តំបន់&អន្តរជាតិ
អាមេរិក ព្រមានពីការកើនឡើង សកម្មភាពឈ្លានពានរបស់ចិនលើកោះតៃវ៉ាន់
រដ្ឋមន្រ្តីការបរទេសអាមេរិកលោក Antony Blinken បាននិយាយថា សហរដ្ឋអាមេរិកមានការ ព្រួយបារម្ភអំពីសកម្មភាពឈ្លានពានរបស់ចិនប្រឆាំងទៅនឹងកោះតៃវ៉ាន់ និងបានព្រមានថាវាជា កំហុសធ្ងន់ធ្ងរប្រសិនបើអ្នកណាមួយព្យាយាមប្រើប្រាស់កម្លាំងទ័ព ដើម្បីធ្វើឱ្យមានការផ្លាស់ប្តូរស្ថានភាពបច្ចុប្បន្ននៅក្នុងតំបន់ប៉ែកខាងលិចនៃមហាសមុទ្រប៉ាស៊ីហ្វិក ។
FILE PHOTO: U.S. Secretary of State Antony Blinken holds a virtual meeting with UN General Assembly President Volkan Bozkir via videoconference from the State Department in Washington, U.S., March 29, 2021. REUTERS/Leah Millis/Pool/File Photo
លោក Antony Blinken បានថ្លែងនៅក្នុងបទសម្ភាសន៍នៃកម្មវិធី Meet the Press របស់ទូរទស្សន៍ NBC និងត្រូវបានសារព័ត៌មាន Reuters ស្រង់សម្តីផ្សាយកាលពីថ្ងៃទី១១ ខែមីនា ថា «អ្វីដែល យើងបានឃើញ និងអ្វីដែលជាការបារម្ភពិតប្រាកដរបស់យើង គឺការកើនឡើងសកម្មភាពឈ្លាន ពានរបស់ទីក្រុងប៉េកាំងប្រឆាំងទៅលើកោះតៃវ៉ាន់ ដែលកំពុងធ្វើឱ្យមានភាពតានតឹងកាន់តែ ខ្លាំងឡើងនៅច្រកសមុទ្រតៃវ៉ាន់» ។
ទីក្រុងប៉េកាំងកាលពីសប្តាហ៍មុនបានស្តីបន្ទោសសហរដ្ឋអាមេរិកថាបានធ្វើឱ្យមានភាពតាន តឹងនៅច្រកសមុទ្រតៃវ៉ាន់ក្រោយពីនាវាពិឃាដរបស់អាមេរិកបានធ្វើដំណើរនៅជិតកោះតៃវ៉ាន់ ។
ទោះជាយ៉ាងណា លោក Antony Blinken និយាយថា សហរដ្ឋអាមេរិកមានការប្តេជ្ញាចិត្តខ្ពស់ នៅក្នុងការអនុវត្តកាតព្វកិច្ចដែលមានចែងនៅក្នុងកិច្ចព្រមព្រៀងទំនាក់ទំនងជាមួយកោះ តៃវ៉ាន់ដែលធានាថាកោះតៃវ៉ាន់មានសមត្ថភាពក្នុងការការពារខ្លួនឯង និងថែរក្សាសន្តិភាព និងសន្តិសុខនៅក្នុងតំបន់ប៉ែកខាងលិចនៃមហាសមុទ្រប៉ាស៊ីហ្វិក ។
នៅពេលសួរថាតើសហរដ្ឋអាមេរិកនឹងបញ្ចេញកងទ័ពដើម្បីទប់ទល់ជាមួយសកម្មភាពរបស់ ចិនទៅលើកោះតៃវ៉ាន់ ឬយ៉ាងណា ?
