តំបន់&អន្តរជាតិ
ទំនាក់ទំនងអាមេរិក-រុស្សីកំពុងធ្លាក់ដុនដាបក្រោយលោក បៃដិន ហៅលោក ពូទីន ថាឃាតក
ទំនាក់ទំនងអាមេរិក និងរុស្សីកំពុងធ្លាក់ចុះដុនដាប និងរកាំរកូសខ្លាំងក្រោយពីប្រធានាធិបតិ អាមេរិក លោក ចូ បៃដិន បានចាត់ទុកបុរសខ្លាំងរបស់រុស្សី ប្រធានាធិបតី វ្លាឌីមៀ ពូទីន ថាជា ឃាតក នៅក្នុងកិច្ចសម្ភាសន៍ជាមួយទូរទស្សន៍ ABC News របស់អាមេរិក ។
ជាការឆ្លើយតបទៅនឹងសម្តីរបស់លោក បៃដិន រដ្ឋាភិបាលរុស្សីបានកោះហៅឯកអគ្គរដ្ឋទូតខ្លួន ប្រចាំនៅរដ្ឋធានីវ៉ាស៊ីនតុន ត្រឡប់ទៅកាន់ប្រទេសរុស្សីវិញ ដើម្បីពិភាក្សាពិនិត្យឡើងវិញ អំពីទំនាក់ទំនងរវាងរុស្សី និងអាមេរិក ។ ការកោះហៅឯកអគ្គរដ្ឋទូតរបស់ខ្លួនពីអាមេរិក គឺជារឿងដែលប្រទេសរុស្សីកំរធ្វើ ហើយលោក ពូទីន ធ្លាប់និយាយថា រុស្សីធ្វើសកម្មភាពបែប នេះ លុះណាតែវាជាជម្រើសចុងក្រោយ ។ ពេលចុងក្រោយបង្អស់ដែលរុស្សីបានកោះហៅឯក អគ្គរដ្ឋទូតរបស់ខ្លួនពីអាមេរិកគឺនៅឆ្នាំ ១៩៩៨ ដើម្បីប្រឆាំងទៅនឹងយុទ្ធនាការទម្លាក់គ្រាប់បែក នៅប្រទេសអ៊ីរ៉ាក់ពីសំណាក់សម្ព័ន្ធមិត្តបច្ចឹមប្រទេស ។
ដើមហេតុនៃរឿងរ៉ាវដែលធ្វើទំនាក់ទំនងរវាងប្រទេសទាំងពីរកាន់ធ្លាក់ដុនដាបខ្លាំងនៅពេលនេះ បន្ទាប់ពីទីភ្នាក់ងារសម្ងាត់ជាតិអាមេរិកបានចេញរបាយការណ៍បង្ហាញថាប្រទេសរុស្សី បានជាប់ទាក់ទងទៅនឹងការជ្រៀតជ្រែកចូលក្នុងកិច្ចការបោះឆ្នោតរបស់អាមេរិកកាលពីឆ្នាំ ២០២០ ។ របាយការណ៍សន្និដ្ឋានថា លោក ពូទីន បានដឹងពីរឿងនេះ ហើយក៏ប្រហែលជាអ្នក បញ្ជាពីក្រោយរឿងនេះផង ។
ភ្លាមៗក្រោយពីរបាយការណ៍នេះចេញផ្សាយ រដ្ឋាភិបាលរុស្សីបានច្រានចោលចំពោះការចោទ ប្រកាន់នេះ ដោយបានចាត់ទុកថាជារបាយការណ៍គ្មានមូលដ្ឋានច្បាស់លាស់ និងភស្តុតាង ត្រឹមត្រូវ ។
ប៉ុន្តែនៅក្នុងកិច្ចសម្ភាសន៍ជាមួយទូរទស្សន៍ ABC News នៅពេលសួរដល់បញ្ហានេះ លោក ចូ បៃដិន បាននិយាយថា លោក ពូទីន នឹងបង់ថ្លៃចំពោះរឿងនេះ ប្រសិនបើរុស្សីពិតជាបាន ជ្រៀតជ្រែកក្នុងរឿងបោះឆ្នោត ហើយអាមេរិកនឹងចាត់វិធានការ ។
យ៉ាងណាក៏ដោយ រឿងធំ ដែលថ្នាក់ធ្វើឱ្យរដ្ឋាភិបាលរុស្សីខឹងខ្លាំងរហូតដល់កោះហៅឯកអគ្គ រដ្ឋទូតរបស់ខ្លួនភា្លមៗពីអាមេរិក គឺរឿងដែលលោក បៃដិន បានហៅលោក ពូទីន ថាជាឃាតក ។
