តំបន់&អន្តរជាតិ
ចិន-រុស្សី រួមគ្នាទប់ទល់ នឹងសម្ពាធរបស់អាមេរិក និងអឺរ៉ុប
ចិន និងរុស្សីដែលត្រូវបានសហរដ្ឋអាមេរិកនិងសម្ព័ន្ធមិត្តដាក់ទណ្ឌកម្មដោយចោទប្រកាន់ ថាបានរំលោភសិទ្ធិមនុស្ស បានចោទប្រកាន់អាមេរិក និងសម្ព័ន្ធមិត្តរបស់អាមេរិកវិញថា បានជ្រៀតជ្រែកចូលកិច្ចការផ្ទៃក្នុងប្រទេសរបស់ខ្លួន ។
ចិន និងរុស្សី ក៏បានស្នើឱ្យមានកិច្ចប្រជុំកំពូល នៃក្រុមប្រឹក្សាសន្តិសុខអង្គការសហប្រជាជាតិ ផងដែរដើម្បីឆ្លើយតបចំពោះការប្រឈមដែលប្រទេសមហាអំណាចទាំងពីរចាត់ទុកថាជាភាព ចលាចលនៃនយោបាយសកល ។ នេះបើតាមការផ្សាយរបស់សារព័ត៌មាន Aljazeera នៅថ្ងៃទី ២៣ ខែមីនា ។
ការប្រកាសរបស់ប្រទេសដែលជាសម្ព័ន្ធមិត្តទាំងពីរនេះ ធ្វើឡើងនៅក្នុងសេចក្តីថ្លែងការណ៍រួម នៅក្រោយជំនួបប្រជុំនៅក្នុងទីក្រុងប៉េកាំង ប្រទេសចិន រវាងរដ្ឋមន្រ្តីការបរទេសចិន លោក វ៉ាង យី (Wang Yi) និង រដ្ឋមន្រ្តីការបរទេសរុស្សី លោក ស៊ែហ្គេ ឡាវរ៉ូវ (Sergey Lavrov) ។
ចិន និងរុស្សី បានលើកឡើងថា ក្នុងពេលដែលពិភពលោកមានភាពចលាចលនយោបាយ កំពុងកើនឡើង កិច្ចប្រជុំកំពូលនៃសមាជិកអចិន្រ្តៃយ៍របស់ក្រុមប្រឹក្សាសន្តិសុខអង្គការ សហប្រជាជាតិ គឺជាការចាំបាច់ដើម្បីបង្កើតឱ្យមានការសន្ទនាដោយផ្ទាល់ដើម្បីដោះស្រាយ បញ្ហារួមរបស់មនុស្សជាតិក្នុងផលប្រយោជន៍ នៃការថែរក្សាស្ថេរភាពសកល ។
ការជំរុញនេះធ្វើឡើងបន្ទាប់ពីសហរដ្ឋអាមេរិក សហភាពអឺរ៉ុប ចក្រភពអង់គ្លេស និងកាណាដា ដែលកាលពីថ្ងៃទី២២ ខែមីនា បានព្រួតគ្នាដាក់ទណ្ឌកម្មទៅលើមន្រ្តីចិនមួយចំនួនពាក់ព័ន្ធទៅ នឹងការរំលោភសិទ្ធិមនុស្សជនជាតិអ៊ុយហ្គួរកាន់សាសនាអ៊ីស្លាមនៅក្នុងខេត្តស៊ីងជាំង ប្រទេសចិន ។ សហរដ្ឋអាមេរិកថែមទាំងបានចោទប្រកាន់អាជ្ញាធរចិនថាបានប្រព្រឹត្តអំពើ ឧក្រិដ្ឋកម្មប្រល័យពូជសាសន៍ទៅលើជនជាតិអ៊ុយហ្គួរទៀតផង ។ ការចោទប្រកាន់ដែល ទីក្រុងប៉េកាំងបានបដិសេធ ។
បញ្ហារំលោភសិទ្ធិជនជាតិអ៊ុយហ្គួរក៏ត្រូវបានរដ្ឋមន្រ្តីក្រសួងការបរទេសអាមេរិកលោក អាន់តូនី ប្លីងខិន (Antony Blinken) លើកឡើងនៅក្នុងជំនួបជាមួយរដ្ឋមន្រ្តីការបរទេសចិនលោក វ៉ាង យី នៅក្នុងរដ្ឋអាឡាស្កា សហរដ្ឋអាមេរិក កាលពីថ្ងៃទី១៨ ដល់ថ្ងៃទី១៩ ខែមីនា ។ ក៏ប៉ុន្តែ ប្រទេសចិនបានចាត់ទុកការលើកឡើងរបស់អាមេរិកថាជាការជ្រៀតជ្រែកការងារផ្ទៃក្នុងរបស់ចិន និងបញ្ជាក់ជំហរថាទីក្រុងប៉េកាំងការពារដាច់ខាតនូវអធិបតេយ្យភាពរបស់ខ្លួន ។
