តំបន់&អន្តរជាតិ
មិនបន្ធូរដៃ ក្រុមយោធាមីយ៉ាន់ម៉ាបន្តបង្ក្រាបបណ្តាលឱ្យបាតុករយ៉ាងតិច ១៨ នាក់ស្លាប់
មានមនុស្សយ៉ាងហោចណាស់ក៏ ១៨ នាក់ដែរបានស្លាប់នៅក្នុងប្រទេសមីយ៉ាន់ម៉ាដោយសារ ការបង្រ្កាបរបស់របបយោធាទៅលើក្រុមបាតុករគាំទ្រលិទ្ធិប្រជាធិបតេយ្យ ។ នេះបើតាមការ បញ្ជាក់ពីការិយាល័យសិទ្ធិមនុស្ស នៃអង្គការសហប្រជាជាតិ ដែលផ្សព្វផ្សាយដោយទីភ្នាក់ងារ សារព័ត៌មាន Reuters ។
Police gesture toward protesters as security forces crack down on demonstrations against the military coup in Yangon on February 28, 2021. (Photo by Sai Aung Main / AFP) (Photo by SAI AUNG MAIN/AFP via Getty Images)
ការិយាល័យសិទ្ធិមនុស្សអង្គការសហប្រជាជាតិបញ្ជាក់ថា ប៉ូលីសមីយ៉ាន់ម៉ាបានប្រើកាំភ្លើង បាញ់ទៅលើហ្វូងបាតុករសឹងនៅគ្រប់ទីតាំងដែលមានបាតុកម្មនៅក្នុងប្រទេសកាលពីថ្ងៃទី ២៨ ខែកុម្ភៈ ដែលបណ្តាលឱ្យមានមនុស្សមិនតិចជាង ១៨ នាក់ទេ បានបាត់បង់ជីវិត និងជាង ៣០ នាក់ទៀតរងរបួស ។
ការបង្រ្កាបដោយប្រើកាំភ្លើងបាញ់ទៅលើហ្វូងបាតុករត្រូវបានគេចាត់ទុកថាជាការប្រើអំពើ ហិង្សា និងជាការបង្ហូរឈាមធ្ងន់ធ្ងរបំផុតទៅលើបាតុករមីយ៉ាន់ម៉ាចាប់ពីផ្ទុះបាតុកម្មប្រឆាំង របបយោធាក្រោយពីមានរដ្ឋប្រហារនៅក្នុងប្រទេសនៅថ្ងៃទី១ ខែកុម្ភៈ មក ។
បើទោះជារបបយោធាមីយ៉ាន់ម៉ា ទទួលរងនូវការរិះគន់ធ្ងន់ធ្ងរ និងការគំរាមដកទណ្ឌកម្មពី សហគមន៍អន្តរជាតិជាបន្តបន្ទាប់ក្តី តែរបបនេះ ហាក់មិនបន្ធូរដៃឡើយទៅលើក្រុមអ្នកតវ៉ា ដែលទាមទាមលិទ្ធិប្រជាធិបតេយ្យ ៕
