តំបន់&អន្តរជាតិ
ឯកអគ្គរដ្ឋទូតមីយ៉ាន់ម៉ាប្រចាំចក្រភពអង់គ្លេស ដែលប្រឆាំងរបបយោធា ត្រូវបានក្រុមស្និទ្ធនឹងរបបយោធាបិទទ្វារមិនឱ្យចូលស្ថានទូត
ឯកអគ្គរដ្ឋទូតមីយ៉ាន់ម៉ាប្រចាំនៅចក្រភពអង់គ្លេសដែលធ្លាប់បានទាមទារឱ្យរបបយោធា ដោះលែងអ្នកស្រី អ៊ុងសាន ស៊ូជី នៅពេលនេះត្រូវបានក្រុមស្និទ្ធជាមួយរបបយោធា បិទទ្វារមិនឱ្យចូលស្ថានទូត ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP នៅព្រឹកថ្ងៃទី៨ ខែមេសា ។
Myanmar’s ambassador to the UK Kyaw Zwar Minn (R) speaks to a police officer outside the embassy in London. PA Media
ហេតុការណ៍នេះបានកើតឡើងកាលពីយប់ថ្ងៃទី៧ ខែមេសា ។ ឯកអគ្គរដ្ឋទូតមីយ៉ាន់ម៉ាប្រចាំ នៅចក្រភពអង់គ្លេស លោក Kyaw Zwar Minn ចោទប្រកាន់ថា របបយោធាជាអ្នករៀបចំផែន ការនេះ ។
ក្រោយមានហេតុការណ៍នេះ បាតុករដែលគាំទ្រលោក Kyaw Zwar Minn បានមកជួបជុំគ្នា តវ៉ានៅមុខស្ថានទូតជាមួយលោក Kyaw Zwar Minn ។ នៅពេលអ្នកកាសែតសួរថា តើអ្នកណានៅខាងក្នុងស្ថានទូត និងហាមមិនឱ្យលោកចូល លោកបានឆ្លើយថាគឺក្រុមអនុព័ន្ធ យោធា ។
ទោះជាយ៉ាងណា លោក Kyaw Zwar Minn ថាលោកនឹងមិនទៅណានោះទេ និងនៅតែទាម ទារចូលស្ថានទូតដែលលោកចាត់ទុកថាជាអគាររបស់លោកនៅឡើយ ។
កាលពីខែមុន របបសឹកយោធាបានកោះហៅលោក Kyaw Zwar Minn ឱ្យចូលប្រទេសវិញ ក្រោយពីលោកបានចេញសេចក្តីថ្លែងការណ៍ទាមទារឱ្យរបបសឹកយោធាដោះលែងអ្នកស្រី អ៊ុងសាន ស៊ូជី និងប្រធានាធិបតី Win Myint ។ ប៉ុន្តែគេមិនឃើញលោក Kyaw Zwar Minn ធ្វើតាមការបញ្ជារបស់របបយោធានោះឡើយ ។
ការិយាល័យការបរទេសចក្រភពអង់គ្លេសដែលកន្លងទៅបានធ្វើការរិះគន់ចំពោះរដ្ឋប្រហារនៅ ប្រទេសមីយ៉ាន់ម៉ា ឱ្យដឹងថា ពួកគេកំពុងតែប្រមូលព័ត៌មានបន្ថែមទៀតអំពីហេតុការណ៍ដែល បានកើតឡើងចំពោះឯកអគ្គរដ្ឋទូត Kyaw Zwar Minn និងថាអាជ្ញាធរបានដឹងពីស្ថានភាពទាំង អស់នេះរួចហើយ ។
លោក Kyaw Zwar Minn បាននិយាយប្រាប់សារព័ត៌មានអង់គ្លេស Daily Telegraph ថា ក្រុមស្និទ្ធនឹងរបបយោធាបានឆ្លៀតឱកាសក្តោបក្តាប់ស្ថានទូតនៅពេលលោកបានចាកចេញពីស្ថានទូត ។ លោកបានអំពាវនាវឱ្យរដ្ឋាភិបាលអង់គ្លេសជួយអន្តរាគមន៍អំពីរឿងនេះ ។ លោកនិយាយថា អ្នកដណ្តើមកាន់កាប់ទីតាំងស្ថានទូតបានប្រាប់ថាពួកគេទទូលការណែនាំពី របបយោធាឱ្យធ្វើដូចនេះ ៕
