តំបន់&អន្តរជាតិ
ចិនសោកស្តាយ ដែលអាមេរិករាំងខ្ទប់សេចក្តីថ្លែងការណ៍ ក្រុមប្រឹក្សាសន្តិសុខអង្គការសហប្រជាជាតិ ស្តីពីអំពើហិង្សារវាងអ៊ីស្រាអែល និងក្រុមហាម៉ាស់
ប្រទេសចិនតាមរយៈរដ្ឋមន្រ្តីការបរទេសរបស់ខ្លួនបានសម្តែងការសោកស្តាយចំពោះសហរដ្ឋ អាមេរិកដែលបានរាំងខ្ទប់សេចក្តីថ្លែងការណ៍នៃក្រុមប្រឹក្សាសន្តិសុខអង្គការសហប្រជាជាតិ មួយលើកជាពីរលើកស្តីអំពីអំពើហិង្សាកំពុងកើតឡើងរវាងប្រទេសអ៊ីស្រាអែល និងក្រុម ប៉ាឡេស្ទីនហាម៉ាស់ដែលគ្រប់គ្រងនៅតំបន់ហ្កាហ្សានៅពេលនេះ ។
Chinese State Councilor & Foreign Minister Wang Yi
ក្រុមប្រឹក្សាសន្តិសុខអង្គការសហប្រជាជាតិ កំពុងព្យាយាមឱ្យមានកិច្ចប្រឹងប្រែងកាន់តែទូលំទូលាយ ដើម្បីស្វែងរកដំណោះស្រាយ និងបញ្ចប់នូវការបង្ហូរឈាមរវាងអ៊ីស្រាអែល និងប៉ាឡេស្ទីន ។
ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃអាទិត្យបានបើកកិច្ចប្រជុំតាមបណ្តាញ អនឡាញជាសាធារណៈដើម្បីបន្តជជែករិះរកដំណោះស្រាយបញ្ចប់អំពើហិង្សារវាងអ៊ីស្រាអែល និងក្រុមហាម៉ាស់ប៉ាឡេស្ទីន ។ នេះជាលើកទី៣ហើយដែលក្រុមប្រឹក្សាសន្តិសុខអង្គការ សហប្រជាជាតិបានកោះប្រជុំបន្ទាន់ចាប់តាំងពីមានការប្រយុទ្ធរវាងអ៊ីស្រាអែល និងពួក ហាម៉ាស់នៅថ្ងៃទី១០ ឧសភា មក ។ ការប្រយុទ្ធគ្នាដែលមកដល់ពេលនេះបានបណ្តាលឱ្យ ប្រជាជនប៉ាឡេស្ទីនចំនួន ១៨១ នាក់បាត់បង់ជីវិត ក្នុងនោះកុមារមានចំនួន ៥១ នាក់ ខណៈដែលភាគីអ៊ីស្រាអែលបានបាត់បង់ជីវិតមនុស្សចំនួន ១០ នាក់ ក្នុងនោះ ២ នាក់ជាកុមារ ។
ប្រទេសចិនគឺជាប្រធានប្តូរវេននៃក្រុមប្រឹក្សាសន្តិសុខអង្គការសហប្រជាជាតិដែលមានប្រទេស ជាសមាជិកចំនួន ១៥ នៅក្នុងខែឧសភា នេះ ។ ប្រទេសចំនួន ៥ ដែលជាសមាជិកអចិន្រ្តៃយ៍ រួមមាន សហរដ្ឋអាមេរិក អង់គ្លេស បារាំង ចិន រុស្សី មានសិទ្ធិអំណាចវ៉េតូ (Veto) ។ ចំណែក ប្រទេស ១០ ផ្សេងទៀត គឺជាសមាជិកមិនអចិន្រ្តៃយ៍ដែលមានអាណត្តិពីរឆ្នាំ និងគ្មានអំណាច វ៉េតូនោះឡើយ ។
រដ្ឋមន្រ្តីការបរទេសចិន លោក វ៉ាង យី (Wang Yi) បានថ្លែងប្រាប់កិច្ចប្រជុំ នៃក្រុមប្រឹក្សាសន្តិ សុខអង្គការប្រជាជាតិថា ប្រទេសចិនមានការសោកស្តាយដែលក្រុមប្រឹក្សាសន្តិសុខអង្គការ សហប្រជាជាតិមិនអាចនិយាយក្នុងសំឡេងតែមួយ ដោយសារតែមានការរាំងខ្ទប់របស់ ប្រទេសមួយ ដែលលោកសំដៅទៅលើសហរដ្ឋអាមេរិក ។ នេះបើតាមការផ្សាយរបស់ទីភា្នក់ ងារព័ត៌មានបារាំង អាអេហ្វប៉េ (AFP) នៅថ្ងៃទី១៧ ឧសភា ។
ក្រុមប្រឹក្សាសន្តិសុខអង្គការសហប្រជាជាតិគ្រោងជួបប្រជុំជាលើកទី ៣ តាំងពីថ្ងៃទី១៤ ឧសភា ប៉ុន្តែត្រូវសហរដ្ឋអាមេរិកស្នើឱ្យពន្យាពេលដើម្បីអាមេរិកមានពេលវេលាធ្វើការងារការទូត ជាមួយភាគីជំលោះ ។
រដ្ឋបាលប្រធានាធិបតីអាមេរិក លោក ចូ បៃដិន បានលើកឡើងថា អាមេរិកកំពុងតែធ្វើការនៅ ខាងក្រោយឆាក ហើយថា សេចក្តីថ្លែងការណ៍ណាមួយរបស់ក្រុមប្រឹក្សាអង្គការសហ ប្រជាជាតិអាចធ្វើឱ្យបង្អាក់ដល់ដំណើរការស្វែងរកដំណោះស្រាយ ។
ចាប់តាំងពីមានការប្រយុទ្ធគ្នាមករវាងអ៊ីស្រាអែល និងក្រុមហាម៉ាស សហរដ្ឋអាមេរិកក៏បាន ទទូចឱ្យភាគីទាំងពីរមានការអត់ធ្មត់ និងសំដែងការបារម្ភចំពោះការបាត់បង់ជីវិតរបស់ជន ស៊ីវិលស្លូតត្រង់ដែលមានរួមមានទាំងកុមារ និងស្ត្រី ។
ទោះជាយ៉ាងណាក៏ដោយ ក្នុងពេលជាមួយគ្នា រដ្ឋបាលប្រធានាធិបតី ចូ បៃដិន បានប្រកាស ថា អ៊ីស្រាអែលមានសិទ្ធិក្នុងការការពារខ្លួនពីការបាញ់គ្រាប់រ៉ុកកែតចូលទឹកដីអ៊ីស្រាអែល ។
លោក វ៉ាង យី បានទទូចឱ្យមានបទឈប់បាញ់ជាបន្ទាន់ និងអំពាវនាវឱ្យក្រុមប្រឹក្សាសន្តិសុខ អង្គការសហប្រជាជាតិចាត់វិធានការខ្លាំងក្លាដែលរួមមានការគាំទ្រឱ្យមានដំណោះស្រាយ ឈានដល់ការបង្កើតរដ្ឋពីរនៅក្បែរគ្នា ។
លោកថា ប្រទេសចិនស្វាគមន៍ឱ្យមានការរៀបចំជំនួបពិភាក្សារវាងតំណាងអ៊ីស្រាអែល និងប៉ាឡេស្ទីនដើម្បីស្វែងរកដំណោះស្រាយ ៕