នៅក្នុងកិច្ចសម្ភាសន៍ អ្នកកាសែតបានលើកឡើងពីករណីដែលមានការចោទប្រកាន់ថា រុស្សីដាក់ថ្នាំបំពុលលោក Alexei Navalny និងអ្នកប្រឆាំងផ្សេងៗទៀត ។ នៅពេលអ្នកកាសែត សួរបញ្ជាក់លោក បៃដិន តើគិតថាលោក ពូទីន ជាឃាតកឬទេ ? លោក បៃដិន បានឆ្លើយ យល់ស្រប ។
គួររម្លឹកថា កាលពីដើមខែនេះ សហរដ្ឋអាមេរិកបានដាក់ទណ្ឌកម្មលើមន្ត្រីជាន់ខ្ពស់រុស្ស៊ីចំនួន ៤ រូបរួចមកហើយ ជុំវិញការបំពុល និងការដាក់ពន្ធនាគារអ្នកនយោបាយប្រឆាំងរុស្សីលោក Alexey Navalny ។
កាលពីថ្ងៃទី១៧ ខែមីនា ក្រសួងពាណិជ្ជកម្មអាមេរិកបាននិយាយថាខ្លួនក៏កំពុងរឹតបន្តឹង ការដាក់ទណ្ឌកម្មលើការនាំចេញមួយចំនួនទៅកាន់ប្រទេសរុស្ស៊ីផងដែរ ដើម្បីឆ្លើយតបទៅនឹង ការពុល កាលពីខែមីនា ឆ្នាំ ២០១៨ ទៅលើអតីតភ្នាក់ងារចារកម្មយោធារុស្ស៊ីលោក Sergei Skripal និងកូនស្រីរបស់គាត់នៅទីក្រុង Salisbury ប្រទេសអង់គ្លេស ដោយសារធាតុពុលម្យ៉ាង ហៅថាភ្នាក់ងារសរសៃប្រសាទ ឬ Nerve Agent ផលិតដោយយោធារុស្សី ។
ទោះជាយ៉ាងណា ទីក្រុងមូស្គូ បានច្រើនចោលចំពោះការចោទប្រកាន់ថាខ្លួនបានពាក់ព័ន្ធ ទៅនឹងការវាយប្រហារក្នុងករណីទាំងពីរនេះ ។
ជាការឆ្លើយតបចំពោះភាពតានតឹងនៅពេលនេះ រដ្ឋាភិបាលរុស្សីថា លោក ចូ បៃដិន មិនចង់ បង្កើនទំនាក់ទំនងល្អជាមួយរុស្សីនោះទេ ។
ទីភ្នាក់ងារព័ត៌មាន AFP បានរាយការណ៍នៅព្រឹកថ្ងៃទី១៩ ខែមីនា ដោយបានស្រង់សម្តីរបស់ អ្នកនាំពាក្យលោក ពូទីន គឺលោក Dmirty Peskov ដែលបានលើកឡើងថា ការនិយាយរបស់ លោក ចូ បៃដិន គឺអាក្រក់ខ្លាំងណាស់ ។
លោកថា វាច្បាស់ណាស់ដែលលោក បៃដិន មិនចង់ធ្វើឱ្យទំនាក់ទំនងរវាងរុស្សី និងអាមេរិក ត្រឡប់ទៅរកភាពល្អប្រសើរឡើងវិញនោះទេ ។
ចំណែកលោក ពូទីន លោកបានថ្លែងនៅលើកញ្ចក់ទូរទស្សន៍ជាតិរុស្សី ឆ្លើយតបនឹងលោក បៃដិន ដោយនិយាយថា «វាធ្វើឱ្យមនុស្សម្នាក់ ស្គាល់មនុស្សម្នាក់» ។
ទោះជាយ៉ាងណា លោកថា លោកបានត្រៀមខ្លួនរួចហើយដើម្បីពិភាក្សាអំពីទំនាក់ទំនង ទ្វេភាគីជាមួយអាមេរិក និងបញ្ហាផ្សេងៗទៀត ដូចជាជម្លោះក្នុងតំបន់ ។ លោក ពូទីន ថែមទាំង ជូនពរលោក បៃដិន មានសុខភាពល្អទៀតផង ។
បើទោះជាការឆ្លើយតបរបស់លោក ពូទីន ហាក់មានភាពស្រទន់ជាមួយលោក ចូ បៃដិន ប៉ុន្តែ ការកោះហៅឯកអគ្គរដ្ឋទូតខ្លួនទៅកាន់ប្រទេសវិញក្រោយការថ្លែងរបស់លោក បៃដិន និង ក្រោយមានការចោទប្រកាន់ថារុស្សីជ្រៀតជ្រែកការបោះឆ្នោតរបស់អាមេរិក បង្ហាញថា ប្រទេសទាំងពីរកំពុងតែមានទំនាក់ទំនងមិនសូវល្អខ្លាំងនៅពេលនេះ ៕