លោក Antony Blinken បានឆ្លើយតបដោយភាសាការទូតថា «អ្វីដែលខ្ញុំអាចប្រាប់អ្នកបានគឺ យើងមានការប្តេជ្ញាចិត្តខ្ពស់ចំពោះកោះតៃវ៉ាន់ដែលអាចការពារខ្លួនឯងបាន ។ យើងមានការ ប្តេជ្ញាចិត្តខ្ពស់ចំពោះសន្តិភាព និងសន្តិសុខនៅតំបន់ប៉ែខាងលិចនៃមហាសមុទ្រប៉ាស៊ីហ្វិក» ។
លោកបញ្ជាក់ថា សហរដ្ឋអាមេរិក ឈរនៅពីក្រោយការប្តេជ្ញាចិត្តទាំងអស់នោះ ហើយថានៅ ក្នុងបរិបទបែបនេះ វាជាកំហុសដ៏ធ្ងន់ធ្ងរមួយប្រសិនបើអ្នកណាម្នាក់ព្យាយាមផ្លាស់ប្តូរ ស្ថានភាពបច្ចុប្បន្ននេះដោយប្រើកម្លាំងទ័ព ។
ទីក្រុងប៉េកាំងតែងចាត់ទុកកោះតៃវ៉ាន់គឺជាខេត្តមួយរបស់ខ្លួន និងបានព្រមានប្រើកម្លាំងទ័ព វាយយកតៃវ៉ាន់ប្រសិនបើកោះនេះហ៊ានប្រកាសឯករាជ្យផ្តាច់ចេញពីចិន ។
ក្នុងរយៈពេលចុងក្រោយនេះ ទីក្រុងប៉េកាំងបានបញ្ជូនយន្តហោះចំបាំងរបស់ខ្លួនទៅហោះ ឆ្វែលក្បែរៗកោះតៃវ៉ាន់ដែលធ្វើឱ្យកោះតៃវ៉ាន់រអ៊ូរទាំចំពោះសកម្មភាពរបស់ទីក្រុងប៉េកាំង ។
សេតវិមានសហរដ្ឋអាមេរិកកាលពីសប្តាហ៍មុនក៏បានឱ្យដឹងដែរថាខ្លួនកំពុងតាមដានយ៉ាងយក ចិត្តទុកដាក់ពីការកើនឡើងសកម្មភាពយោធារបស់ទីក្រុងប៉េកាំងនៅច្រកសមុទ្រតៃវ៉ាន់ និង បានចាត់ទុកសកម្មភាពរបស់ចិនថាកំពុងធ្វើឱ្យមានអស្ថេរភាពខ្លាំង ។
កាលពីសប្តាហ៍មុនដែរ ក្រសួងការបរទេសអាមេរិកបានចេញគោលការណ៍ណែនាំថ្មី ដែល គោលការណ៍ណែនាំថ្មីនេះ អនុញ្ញាតិឱ្យមន្រ្តីរបស់អាមេរិកអាចជួបប្រាស្រ័យកាន់តែមានភាព សេរីជាងមុនជាមួយមន្រ្តីតៃវ៉ាន់ ។ កាយវិការនេះរបស់អាមេរិកត្រូវបានគេមើលឃើញថាជាការ ព្យាយាមធ្វើឱ្យទំនាក់ទំនងជាមួយកោះតៃវ៉ាន់កាន់តែមានភាពស៊ីជំរៅខណៈដែលតៃវ៉ាន់កំពុង តែមានភាពតានតឹងខ្លាំងជាមួយទីក្រុងប៉េកាំង ។
សារព័ត៌មាន Aljazeera បានរាយការណ៍ថា កាលពីខែមុន រដ្ឋបាលប្រធានាធិបតីអាមេរិកលោក ចូ បៃដិន បានបញ្ជូនឯកអគ្គរដ្ឋទូតអាមេរិកប្រចាំប្រទេស Palau ធ្វើដំណើរអមជាមួយ ប្រធានាធិបតីប្រទេស Palau ទៅកាន់កោះតៃវ៉ាន ។ វាជាដំណើរទស្សនកិច្ចធ្វើឡើងដោយ មន្រ្តីការទូតអាមេរិកថ្នាក់ខ្ពស់បំផុតមិនធ្លាប់មានទៅកាន់កោះតៃវ៉ាន់ចាប់តាំងពីឆ្នាំ ១៩៧៩ មក ពោលគឺចាប់ពីពេលដែលសហរដ្ឋអាមេរិកបានប្រកាសទទួលស្គាល់ «គោលនយោបាយ ចិនតែមួយ» របស់ចិន ៕
