តំបន់&អន្តរជាតិ
លោក ចូ បៃដិន ថា ចិនមិនអាចប្រជែងអាមេរិក ក្លាយជាមហាអំណាចពិភពលោកបានទេ
ប្រធានាធិបតីអាមេរិក លោក ចូ បៃដិន មានប្រសាសន៍ថា លោកនឹងរារាំងប្រទេសចិនមិនឱ្យ យកឈ្នះអាមេរិកដើម្បីក្លាយជាប្រទេសមហាអំណាចគ្រប់គ្រងពិភពលោកនោះឡើយ ។
US President Joe Biden vows to invest heavily to ensure America prevails in the race with China.PHOTO: AFP
លោក ចូ បៃដិន ថ្លែងដូចនេះនៅក្នុងសន្និសីទសារព័ត៌មានជាលើកដំបូងដែលលោកបានធ្វើ នៅឯសេតវិមានចាប់តាំងពីបានឡើងកាន់តំណែងជាប្រធានាធិបតីអាមេរិកនៅថ្ងៃទី២០ ខែមករា មក និងត្រូវបានផ្សាយដោយសារព័ត៌មាន Reuters នៅព្រឹកថ្ងៃទី២៦ ខែមីនា នេះ ។
លោក ចូ បៃដិន បានថ្លែងថា ប្រទេសចិនមានគោលដៅដើម្បីក្លាយជាប្រទេសឈានមុខគេ នៅលើពិភពលោក ជាប្រទេសអ្នកមានជាងគេនៅលើពិភពលោក និងជាប្រទេសមហា អំណាចខ្លាំងជាងគេនៅលើពិភពលោក ប៉ុន្តែលោកថា វាមិនអាចកើតឡើងរួចនោះទេ ពីព្រោះ សហរដ្ឋអាមេរិកនឹងបន្តរីកលូតលាស់ជាងនេះទៀត ។
លោក ចូ បៃដិន បានថ្លែងកត់សម្គាល់សំដៅទៅលើប្រធានាធិបតីចិន លោក ស៊ី ជិនពិន ថា មានចរិតដូចទៅនឹងប្រធានាធិបតីរុស្សី លោក Vladimir Putin ដែលបានឱ្យតំលៃទៅលើការ ដឹកនាំរបៀបផ្តាច់ការ និងមើលស្រាលទៅលើប្រជាធិបតេយ្យ ។ លោក បៃដិន ថា ពាក្យប្រជាធិបតេយ្យមិនមាននៅក្នុងខ្លួនរបស់លោក ស៊ី ជិនពិន សូម្បីតែបន្តិចឡើយ ។ ប៉ុន្តែលោកទទួលស្គាល់ថា ប្រធានាធិបតីចិនបច្ចុប្បន្នជាមនុស្សឆ្លាតម្នាក់ ។
មិនទាន់ឃើញមានការឆ្លើយតបបែបណាពីទីក្រុងប៉េកាំងនៅឡើយចំពោះការលើកឡើងរបស់ របស់លោក ចូ បៃដិន នៅពេលនេះ ប៉ុន្តែនៅក្នុងកិច្ចសម្ភាសន៍ជាមួយសារព័ត៌មាន CNN ឯកអគ្គរដ្ឋទូតចិនប្រចាំសហរដ្ឋអាមេរិក លោក Cui Tiankai និយាយថា គោលដៅរបស់ចិនគឺ បំពេញនូវបំណងប្រាថា្នរបស់ប្រជាជនចិនដែលឱ្យជីវិតកាន់តែល្អប្រសើរ ។ លោកថាគោល ដៅរបស់ប្រទេសចិនគឺមិនប្រកួតប្រជែងជាមួយប្រទេសណាមួយ ឬដើម្បីជំនួសប្រទេសណា មួយផ្សេងទៀតនោះទេ ។
លោកពន្យល់ថា «យើងមិនមានគោលបំណងប៉ុនប៉ងបំបែកពិភពលោកទៅជាជំរុំផ្សេងគ្នា ឬ កសាងប្លុកយោធាប្រឈមមុខដាកគ្នានោះទេ យើងមិនគិតថាវិធីសាស្រ្តបែបនេះវាជាដំណោះ ស្រាយនោះទេ» ។
ទំនាក់ទំនងរវាងអាមេរិក និងចិន ហាក់ពុំទាន់ឃើញមានសញ្ញាល្អនៅឡើយនៅក្នុងរដ្ឋបាល របស់លោក ចូ បៃដិន ។ ប្រទេសទាំងពីរកំពុងមានប្រធានបទប្រទាំងប្រទើសជាមួយគ្នាច្រើន និងកំពុងផ្លោងសំដីដាក់គ្នាទៅវិញទៅមក ។ អាមេរិកចោទចិនរឿងរំលោភសិទ្ធិមនុស្ស រឿងគាបសង្កត់ហុងកុង រឿងគំរាមកំហែងកោះតៃវ៉ាន់ រឿងវាតទីនៅសមុទ្រចិនខាងត្បូង និងរឿងរកស៊ីមិនស្មោះត្រង់ ។ល។ ចំណែកចិនចោទអាមេរិកថាចូលចិត្តដើរជ្រៀតជ្រែកចូល ការងារផ្ទៃក្នុងរបស់ប្រទេសដទៃ ចូលចិត្តគំរាមកំហែងគេឯងដោយកម្លាំងសព្វាវុធ ជាដើម ។
លោក ចូ បៃដិន បានបញ្ជាក់ជាថ្មីថា សហរដ្ឋអាមេរិកនឹងធ្វើការជាមួយសម្ព័ន្ធមិត្តរបស់ ខ្លួនដើម្បីឲ្យចិនទទួលខុសត្រូវចំពោះសកម្មភាពរបស់ខ្លួនលើកោះតៃវ៉ាន់ ហុងកុង សមុទ្រចិនខាងត្បូង និងការប្រព្រឹត្តរបស់ខ្លួនលើជនជាតិភាគតិចអ៊ុយហ្គួរកាន់សាសនា អ៊ីស្លាម ក៏ដូចជាជំរុញឱ្យទីក្រុងប៉េកាំងប្រកាន់ខ្ជាប់នូវច្បាប់អន្តរជាតិសម្រាប់ពាណិជ្ជកម្ម ត្រឹមត្រូវ ។
ទោះជាយ៉ាងណា ចិនតែងបានបដិសេធថាខ្លួនមិនបានរំលោភសិទ្ធិមនុស្សលើជនជាតិ អ៊ុយហ្គួរនោះទេ និងបានទាមទារឱ្យអាមេរិកឈប់លូកលាន់ចូលការងារផ្ទៃក្នុងរបស់ខ្លួនបន្ត ទៀត ៕
