន​កាន់​តំណែង​នេះ ៕