តំបន់&អន្តរជាតិ
នាយករដ្ឋមន្រ្តីឥណ្ឌា មិនចូលរួមកិច្ចប្រជុំប្រទេសអ្នកមាន G7 នៅអង់គ្លេស ដោយសារស្ថានភាពកូវីដ នៅក្នុងប្រទេស
នាយករដ្ឋមន្រ្តីឥណ្ឌា លោក ណារ៉េនដ្រា ម៉ូឌី (Narendra Modi) នឹងមិនទៅចូលរួមកិច្ចប្រជុំ កំពូលប្រទេសអ្នកមានហៅថា G7 ដែលនឹងប្រព្រឹត្តទៅនៅក្នុងប្រទេសអង់គ្លេសនៅក្នុងខែ មិថុនាខាងមុខនោះទេ ដោយសារតែវិបត្តិធ្ងន់ធ្ងរនៃជំងឺកូវីដ-១៩ នៅក្នុងប្រទេសឥណ្ឌា ។ នេះបើតាមការប្រកាសរបស់រដ្ឋាភិបាលឥណ្ឌា និងត្រូវបានចេញផ្សាយដោយទីភ្នាក់ងារ ព័ត៌មានបារាំង AFP នៅថ្ងៃទី១២ ខែឧសភា ។
G-7 foreign ministers convene in London for the first face-to-face meeting in two years, May 4, 2021. (Stefan Rousseau/Pool via Reuters)
កិច្ចប្រជុំកំពូល G7 គឺជាកិច្ចប្រជុំរវាងក្រុមប្រទេសទាំង ៧ ដែលមានសេដ្ឋកិច្ចលូតលាស់ខ្លាំង នៅលើពិភពលោក រួមមានសហរដ្ឋអាមេរិក កាណាដា ចក្រភពអង់គ្លេស បារាំង អាល្លឺម៉ង់ អ៊ីតាលី និងជប៉ុន ។ ពីមុននៅពេលប្រទេសរុស្សីត្រូវបានដាក់បញ្ចូលទៅក្នុងក្រុមប្រទេសទាំង នេះដែរនោះ ក្រុមប្រទេស G7 បានក្លាយទៅជាក្រុមប្រទេស G8 ។ ប៉ុន្តែក្រោយពេលដែល ប្រទេសរុស្សីត្រូវបានដកចេញពីក្រុម G8 ដោយសារការក្តោបក្តាប់កាន់កាប់តំបន់គ្រីមមៀ របស់ប្រទេសអ៊ុយក្រែននៅឆ្នាំ២០១៤ ក្រុមប្រទេស G8 បានត្រឡប់មកប្រើឈ្មោះ G7 ដូចដើមវិញ ។
គួរបញ្ជាក់ថា ប្រទេសឥណ្ឌាមិនមែនជាសមាជិករបស់ក្រុមប្រទេស G7 នោះទេ ប៉ុន្តែឥណ្ឌាត្រូវ បានចក្រភពអង់គ្លេសដែលជាប្រធានប្តូរវេននៅក្នុងឆ្នាំ ២០២១ នេះ អញ្ជើញឱ្យចូលរួមកិច្ចប្រជុំ កំពូលនេះដែរ ។
ទោះជាយ៉ាងណា នាយករដ្ឋមន្រ្តីឥណ្ឌានៅតែមិនអាចទៅចូលរួមបានដោយផ្ទាល់ដដែល ដោយសារតែស្ថានភាពដុនដាបនៃជំងឺកូវីដ-១៩ នៅក្នុងប្រទេស ។ បច្ចុប្បន្នឥណ្ឌាគឺជា ប្រទេសដែលមានអត្រាអ្នកឆ្លង និងស្លាប់ដោយសារជំងឺកូវីដ-១៩ ប្រចាំថ្ងៃច្រើនជាងគេនៅលើ ពិភពលោក ។ ប៉ុន្តែជាប្រទេសឈរនៅលេខរៀងទី ២ ដែលមានចំនួនអ្នកឆ្លងច្រើនជាងគេនៅ លើពិភពលោកបន្ទាប់ពីសហរដ្ឋអាមេរិក ។
លើសពីនេះ នៅក្នុងដំណើរទស្សនកិច្ចទៅកាន់ចក្រភពអង់គ្លេសកាលពីដើមខែឧសភាដើម្បី ចូលរួមកិច្ចប្រជុំរដ្ឋមន្រ្តីការបរទេស G7 គណៈប្រតិភូ នៃក្រសួងការបរទេសរបស់ឥណ្ឌា ក៏ត្រូវបានរកឃើញថាមានកើតជំងឺកូវីដ-១៩ ផងដែរ ៕
