តំបន់&អន្តរជាតិ
អង់គ្លេសផ្តល់សិទ្ធិជ្រកកោនដល់សកម្មជនប្រជាធិបតេយ្យហុងកុង
សកម្មជនប្រជាធិបតេយ្យហុងកុង លោក Nathan Law និយាយថាលោកត្រូវបានរដ្ឋាភិបាល ចក្រភពអង់គ្លេសផ្តល់សិទ្ធិជ្រកកោននៅក្នុងប្រទេសមួយនេះ ។
សារព័ត៌មាន Reuters រាយការណ៍នៅព្រឹកថ្ងៃទី៨ ខែមេសា ថា ការផ្តល់សិទ្ធិជ្រកកោននេះ ប្រាកដណាស់វានឹងបង្កើននូវភាពតានតឹងរវាងអង់គ្លេស និងប្រទេសចិន ក្នុងពេលដែល ប្រទេសអង់គ្លេសធ្លាប់បានប្រកាសថាខ្លួននឹងបើកទ្វារឱ្យប្រជាជនហុងកុងរស់នៅក្នុងប្រទេស របស់ខ្លួនដែលជាការឆ្លើយតបទៅនឹងច្បាប់សន្តិសុខជាតិដែលទីក្រុងប៉េកាំងដាក់អនុវត្តនៅក្នុង ហុងកុង ដែលប្រទេសលោកខាងលិចមើលឃើញថាជាយុទ្ធានការបង្រ្កាបរបស់ទីក្រុងប៉េកាំង ទៅលើអ្នកប្រជាធិបតេយ្យហុងកុង ។
លោក Nathan Law បានទៅកាន់ចក្រភពអង់គ្លេសតាំងពីឆ្នាំ កក្កដា ឆ្នាំ ២០២០ ក្រោយពីទីក្រុងប៉េកាំងបានដាក់ឱ្យអនុវត្តនូវច្បាប់សន្តិសុខជាតិនៅហុងកុង ។
លោក Nathan Law និយាយថា ប្រសិនបើលោកវិលត្រឡប់ទៅកាន់ទីក្រុងហុងកុងវិញ លោកនឹងជួបនូវគ្រោះថ្នាក់ និងការធ្វើទុក្ខបុកម្នេញផ្នែកនយោបាយ ដោយសារតែច្បាប់ សន្តិសុខជាតិរបស់ទីក្រុងប៉េកាំង ។
គួរបញ្ជាក់ថា ចក្រភពអង់គ្លេសកាលពីថ្ងៃទី៧ ខែមេសា បានត្រៀមកញ្ចប់ថវិកាប្រមាណ ៦០ លានដុល្លារអាមេរិក ដើម្បីជួយប្រជាជនហុងកុងដែលមានបំណងមករស់នៅលើទឹកដី អង់គ្លេសក្នុងការស្វែងរកការងារ ផ្ទះសំបែងរស់នៅ និងសាលារៀនដើម្បីសិក្សា ដែលជា ចំណាត់ការមួយត្រូវបានគេមើលឃើញថាជាការលើកទឹកចិត្តដល់ប្រជាជនហុងកុង ។
ទីក្រុងហុងកុងត្រូវបានចក្រភពអង់គ្លេសប្រគល់ទៅឱ្យប្រទេសចិនវិញកាលពីឆ្នាំ ១៩៩៧ ក្នុងទម្រង់ជាតំបន់ស្វយ័តក្រោមកិច្ចព្រមព្រៀង ប្រទេសមួយ ប្រព័ន្ធពីរ ។ ចក្រភពអង់គ្លេស តែងចេញមុខរិះគន់ទីក្រុងប៉េកាំង និងចោទទីក្រុងប៉េកាំងថាមិនបានអនុវត្តទៅតាមកិច្ច ព្រមព្រៀងនេះ និងកំពុងធ្វើឱ្យបាត់បង់នូវស្វយ័តភាពរបស់ទីក្រុងហុងកុងតាមរយៈការបង្រាប ទៅលើអ្នកប្រជាធិបតេយ្យ ការដាក់ឱ្យអនុវត្តច្បាប់សន្តិសុខជាតិ និងការកែទម្រង់ប្រព័ន្ធបោះ ឆ្នោតនៅហុងកុង ។ល។
ជាការឆ្លើយតបទីក្រុងប៉េកាំងតែងប្រាប់ទៅកាន់ប្រទេសលោកខាងលិចថាកុំឱ្យជ្រៀតជ្រែក ចូលកិច្ចការផ្ទៃក្នុងរបស់ហុងកុង ។
ចក្រភពអង់គ្លេសប៉ាន់ស្មានថាអាចមានប្រជាជនហុងកុងដល់ទៅ ៣ សែននាក់នឹងចាកចេញ ពីទីក្រុងសេដ្ឋកិច្ចពិសេសមួយនេះនៅក្នុងរយៈពេល ៥ ឆ្នាំខាងមុខ ៕
