តំបន់&អន្តរជាតិ
មន្រ្តីស៊ើបអង្កេតរបស់ UN ដែលធ្លាប់ធ្វើការជាមួយសាលាក្តីខ្មែរក្រហម កំពុងប្រមូលភស្តុតាង ឧក្រិដ្ឋកម្មរបស់ក្រុមយោធាមីយ៉ាន់ម៉ា
ក្រុមអ្នកស៊ើបអង្កេតនៃអង្គការសហប្រជាជាតិកំពុងធ្វើការងារដើម្បីស្វែងរកភស្តុតាងនៃបទ ឧក្រិដ្ឋកម្មប្រព្រឹត្តដោយក្រុមមេដឹកនាំ នៃរបបយោធាភូមា ដែលបានធ្វើការបង្រ្កាបទៅលើ អ្នកតវ៉ាចាប់តាំងពីរដ្ឋប្រហារថ្ងៃទី១ ខែកុម្ភៈ មក ។
សារព័ត៌មាន Reuters ផ្សាយថា ក្រុមអ្នកស៊ើបអង្កេតអង្គការសហប្រជាជាតិស្តីពីមីយ៉ាន់ម៉ា បាន អំពាវនាវ កាលពីថ្ងៃទី ១៧ ខែមីនា ឱ្យប្រជាជនមីយ៉ាន់ម៉ា និងអ្នកពាក់ព័ន្ធប្រមូល និងរក្សាទុក ឯកសារភស្តុតាងដែលជាបញ្ជាឱ្យប្រព្រឹត្តបទឧក្រិដ្ឋកម្មរបស់ក្រុមមេដឹកនាំយោធាដើម្បីធ្វើជា ភស្តុតាងកសាងសំណុំរឿងប្រឆាំងទៅនឹងក្រុមមេដឹកនាំយោធាទៅថ្ងៃអនាគត ។
ប្រធានក្រុមស៊ើបអង្កេតនៃអង្គការសហប្រជាជាតិ លោក Nicholas Koumjian និយាយថា មនុស្សដែលទទួលខុសត្រូវខ្ពស់បំផុតចំពោះបទឧក្រិដ្ឋកម្មអន្តរជាតិធ្ងន់ធ្ងរជាទូទៅជាមនុស្ស ដែលមានតួនាទីខ្ពស់ៗនៅក្នុងជួរថ្នាក់ដឹកនាំ ។
គួរបញ្ជា់ថា លោក Nicholas Koumjian ធ្លាប់បានធ្វើការនៅក្នុងតុលាការអន្តរជាតិដែលកាត់ ទោសអតីតប្រធានាធិបតី លីបេរីយ៉ា លោក Charles Taylor និងធ្លាប់ធ្វើការជាមួយសាលាក្តី ខ្មែរក្រហមនៅក្នុងប្រទេសកម្ពុជា ក្នុងការកាត់ទោសមេដឹកនាំខ្មែរក្រហម នួន ជា និង ខៀវ សំផន ។
ទាក់ទងនឹងការបង្រ្កាបដោយក្រុមយោធាទៅលើជនស៊ីវិលនៅមីយ៉ាន់ម៉ា លោក Nicholas Koumjian មានប្រសាសន៍ថា អ្នកបញ្ជាឱ្យប្រព្រឹត្តបទឧក្រិដ្ឋកម្មជាទូទៅពួកគេមិនបានធ្វើ ដោយខ្លួនឯងទេ និងមិនមានវត្តមាននៅកន្លែងដែលបទឧក្រិដ្ឋកម្មកើតឡើងនោះឡើយ ។
ដូច្នេះ លោកថា ដើម្បីបញ្ជាក់ថា ពួកគេមានការទទួលខុសត្រូវចំពោះបទឧក្រិដ្ឋកម្មដែលបាន កើតឡើង វាទាមទារឱ្យមានភស្តុតាងជារបាយការណ៍បញ្ជាក់ ការបញ្ជាឱ្យប្រព្រឹត្តបទឧក្រិដ្ឋ និងគោលនយោបាយដែលពួកគេបង្កើតឡើង ។
ប្រធានក្រុមស៊ើបអង្កេតនៃអង្គការសហប្រជាជាតិ បានស្នើឱ្យប្រជាជនមីយ៉ាន់ម៉ា និងអ្នកពាក់ ព័ន្ធដែលដឹង ឬមានព័ត៌មានទាំងអស់នេះ ទាក់ទងមកកាន់ក្រុមស៊ើបអង្កេតតាមរយៈប្រព័ន្ធ ទំនាក់ទំនងដែលមានសុវត្ថិភាពបំផុត ដូចជាតាមប្រព័ន្ធ Signals ឬ ProtonMail ជាដើម ។
កាលពីថ្ងៃទី១៦ ខែមីនា ការិយាល័យសិទ្ធិមនុស្សអង្គការសហប្រជាជាតិបានថ្កោលទោស សមត្ថកិច្ចមីយ៉ាន់ម៉ាដែលបានប្រើហិង្សា និងបាញ់ប្រហារទៅលើអ្នកតវ៉ា និងបានអំពាវនាវឱ្យ របបយោធាបញ្ឈប់ការសម្លាប់មនុស្ស និងចាប់មនុស្សឃុំខ្លួន ។
បើតាមអង្គការសហប្រជាជាតិមនុស្សប្រមាណ ១៨០ ហើយត្រូវបានរបបយោធាសម្លាប់ចាប់ តាំងពីរដ្ឋប្រហារថ្ងៃទី១ ខែកុម្ភៈ មក ប៉ុន្តែថាចំនួនពិតប្រាកដអាចមានច្រើនជាងនេះ ។ សម្រាប់សមាគមផ្តល់ជំនួយដល់អ្នកទោសនយោបាយ (AAPP) មីយ៉ាន់ម៉ា អះអាងថា គិតត្រឹម ព្រឹកថ្ងៃទី១៨ ខែមីនា នេះ ចំនួនមនុស្សស្លាប់បានកើនដល់ ២០៨ នាក់ហើយ ។
ក្រុមអ្នកស៊ើបអង្កេតអង្គការសហប្រជាជាតិ កំពុងប្រមូលភស្តុតាង នៃការប្រើប្រាស់កម្លាំង ដ៍សាហាវការ ការចាប់ខ្លួនដោយខុសច្បាប់ ការធ្វើទារុណកម្ម និងការឃុំខ្លួនមនុស្សដោយ មិនប្រាប់ក្រុមគ្រួសារអំពីកន្លែងរបស់ពួកគេដែលជាការអនុវត្តខុសច្បាប់ ដែលគេហៅថា ការបាត់ខ្លួនដោយបង្ខំ ។
គួររម្លឹកថា យន្តការស៊ើបអង្កេតឯករាជ្យសម្រាប់ប្រទេសមីយ៉ាន់ម៉ា ដែលមានមូលដ្ឋាននៅក្នុង ទីក្រុងហ្សឺណែវ ប្រទេសស្វីស ត្រូវបានបង្កើតឡើងដោយក្រុមប្រឹក្សាសិទ្ធិមនុស្សអង្គការសហ ប្រជាជាតិនៅក្នុងខែកញ្ញា ឆ្នាំ ២០០៨ ដើម្បីប្រមូលភស្តុតាងបទឧក្រិដ្ឋកម្មធ្ងន់ធ្ងរ និងការរំលោភបំពានច្បាប់អន្តរជាតិដែលបានប្រព្រឹត្តនៅក្នុងប្រទេសមីយ៉ាន់ម៉ាចាប់ពីឆ្នាំ ២០១១ មក ៕
