តំបន់&អន្តរជាតិ
របបយោធាមីយ៉ាន់ម៉ាអាចរងការចោទប្រកាន់ ពីបទឧក្រិដ្ឋកម្មប្រឆាំងមនុស្សជាតិ
អ្នកជំនាញជាន់ខ្ពស់ផ្នែកសិទ្ធិមនុស្សអង្គការសហប្រជាជាតិ បានលើកឡើងនៅចំពោះមុខ ក្រុមប្រឹក្សាសិទ្ធិមនុស្សអង្គការសហប្រជាជាតិថា របបយោធាមីយ៉ាន់ម៉ាទំនងជាបានប្រព្រឹត្ត ឧក្រិដ្ឋកម្មប្រឆាំងមនុស្សជាតិ ។ នេះបើតាមចេញផ្សាយរបស់ទីភ្នាក់ងារព័ត៌មាន AFP នៅថ្ងៃទី១២ ខែមីនា នេះ ។
លោក Thomas Andrews ដែលជាអ្នករាយការណ៍ពិសេសរបស់អង្គការសហប្រជាជាតិ បាន បញ្ជាក់ថា គិតមកដល់ពេលនេះ មានមនុស្សយ៉ាងហោចណាស់ក៏ ៧០ ហើយដែលត្រូវបាន របបយោធាបាញ់សម្លាប់ ចាប់តាំងពីមានរដ្ឋប្រហារនៅថ្ងៃទី១ ខែកុម្ភៈ មក ។
លោកបានប្រាប់ក្រុមប្រឹក្សាសិទ្ធិមនុស្សអង្គការសហប្រជាជាតិនៅទីក្រុងហ្សឺណែវថា ប្រទេសមីយ៉ាន់ម៉ានៅក្នុងពេលនេះ កំពុងស្ថិតក្រោមការគ្រប់គ្រងដោយរបបខុសច្បាប់ និងរបបកាប់សម្លាប់មនុស្ស ។
លោកអះអាងថា មានភស្តុតាងកាន់តែច្រើនឡើងដែលបញ្ជាក់ថាក្រុមយោធាទំនងបាន ប្រព្រឹត្តបទឧក្រិដ្ឋកម្មប្រឆាំងមនុស្សជាតិ ដែលរួមមានសកម្មភាពសម្លាប់ ការបាត់ខ្លួនដោយ បង្ខំ ការធ្វើទុកបុកម្នេញ និងការធ្វើទារុណកម្ម ហើយសកម្មភាពឧក្រិដ្ឋកម្មទាំងអស់នេះ វាមានលក្ខណៈបើកចំហ ទូលំទូលាយ មានលក្ខណៈជាប្រព័ន្ធ និងជាយុទ្ធនាការដែលបាន រៀបចំទុកជាមុន ។
លើសពីនេះទៀត លោកថា សកម្មភាពឧក្រិដ្ឋកម្មទាំងនេះ ត្រូវបានប្រព្រឹត្តដោយមានការដឹង ឮពីសំណាក់មន្រ្តីយោធាជាន់ខ្ពស់របស់មីយ៉ាន់ម៉ា ក្នុងនោះក៏មានមេដឹកនាំកំពូលយោធា លោក Min Aung Hlaing ផងដែរ ។
ឆ្លើយតបចំពោះការលើកឡើងរបស់លោក Thomas Andrews នេះ លេខាអចិន្រ្តៃយ៍នៃក្រសួង ការបរទេសមីយ៉ាន់ម៉ាលោក Chan Aye បានថ្លែងប្រាប់ក្រុមប្រឹក្សាសិទ្ធិមនុស្សអង្គការសហប្រ ជាជាតិតាមរយៈសារនៅលើវីដេអូថា អាជ្ញាធរមីយ៉ាន់ម៉ាបានបង្ហាញនូវការអត់ធ្មត់ខ្លាំងនៅ ចំពោះមុខការតវ៉ាដោយហិង្សា ។
ទោះជាយ៉ាងណា លោក Thomas Andrews ឆ្លើយតបថា រហូតមកដល់ពេលនេះមានមនុស្ស មិនតិចជាង ៧០ នាក់ទេ ត្រូវបានសម្លាប់ និងប្រមាណ ២.០០០ នាក់ផ្សេងទៀតត្រូវបាន អាជ្ញាធរចាប់ឃុំខ្លួន ៕
