តំបន់&អន្តរជាតិ
ក្រុមប្រឹក្សាសន្តិសុខ UN ថ្កោលទោសរបបយោធាមីយ៉ាន់ម៉ាជាថ្មីរឿងអំពើហិង្សា និងការស្លាប់អ្នកតវ៉ា
ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃទី១ ខែមេសា បានថ្កោលទោសជាថ្មីទៅ លើក្រុមរបបសឹកយោធាមីយ៉ាន់ម៉ាដែលបានប្រើអំពើហិង្សាលើអ្នកតវ៉ាចាប់តាំងពីមានរដ្ឋ ប្រហារនៅថ្ងៃទី១ ខែកុម្ភៈ មក។
ទោះជាយ៉ាងណាក៏ដោយ ពួកគេមិនបានប្រកាសអំពីវិធានការណាមួយនៅថ្ងៃខាងមុខប្រឆាំង ទៅនឹងរបបយោធានោះទេ ។ នេះបើតាមការផ្សាយរបស់សារព័ត៌មាន AP នៅព្រឹកថ្ងៃទី២ ខែមេសា ។
សមាជិកទាំង ១៥ នៃក្រុមប្រឹក្សាសន្តិសុខអង្គការសហប្រជាជាតិបានបោះឆ្នោតអនុម័តទៅលើ សេចក្តីថ្លែងការណ៍ដែលសរសេរដោយចក្រភពអង់គ្លេស ក្រោយពីមានការជជែកគ្នាយ៉ាងតឹង តែងអំពីស្ថានភាពកាន់តែដុនដាបនៅក្នុងប្រទេសមីយ៉ាន់ម៉ា និងការអំពាវនាវឱ្យរបបយោធា បង្ហាញនូវការអត់ធ្មត់ជាអតិបរិមា ។
នៅក្នុងសេចក្តីថ្លែងការណ៍ដែលព្រាងឡើងដោយចក្រភពអង់គ្លេសបានប្រើពាក្យពេចន៍ធ្ងន់ៗ ថ្កោលទោសប្រឆាំងនឹងរបបយោធា និងបានស្នើឡើងនូវការត្រៀមខ្លួនរបស់ក្រុមប្រឹក្សា សន្តិសុខអង្គការសហប្រជាជាតិដើម្បីពិចារណាវិធានការបន្ថែមទៀតទៅលើរបបយោធា ដែលអាចជាវិធានការការដាក់ទណ្ឌកម្មផងដែរ ។
ប៉ុន្តែដោយមានការទទូចពីប្រទេសចិនដែលជាសមាជិកអចិន្រ្តៃយ៍នៃក្រុមប្រឹក្សាសន្តិសុខអង្គការសហប្រជាជាតិ និងមានអំណាចវេតូ ពាក្យថា «ជំហាន ឬវិធានការបន្ទាប់ទៀត» ត្រូវបាន លុបចេញពីសេចក្តីថ្លែងការណ៍ ហើយពាក្យពេចន៍ដែលបង្ហាញនូវទម្ងន់ដូចជាពាក្យ «សម្លាប់» ជាដើមនោះ ក៏មិនត្រូវបានដាក់បញ្ចូលទៅក្នុងសេចក្តីថ្លែងការណ៍នោះដែរ ដោយដាក់ជំនួស វិញនូវភាសាស្រទន់ជាងនេះនៅក្នុងសេចក្តីថ្លែងការណ៍ចុងក្រោយ ។ នេះបើតាមប្រភពមិន បញ្ចេញឈ្មោះរបស់អ្នកការទូតម្នាក់បានបង្ហើបប្រាប់សារព័ត៌មាន AP ។
នៅទីបំផុតសេចក្តីថ្លែងការ៍ចុងក្រោយបានអំពាវនាវឱ្យគ្រប់ភាគីទាំងអស់ជៀសវាងនូវអំពើ ហិង្សា ដែលចំណុចនេះគឺជាការចង់បានរបស់ប្រទេសរុស្សី ។
ក្រៅពីនោះ ក្រុមប្រឹក្សាបានលើកឡើងជាថ្មីអំពីភាពចាំបាច់នៅក្នុងការគោរពសិទ្ធិមនុស្សឱ្យ បានពេញលេញ និងស្វែងរកការសន្ទនា និងការផ្សះផ្សា ស្របទៅតាមឆន្ទៈ និងផល ប្រយោជន៍របស់ប្រជាជនមីយ៉ាន់ម៉ា ។
គួររម្លឹកថា ម្តងជាពីរដង អគ្គលេខាធិអង្គការសហប្រជាជាតិ លោក អាន់តូនីញ៉ូ ហ្គូទែរ៉េស (Antonio Guterres) បានអំពាវនាវឱ្យរបបយោធាបញ្ឈប់អំពើហិង្សាលើអ្នកតវ៉ា ។ លោកក៏បាន ស្នើឱ្យសហគមន៍អន្តរជាតិធ្វើការឆ្លើយតបជាមួយរបបយោធាដោយម៉ឺងម៉ាត់ផងដែរ ៕
