តំបន់&អន្តរជាតិ
ចិនឱ្យអាមេរិក និងជប៉ុនឈប់ជ្រៀតជ្រែក ចូលការងារផ្ទៃក្នុងរបស់ខ្លួន
ទីក្រុងប៉េកាំងបានទាមទារឱ្យសហរដ្ឋអាមេរិក និងជប៉ុនបញ្ឈប់ការជ្រៀតជ្រែកចូលក្នុងកិច្ចការ ផ្ទៃក្នុងរបស់ប្រទេសចិន ។ ការទាមទាររបស់ប្រទេសចិននេះ បន្ទាប់ពីមេដឹកនាំសហរដ្ឋ អាមេរិក និងជប៉ុន បានជួបប្រជុំទល់មុខគ្នានៅក្នុងទីក្រុងវ៉ាស៊ីនតុន នឹងបានលើកឡើងពីការ បារម្ភរបស់ពួកគេចំពោះប្រទេសចិននៅក្នុងសេចក្តីថ្លែងការណ៍រួមរបស់ខ្លួន ក្នុងនោះរួមមាន ទាំងបញ្ហាកោះតៃវ៉ាន់ ទីក្រុងស្វយ័តហុងកុង តំបន់ស៊ីងជាំង និងបញ្ហាសមុទ្រចិនខាងត្បូងជា ដើម ។
សារព័ត៌មានចិន China Daily ផ្សាយនៅថ្ងៃទី១៩ ខែមេសា ដោយស្រង់សម្តីរបស់អ្នកនាំពាក្យ ក្រសួងការបរទេសចិនដែលបានលើកឡើងនៅក្នុងសេចក្តីថ្លែងការណ៍ថា «យើងសូមអំពាវនាវ ដល់សហរដ្ឋអាមេរិក និងជប៉ុន ឱ្យយកចិត្តទុកដាក់ចំពោះចិនដោយយកចិត្តទុកដាក់គោរព គោលការណ៍ចិនតែមួយ និងបញ្ឈប់ការជ្រៀតជ្រែកចូលកិច្ចការផ្ទៃក្នុងរបស់ចិន និងបង្កផល ប៉ះពាល់ដល់ផលប្រយោជន៍របស់ចិន» ។
អ្នកនាំពាក្យរូបនេះ ថ្លែងបញ្ជាក់ថា «ប្រទេសចិននឹងចាត់វិធានការចាំបាច់ដើម្បីការពារ អធិបតេយ្យភាព សន្តិសុខ និងផលប្រយោជន៍អភិវឌ្ឍន៍របស់ខ្លួន» ។
ការលើកឡើងរបស់អ្នកនាំពាក្យក្រសួងការបរទេសចិននេះ គឺជាការឆ្លើយតបទៅនឹងសេចក្តី ថ្លែងការណ៍រួមរបស់សហរដ្ឋអាមេរិក និងជប៉ុន នៅក្រោយជំនួបនៅទីក្រុងវ៉ាស៊ីនតុន ។
នៅក្នុងសេចក្តីថ្លែងការណ៍រួមនោះ ប្រទេសសម្ព័ន្ធមិត្តទាំងពីរលើកឡើងអំពីសារៈសំខាន់នៃ ការថែរក្សាសន្តិភាព និងស្ថេរភាពនៅច្រកសមុទ្រតៃវ៉ាន់ និងជំរុញឱ្យមានដំណោះស្រាយ ដោយសន្តិវិធីចំពោះបញ្ហានៅច្រកសមុទ្រតៃវ៉ាន់នេះ ។ ក្រៅពីនោះ មេដឹកនាំអាមេរិក និង ជប៉ុនក៏បានលើកឡើងពីបញ្ហាជំលោះដែនកោះរវាងជប៉ុន និងចិន ដែលជប៉ុនហៅថាកោះ ស៊ិនកាគូ និងចិនហៅថា ទាវយូ ព្រមទាំងបញ្ហានៅហុងកុង បញ្ហាជនជាតិអ៊ុយហ្គួរនៅតំបន់ ស៊ីងជាំង និងបញ្ហាសមុទ្រចិនខាងត្បូងផងដែរ ។
ជាការឆ្លើយតបចំពោះការលើកឡើងនេះ អ្នកនាំពាក្យក្រសួងការបរទេសចិននិយាយថា ទាំងកោះតៃវ៉ាន់ ទាំងកោះ ទាវយូ ដែលជប៉ុនហៅថា ស៊ិនកាគូ គឺសុទ្ធតែជាទឹកដីរបស់ប្រទេស ចិន ។ ចំណែករឿងហុងកុង និងតំបន់ស៊ីងជាំង គឺជាកិច្ចការផ្ទៃក្នុងរបស់ប្រទេសចិនសុទ្ធសាធ ។ រីឯរឿងសមុទ្រចិនខាងត្បូងវិញ អ្នកនាំពាក្យរូបនេះថា ប្រទេសចិនមានអធិបតេយ្យភាព ទៅលើកោះនៅសមុទ្រចិនខាងត្បូង និងដែនទឹកនៅជុំវិញកោះទាំងអស់នោះ ។
គួរបញ្ជាក់ថា នៅក្នុងជំនួបរវាងប្រធានាធិបតីអាមេរិកលោក ចូ បៃដិន និងនាយករដ្ឋមន្រ្តីជប៉ុន លោក យូស៊ិហីដេ ស៊ូហ្កា (Yoshihide Suga) កាលពីថ្ងៃទី១៦ ខែមេសា ក្រៅពីបញ្ហារបស់ ប្រទេសចិន ថ្នាក់ដឹកនាំទាំងពីរក៏បានពិភាក្សាទៅលើបញ្ហាជំងឺកូវីដ-១៩ ការប្រែប្រួលអាកាស ធាតុ បញ្ហាពាណិជ្ជកម្ម ការប្រារព្ធកីឡាអូឡាំពិកនៅទីក្រុងតូក្យូប្រទេសជប៉ុន និងបញ្ហា កូរ៉េខាងជើង ។
ជាការឆ្លើយតបចំពោះប្រទេសចិន ថ្នាក់ដឹកនាំទាំងពីរបញ្ជាក់ថា ពួកគេប្រឆាំងដាច់ខាង ចំពោះការប៉ុនប៉ងទាំងឡាយណាក្នុងការផ្លាស់ប្តូរស្ថានភាពបច្ចុប្បន្នដោយការប្រើកម្លាំងទ័ព ឬការបង្ខិតបង្ខំណាមួយ នៅក្នុងបញ្ហាសមុទ្រចិនខាងត្បូង និងសមុទ្រចិនខាងកើត ៕
