តំបន់&អន្តរជាតិ
មានមន្រ្តីនៃគណបក្ស NLD ទី ២ ស្លាប់ក្នុងពេលជាប់ឃុំដោយក្រុមយោធាមីយ៉ាន់ម៉ា
មន្រ្តីនៃគណបក្សសម្ព័ន្ធដើម្បីលទ្ធិប្រជាធិបតេយ្យរបស់អ្នកស្រី អ៊ុងសាន ស៊ូជី ម្នាក់ទៀតបាន ស្លាប់នៅក្នុងពេលជាប់ឃុំឃាំងដោយរបបយោធាមីយ៉ាន់ម៉ា ដែលនេះជាករណីទី២ ហើយ ដែលមន្ត្រី នៃគណបក្ស NLD បានស្លាប់ក្នុងពេលកំពុងជាប់ឃុំ ។
Protesters hold up the three finger salute at the Sittaung River during a demonstration against the military coup in Naypyidaw on Mar 9, 2021. (Photo: AFP/STR)
សារព័ត៌មាន CNA បានផ្សាយដោយស្រង់សម្តីសមាជិកសភានៃគណបក្ស NLD លោក Ba Myo Thein ដែលបានឱ្យដឹងថា មន្រ្តីដែលបានស្លាប់នោះឈ្មោះ Zaw Myat Linn ។ លោកត្រូវ បានក្រុមយោធាចាប់ខ្លួនកាលពីពេលរសៀលថ្ងៃទី៩ ខែមីនា ហើយបានស្លាប់ប៉ុន្មានម៉ោង ក្រោយការចាប់ឃុំខ្លួននោះ ។
លោក Ba Myo Thein បញ្ជាក់ថា សាកសពរបស់មន្រ្តីរូបនោះត្រូវបានក្រុមគ្រួសារ និងសាច់ ញាតិព្យាយាមយកចេញពីមន្ទីរពេទ្យយោធាមីយ៉ាន់ម៉ា ។
ចាប់តាំងពីមានរដ្ឋប្រហារដោយក្រុមយោធាទម្លាក់រដ្ឋាភិបាលដឹកនាំដោយគណបក្ស LND នៅថ្ងៃទី១ ខែកុម្ភៈ មក មានមនុស្សជាង ៦០ នាក់ហើយបានស្លាប់ដោយសារការបង្រ្កាបរបស់ របបយោធា និងមនុស្សប្រមាណ ១.៨០០ នាក់ទៀតត្រូវបានពួកយោធាចាប់ឃុំខ្លួន ។
សហគមន៍អន្តរជាតិរួមមាន អង្គការសហប្រជាជាតិ សហរដ្ឋអាមរិក ចក្រភពអង់គ្លេស សហភាពអឺរ៉ុប បានថ្កោលទោសចំពោះការបង្រ្កាបរបស់ក្រុមយោធាលើជនស៊ីវិល និងបាន ចាត់វិធានការដាក់ទណ្ឌកម្មមួយចំនួនទៅលើរបបយោធារួចហើយ ។ ទោះជាយ៉ាងណា ក្រុមយោធាហាក់ដូចជាមិនទាន់បន្ធូរដៃបង្រ្កាបទៅលើប្រជាជនរបស់ខ្លួននៅឡើយទេ ។ រូបភាពដែលទទួលបាននៅតែបង្ហាញថា ក្រុមយោធាបានប្រើអំពើហិង្សាឃោរឃៅទៅលើជន ស៊ីវិលដដែល ។
ប៉ុន្តែទង្វើឃោរឃៅរបស់ក្រុមយោធានេះ ក៏កំពុងធ្វើឱ្យពួកគេបាត់បង់នូវការគំាទ្រជាបន្តបន្ទាប់ ពីមនុស្សដែលស្ថិតនៅក្នុងក្រុមរបស់ពួកគេដែរ ។ ក្នុងនោះគេឃើញថា ឯកអគ្គរដ្ឋទូតមីយ៉ាន់ ម៉ាប្រចាំនៅអង្គការសហប្រជាជាតិ នៅចក្រភពអង់គ្លេស និងនៅសហរដ្ឋអាមារិក សុទ្ធតែបាន បង្ហាញនូវការបារម្ភ និងប្រឆាំងទៅនឹងការបង្រ្កាបរបស់ក្រុមយោធាទៅលើជនស៊ីវិល ។ ក្នុងពេលជាមួយគ្នា ក្រុមប៉ូលីសមួយចំនួនដែលត្រូវបានរបបយោធាបញ្ជាឱ្យបង្រ្កាបទៅលើ បាតុករក៏បានរត់ភៀសខ្លួនទៅកាន់ប្រទេសឥណ្ឌាដោយសារតែពួកគេមិនស្តាប់តាមការណែនាំ របស់របបយោធាឱ្យប្រើហិង្សាទៅលើប្រជាពលរដ្ឋរបស់ខ្លួន ។
ចំណែកប្រជាជនមីយ៉ាន់ម៉ាវិញ នៅតែបន្តចុះថ្នល់ប្រមូលផ្តុំការតវ៉ា បើទោះជាប្រឈមនឹងការ បង្រ្កាបដោយក្រុមយោធាក្តី ៕
