លោក បៃដិន និយាយថា ការពារ NATO គឺជាកាតព្វកិច្ចពិសិដ្ឋរបស់អាមេរិក

ប្រធានាធិបតីអាមេរិក លោក ចូ បៃដិន បានថ្លែងប្រាប់មេដឹកនាំប្រទេសដែលជាសមាជិកនៃ បក្សសម្ព័ន្ធយោធាណាតូ នៅក្នុងកិច្ចប្រជុំកំពូលអង្គការណាតូ នៅក្នុងទីក្រុងប្រ៊ុយសែល ប្រទេសប៊ែលហ្សិក កាលពីថ្ងៃទី១៤ ខែមិថុនា ថា ការពារទ្វីបអឺរ៉ុប ប្រទេសតួគី និងកាណាដា គឺជាកាតព្វកិច្ចពិសិដ្ឋសម្រាប់សហរដ្ឋអាមេរិក ។

ខុសពីអតីតប្រធានាធិបតីអាមេរិក លោក ដូណាល់ ត្រាំ ដែលបានធ្វើឱ្យទំនាក់ទំនងជាមួយ អង្គការណាតូមានភាពរកាំរកូសមួយចំនួន លោក ចូ បៃដិន បានព្យាយាមនាំយកអាមេរិកត្រ ឡប់មកស្និទ្ធស្នាលជាមួយសម្ព័ន្ធមិត្តរបស់ខ្លួនឡើងវិញ ក្នុងគោលបំណងដែលគេមើលឃើញ ថាដើម្បីប្រមូលផ្តុំកម្លាំងសម្ព័ន្ធមិត្តទប់ទល់ទៅនឹងការកើនឡើងអំណាចយោធារបស់ប្រទេស ចិន និងដើម្បីបង្ហាញការរួបរួមគ្នានៅចំពោះមុខអនុត្តរភាពជាមួយប្រទេសរុស្សី ។

សារព័ត៌មាន Reuters បានផ្សាយសម្តីរបស់លោក ចូ បៃដិន ដោយបានលើកឡើងថា មាត្រា ៥ នៃបក្សសម្ព័ន្ធអង្គការណាតូ គឺជាកាតព្វកិច្ចដ៏ពិសិដ្ឋ ហើយលោកក៏ចង់ឱ្យសហភាពអឺរ៉ុបទាំង មូលដឹងថា សហរដ្ឋអាមេរិកតែងនៅជាមួយសម្ព័ន្ធមិត្តរបស់ខ្លួន ។ លោកបញ្ជាក់ថា អង្គការ ណាតូ មានសារៈសំខាន់ខ្លាំងណាស់សម្រាប់សម្ព័ន្ធមិត្ត ។

អគ្គលេខាធិការ នៃអង្គការណាតូ លោក ជេនស៍ ស្តូលតែនប៊ើក (Jens Stoltenberg) និយាយថា ការកើនឡើងនៃ​វត្តមានយោធារបស់ចិនចាប់ពីតំបន់បាល់ទិក រហូតដល់ទ្វីបអាហ្វ្រិក គឺជាអ្វី ដែលអង្គការណាតូត្រូវត្រៀមលក្ខណៈដើម្បីឆ្លើយតប ។

លោកបញ្ជាក់ថា «ចិនកំពុងតែខិតជិតមកពួកយើង យើងឃើញចិននៅទីលំហអាកាស យើង ឃើញចិននៅទ្វីបអាហ្រ្វិក ។ ក្នុងពេលជាមួយគ្នា យើងក៏បានឃើញចិនវិនិយោគយ៉ាងសម្បើម នៅក្នុងរចនាសម្ព័ន្ធចំបងៗរបស់យើងផងដែរ ។ យើងត្រូវតែមានការឆ្លើយតបជាមួយគ្នាជា សម្ព័ន្ធមិត្ត» ។

កាលពីក្នុងកិច្ចប្រជុំកំពូលនៃក្រុមប្រទេស G7 នៅក្នុងប្រទេសអង់គ្លេស ដែលរួមមានសហរដ្ឋ អាមេរិក កាណាដា ជប៉ុន បារាំង អង់គ្លេស អាល្លឺម៉ង់ និងអ៊ីតាលី ក្រុមប្រទេស G7 បានវាយ ប្រហារទៅលើ ការរំលោភសិទ្ធិមនុស្សរបស់ប្រទេសចិនទៅលើអ្នកសាសនាអ៊ីស្លាមនៅក្នុង តំបន់ស៊ីងជាំង ការរំលោភសិទ្ធិមនុស្សនៅទីក្រុងហុងកុង បញ្ហាកោះតៃវ៉ាន់ និងទាមទារឱ្យមាន ការស៊ើបអង្កេតឡើងវិញពីប្រភពចំលងនៃជំងឺកូវីដ-១៩ នៅក្នុងប្រទេសចិនជាដើម ។

ប្រទេសចិនបានឆ្លើយតបដោយបង្ហាញការប្រឆាំងចំពោះការលើកឡើងរបស់ក្រុមប្រទេស G7 ពាក់ព័ន្ធនឹងតំបន់ស៊ីងជាំង ទីក្រុងហុងកុង និងកោះតៃវ៉ាន់ ដែលចិនចាត់ទុកថាជាការបំភ្លៃការ ពិត និងចេតនាអាក្រក់របស់ប្រទេសមួយចំនួនជាពិសេសសហរដ្ឋអាមេរិកមកលើប្រទេសចិន ។ ស្ថានទូតចិនប្រចាំនៅទីក្រុងឡុងដ៍ មានប្រតិកម្មតបថា កិត្តិយសរបស់ប្រទេសចិនមិនអាច ត្រូវបានគេយកទៅមួលបង្កាច់បាននោះឡើយ ៕