តំបន់&អន្តរជាតិ
អ្នកកាសែតជប៉ុន ដែលរបបយោធាមីយ៉ាន់ម៉ាដោះលែង ជំរុញរដ្ឋាភិបាលជប៉ុនចាត់វិធានការតឹងរឹង ចំពោះរបបយោធា
អ្នកកាសែតជនជាតិជប៉ុនម្នាក់ដែលត្រូវបានរបបសឹកយោធាមីយ៉ាន់ម៉ាដោះលែងឱ្យមានសេរីភាពត្រលប់ទៅកាន់ប្រទេសជប៉ុនវិញ បានអំពាវនាវ នៅថ្ងៃទី២១ ខែឧសភា ឱ្យរដ្ឋាភិបាល ជប៉ុនចាត់វិធានការតឹងរឹងចំពោះរបបយោធាមីយ៉ាន់ម៉ា ជាពិសេសពិនិត្យឡើងវិញចំពោះ ជំនួយអភិវឌ្ឍន៍ដែលជប៉ុនបានផ្តល់ឱ្យប្រទេសមីយ៉ាន់ម៉ា ។
Japanese journalist Yuki Kitazumi who was detained in Myanmar and charged with spreading false news during a crackdown on media after a military coup in February, speaks to media upon his arrival at Narita Airport in Narita, Chiba prefecture, Japan, on May 14, 2021, in this photo taken by Kyodo. (Kyodo/via Reuters)
លោក យូគី គីតាហ្សូមិ (Yuki Kitazumi) ដែលជាអ្នកសារព័ត៌មានសេរីជនជាតិជប៉ុនបានរស់ នៅក្នុងប្រទេសមីយ៉ាន់ម៉ាអស់រយៈពេលពី ៣–៤ ឆ្នាំ ។ លោកគឺជាអ្នកកាសែតបរទេសសកម្ម ម្នាក់ដែលបានធ្វើសេចក្តីរាយការណ៍អំពីស្ថានការណ៍នៅក្នុងប្រទេសមីយ៉ាន់ម៉ាចាប់តាំងពី ក្រុមយោធាបានធ្វើរដ្ឋប្រហារទម្លាក់រដ្ឋាភិបាល នៃគណបក្សសម្ព័ន្ធដើម្បីលទ្ធិប្រជាធិបតេយ្យ របស់អ្នកស្រី អ៊ុងសាន ស៊ូជី នៅថ្ងៃទី១ ខែកុម្ភៈ មក ។ លោកត្រូវបានរបបយោធាបានចាប់ខ្លួន ចំនួនពីរលើកនៅក្រោយព្រឹត្តិការណ៍រដ្ឋប្រហារ ដោយចោទប្រកាន់លោកពីបទផ្សព្វផ្សាយព័ត៌ មានមិនពិត ។
ប៉ុន្តែដោយសារមានអន្តរាគមន៍ការទូតពីរដ្ឋាភិបាលជប៉ុន លោកក៏ត្រូវបានរបបយោធាមីយ៉ាន់ ម៉ាដោះលែងកាលពីពេលថ្មីៗនេះ ។
លោក គីតាហ្សូមិ បាននិយាយនៅក្នុងសន្និសីទកាសែតមួយនៅក្នុងទីក្រុងតូក្យូ ដែលត្រូវបាន សារព័ត៌មាន Reuters ស្រង់សម្តីមកផ្សព្វផ្សាយថា លោកត្រូវបានដោះលែងឱ្យមានសេរីភាព ដោយសារមានការគាំទ្រពីរដ្ឋាភិបាលជប៉ុន ។ ទោះជាយ៉ាងណា លោកថាបញ្ហានៅមីយ៉ាន់ម៉ា មិនទាន់ត្រូវបានដោះស្រាយនៅឡើយទេ ។
