តំបន់&អន្តរជាតិ
អាមេរិកថ្កោលទោសចិនរឿងប្តូរប្រព័ន្ធបោះឆ្នោត នៅហុងកុង
សហរដ្ឋអាមេរិកនៅថ្ងៃទី១២ ខែមីនា នេះ បានចេញមុខថ្កោលទោសទីក្រុងប៉េកាំងដែលបាន ធ្វើសកម្មភាពផ្លាស់ប្តូរប្រព័ន្ធបោះឆ្នោតសម្រាប់តំបន់ស្វយ័តក្រុងហុងកុង និងបានព្រមានថា កិច្ចពិភាក្សាដែលគ្រោងធ្វើរវាងមន្រ្តីការទូតជាន់ខ្ពស់អាមេរិក និងចិនក្នុងសប្តាហ៍ក្រោយ នឹងអាចមានភាពលំបាក ក្នុងពេលដែលសហរដ្ឋអាមេរិកនិយាយថាខ្លួនក៏នឹងលើក ករណីប្រល័យពូជសាសន៍នៅក្នុងតំបន់ស៊ីងជាំងជាមួយភាគីចិនផងដែរនោះ ។ នេះបើតាមការចេញផ្សាយរបស់សារព័ត៌មាន Reuters ។
អ្នកនាំពាក្យសេតវិមាន អ្នកស្រី Jen Psaki និយាយថា នៅពេលជួបប្រជុំជាមួយមន្រ្តីចិននៅថ្ងៃទី ១៨ និង១៩ ខែមីនា ក្នុងរដ្ឋអាឡាស្កា ខាងមុខនេះ រដ្ឋមន្រ្តីការបរទេសអាមេរិកលោក Antony Blinken និងទីប្រឹក្សាសន្តិសុខជាតិអាមេរិក លោក Jake Sullivan នឹងមិនអល់អែកក្នុងការ លើកឡើងពីបញ្ហារសើបៗជាមួយប្រទេសចិននោះទេ មិនថារឿងពាក់ព័ន្ធនឹងកោះតៃវ៉ាន់ រឿងនៅហុងកុង ឬបញ្ហាទំនាក់ទំនងសេដ្ឋកិច្ចរវាងប្រទេសទាំងពីរឡើយ ។
ក្រៅពីនេះ អ្នកស្រីថា បញ្ហាអំពើប្រល័យពូជសាសន៍លើជនជាតិអ៊ុយហ្គួរកាន់សាសនា អ៊ីស្លាមនៅក្នុងខេត្តស៊ីងជាំងប្រទេសចិន ក៏នឹងក្លាយជាប្រធានបទដែលអាមេរិកនឹងលើកឡើង ពិភាក្សាជាមួយភាគីចិនដោយផ្ទាល់ផងដែរ ។
រហូតមកដល់ពេលនេះ ទីក្រុងប៉េកាំងតែងបានច្រានចោលការចោទប្រកាន់របស់សហរដ្ឋ អាមេរិកមកលើខ្លួនពីអំពើប្រល័យពូជសាសន៍នៅក្នុងខេត្តស៊ីងជាំង និងបានរិះគន់អាមេរិកវិញ ថាបានជ្រៀតជ្រែកចូលការងារផ្ទៃក្នុងរបស់ចិនពាក់ព័ន្ធនឹងបញ្ហានៅកោះតៃវ៉ាន់ និងក្រុងហុងកុង ។
ការថ្កោលទោសរបស់អាមេរិកលើប្រទេសចិនទាក់ទងនឹងបញ្ហានៅហុងកុងនៅពេលនេះ មួយថ្ងៃក្រោយពីរដ្ឋសភាចិនដែលកាលពីថ្ងៃទី១១ ខែមីនា បានបោះឆ្នោតឈានដល់ការកែប្រែ ប្រព័ន្ធបោះឆ្នោតនៅក្នុងទីក្រុងស្វយ័តហុងកុង ដែលត្រូវបានគេមើលឃើញថា ជាការប៉ះពាល់ ដល់ប្រជាធិបតេយ្យនៅហុងកុង ខណៈដែលទីក្រុងប៉េកាំងក៏មានសិទ្ធិអំណាចនៅក្នុងការ កំណត់យកអ្នកនយោបាយដែលខ្លួនពេញចិត្ត ឬមិនពេញចិត្តសម្រាប់ការបោះឆ្នោតនៅ ហុងកុង ។
អ្នកនាំពាក្យក្រសួងការបរទេសអាមេរិកលោក Ned Price បានហៅសកម្មភាពផ្លាស់ប្តូរយន្តការ បោះឆ្នោតនៅក្រុងហុងកុងដោយរដ្ឋសភាចិន ថាជាការវាយប្រហារដោយផ្ទាល់លើស្វ័យភាព សេរីភាព និងដំណើរការប្រជាធិបតេយ្យនៅក្នុងទីក្រុងស្វយ័តនេះ ។
លោក Ned Price ថា វានឹងមានការលំបាកខ្លះៗនៅក្នុងកិច្ចសន្ទនា ប៉ុន្តែលោកបញ្ជាក់ថា សហរដ្ឋអាមេរិកមិនមែនជួបមន្រ្តីចិនដើម្បីតែជួបនោះទេ ។
ចាប់តាំងពីឡើងកាន់អំណាចមក រដ្ឋបាលប្រធានាធិបតីអាមេរិករបស់លោក ចូ បៃដិន បាន បង្ហាញការប្តេជ្ញាចិត្តនៅក្នុងការពិនិត្យឡើងវិញគោលនយោបាយរបស់អាមេរិកចំពោះប្រទេសចិន ដែលធ្លាប់មានទំនាក់ទំនងមិនសូវល្អជាមួយរដ្ឋបាលប្រធានាធិបតី ដូណាល់ ត្រាំ ។
នាយករដ្ឋមន្រ្តីចិន លោក Li Keqiang បាននិយាយកាលពីថ្ងៃទី១១ មីនា ថា សហរដ្ឋអាមេរិក និងចិនមានវិស័យជាច្រើនដែលត្រូវសហការដើម្បីស្វែងរកផលប្រយោជន៍រួមគ្នា ហើយទីក្រុង ប៉េកាំងសង្ឃឹមថាចំណងទាក់ទងអាចវិវឌ្ឍន៍ទៅរកភាពល្អប្រសើរផ្អែកលើការគោរពផលប្រយោជន៍ស្នូល កិច្ចសហប្រតិបត្តិការឈ្នះឈ្នះ និងការមិនជ្រៀតជ្រែកចូលកិច្ចការផ្ទៃក្នុង របស់ប្រទេសរៀងៗខ្លួន ៕