រដ្ឋមន្រ្តីការបរទេសអាមេរិក លោក Antony Blinken បានលើកឡើងនៅក្នុងសេចក្តីថ្លែងការណ៍ ថាការដាក់ទណ្ឌកម្មដោយប្រទេសលោកខាងលិចទៅលើប្រទេសចិននៅពេលនេះ គឺជាការ បញ្ជូនសញ្ញាយ៉ាងច្បាស់លាស់ទៅកាន់អ្នកដែលរំលោភបំពានសិទ្ធិមនុស្សអន្តរជាតិ និងបាន ព្រមានថាសហរដ្ឋអាមេរិកនឹងចាត់វិធានការបន្ថែមទៀតឱ្យស្របជាមួយដៃគូរបស់ខ្លួន ។
ប្រតិកម្មទៅនឹងទណ្ឌកម្មរបស់លោកខាងលិច ទីក្រុងប៉េកាំងបានដាក់ទណ្ឌកម្មបកវិញទៅលើ បុគ្គលចំនួន ១០ នាក់ និងស្ថាប័នចំនួន ៤ នៅក្នុងសហភាពអឺរ៉ុប ដែលទីក្រុងប៉េកាំងចាត់ ទុកថាពួកគេបានធ្វើសកម្មភាពបំផ្លិចបំផ្លាញផលប្រយោជន៍របស់ប្រទេសចិន និងបានផ្សព្វ ផ្សាយនូវព័ត៌មានភូតកុហក និងមិនពិតពីប្រទេសចិនទៅកាន់ពិភពលោក ។
ស្រដៀងទៅនឹងទីក្រុងប៉េកាំង ទីក្រុងមូស្គូក៏កំពុងមានទំនាក់ទំនងរកាំរកូសជាមួយទីក្រុង វ៉ាស៊ីនតុន ក្រោយពីមានរបាយការណ៍ថាប្រទេសរុស្សីបានជ្រៀតជ្រែកចូលក្នុងការបោះឆ្នោត របស់អាមេរិកកាលពីឆ្នំា ២០២០ និងករណីដែលអាមេរិកបានចោទប្រកាន់ប្រទេសរុស្សីថាបាន ដាក់ថ្នាំបំពុលសម្លាប់មេដឹកនាំបក្សប្រឆាំងលោក អាឡិចហ្សី ណាវ៉ាល់នី (Alexei Navalny) ។ ភាពតានតឹងនៃទំនាក់ទំនងរវាងប្រទេសទាំងពីរកាន់តែកើនឡើងខ្លាំងក្រោយពីប្រធានាធិបតីអាមេរិក លោក ចូ បៃដិន បានហៅប្រធានាធិបតីរុស្សី លោក វ្លៀឌីមៀ ពូទីន ថាជាឃាតក ។ ក្រោយហេតុការណ៍នេះ រដ្ឋាភិបាល រុស្សីបានកោះហៅឯកអគ្គរដ្ឋទូតរបស់ខ្លួនប្រចាំនៅទីក្រុង វ៉ាស៊ីនតុនឱ្យត្រឡប់ចូលប្រទេសរុស្សី ដើម្បីពិភាក្សា និងពិនិត្យឡើងវិញនូវទំនាក់ទំនងរវាង ប្រទេសទាំងពីរ ។
នៅក្នុងសេចក្តីថ្លែងការណ៍រួមរបស់ខ្លួន រុស្សី និងចិន បានអំពាវនាវប្រទេសដទៃកុំឱ្យជ្រៀត ជ្រែកចូលកិច្ចការផ្ទៃក្នុងប្រទេសរបស់ខ្លួន ។ ពួកគេបញ្ចាក់ថា រាល់ការជ្រៀតជ្រែកចូលកិច្ចការ ផ្ទៃក្នុងរបស់រដ្ឋអធិបតេយ្យណាមួយក្រោមលេសជំរុញលទ្ធិប្រជាធិបតេយ្យគឺមិនអាចទទួល យកបាននោះឡើយ ៕