បើតាមសមាគមជួយអ្នកទោសនយោបាយមីយ៉ាន់ម៉ា ចាប់តាំងពីមានរដ្ឋប្រហារនៅថ្ងៃទី១ ខែកុម្ភៈ មក មានមនុស្សចំនួន ៨១០ ហើយបានស្លាប់ ដោយសារការបង្រ្កាបរបស់អាជ្ញាធរ មីយ៉ាន់ម៉ា និងមនុស្សជាង ៤ ពាន់នាក់ផ្សេងទៀតត្រូវបានចាប់ឃុំខ្លួន ចោទប្រកាន់ និង កាត់ទោស ក្នុងនោះមនុស្សចំនួន ២០ នាក់ត្រូវបានកាត់ទោសប្រហារជីវិត ។ ក្រៅពីនោះ របបយោធាបានកាត់ផ្តាច់ប្រព័ន្ធអ៊ីនធឺណិតនៅក្នុងប្រទេស បានបើកប្រតិបត្តិការវាយប្រហារ តាមផ្លូវអាកាសលើកងកម្លាំងជនជាតិភាគតិច ធ្វើទុក្ខបុកម្នេញលើកក្រុមគ្រួសារអ្នកដែល ហ៊ានចេញមុខប្រឆាំងខ្លួន និងបណ្តេញមន្រ្តីស្ថានទូតមីយ៉ាន់ម៉ានៅបរទេសចេញពីតំណែង ដោយសារតែពួកគេបាននិយាយប្រឆាំងទៅនឹងរដ្ឋប្រហាររបស់ក្រុមយោធា ជាដើម ។
លោក គីតាហ្សូមិ និយាយថា ប្រទេសជប៉ុនអាចមានឥទ្ធិពលទៅលើរបបយោធាមីយ៉ាន់ម៉ា ដោយសារតែជប៉ុនមានទំនាក់ទំនងជាប្រវត្តិសាស្រ្តជាមួយមីយ៉ាន់ម៉ា ។ លោកបានអំពាវនាវ ឱ្យរដ្ឋាភិបាលជប៉ុនចាត់វិធានការតឹងរឹងចំពោះរបបយោធាមីយ៉ាន់ម៉ាដើម្បីដោះស្រាយការប្រ ឈមរវាងរវាងចលនាគាំទ្រលទ្ធិប្រជាធិបតេយ្យជាមួយពួកឧត្តមសេនីយ៍យោធា ។
លោកថ្លែងថា «ខ្ញុំចង់ឱ្យប្រទេសជប៉ុនប្រើឥទ្ធិពលរបស់ខ្លួនដូចដែលជប៉ុនបានប្រើដើម្បីជួយខ្ញុំ ឱ្យមានសេរីភាពដើម្បីដោះស្រាយបញ្ហានៅក្នុងប្រទេសមីយ៉ាន់ម៉ា» ។
គួររំលឹកថា ជប៉ុនគឺជាប្រទេសវិនិយោគដ៏ធំបំផុតមួយ និងជាប្រភពនៃអ្នកផ្តល់ជំនួយ បច្ចេកទេស និងអភិវឌ្ឍន៍របស់មីយ៉ាន់ម៉ាចាប់តាំងពីប្រទេសនេះមានរដ្ឋាភិបាលស៊ីវិលនៅក្នុង ឆ្នាំ ២០១១ មក ។
ឆ្លើយតបចំពោះស្ថានការណ៍នៅក្នុងប្រទេសមីយ៉ាន់ម៉ានៅពេលនេះ រដ្ឋមន្រ្តីការបរទេសជប៉ុន លោក តូសិមិតស៊ូ ម៉ូតេហ្គី (Toshimitsu Motegi) បានថ្លែងឱ្យដឹងថា ប្រទេសជប៉ុនអាចនឹង ពិចារណាកាត់ផ្តាច់ជំនួយទាំងអស់ទៅកាន់ប្រទេសមីយ៉ាន់ម៉ាប្រសិនបើស្ថានភាពនៅក្នុងប្រទេសនេះ មិនមានភាពប្រសើរឡើងវិញនោះ ។
បើតាមសារព័ត៌មាន Nikkei ប្រទេសជប៉ុនបានផ្តល់ជំនួយអភិវឌ្ឍន៍ចំនួន ១,៧៤ ពាន់លាន ដុល្លារអាមេរិកដល់ប្រទេសមីយ៉ាន់ម៉ានៅឆ្នាំ ២០១៩ គឺច្រើនជាងប្រទេសណាៗទាំងអស់ដែល របាយការណ៍ជំនួយត្រូវបានលាតត្រដាង ។
លោក គីតាហ្សូមិ ដែលជាអ្នកកាសែតជប៉ុនទើបត្រូវបានរបបយោធាដោះលែងជឿជាក់ថា ការកាត់ផ្តាច់នូវគម្រោងមួយចំនួនរបស់ជប៉ុនគឺជាការបញ្ជូនសញ្ញាដ៏មានឥទ្ធិពលដល់ក្រុមរបប យោធា ហើយថាការពិនិត្យមើលឡើងវិញនូវការចូលរួមរបស់ប្រទេសជប៉ុនគឺជាការចាំបាច់ ៕
