តំបន់&អន្តរជាតិ
កូរ៉េខាងជើងចោទអាមេរិកថា បង្ករឿងក្រោយអនុញ្ញាតឱ្យកូរ៉េខាងត្បូង ផលិតគ្រាប់មីស៊ីល
ប្រទេសកូរ៉េខាងជើងនៅថ្ងៃទី៣១ ឧសភា និយាយថា ការអនុញ្ញាតរបស់អាមេរិកឱ្យ ប្រទេសកូរ៉េខាងត្បូងអាចមានឱកាសផលិតគ្រាប់មីស៊ីលមានឥទ្ធិពលបន្ថែមទៀត គឺជាការ បង្ហាញនូវគោលនយោបាយបង្ករឿងរបស់អាមេរិកចំពោះកូរ៉េខាងជើង ។ ទីក្រុងព្យុងយ៉ាង ព្រមានថា នេះជាការសម្រេចចិត្តដែលនឹងនាំឱ្យមានស្ថានភាពអស្ថេរភាពនៅក្នុងតំបន់ឧបទ្វីប កូរ៉េទាំងមូល ។
នេះជាការឆ្លើយតបជាលើកដំបូងរបស់កូរ៉េខាងជើងចាប់តាំងពីមានជំនួបផ្ទាល់រវាងប្រធានាធិបតីអាមេរិក និងកូរ៉េខាងត្បូងនៅលើទឹកដីអាមេរិកាលពីថ្ងៃទី២១ ខែឧសភា ដែលនៅក្រោយ ជំនួបនោះ សហរដ្ឋអាមេរិកបានសម្រេចចិត្តដកចេញវិញការរឹតត្បិតទៅលើការអភិវឌ្ឍ កម្មវិធីមីស៊ីលរបស់កូរ៉េខាងត្បូងដែលអាមេរិកបានដាក់លើកូរ៉េខាងត្បូងជាច្រើនទសវត្សរ៍មក ហើយ ។ ផ្ទុយទៅវិញ សហរដ្ឋអាមេរិកបានអនុញ្ញាតឱ្យកូរ៉េខាងត្បូង ដែលត្រូវបានអាមេរិក ចាត់ទុកថាជាសម្ព័ន្ធមិត្តដ៏សំខាន់មួយរបស់ខ្លួននៅក្នុងតំបន់អាស៊ី-ប៉ាស៊ីហ្វិក អាចអភិវឌ្ឍ កម្មវិធីគ្រាប់មីស៊ីលដែលបាញ់ក្នុងចំងាយដែលគ្មានកំណត់ ។
បើទោះជាសេចក្តីថ្លែងការណ៍របស់កូរ៉េខាងជើងនៅពេលនេះអាចចាត់ទុកថាជារឿងគួរយក ចិត្តទុកដាក់ដោយហេតុថា រដ្ឋាភិបាលកូរ៉េខាងជើងធ្លាប់បានប្រកាសរួចមកហើយថា ដរាប ណា សហរដ្ឋអាមេរិកបន្តប្រើគោលនយោបាយអរិភាព ឬបង្ករឿងចំពោះខ្លួន កូរ៉េខាងជើងនឹង មិនត្រឡប់មកធ្វើការចរចាជាមួយសហរដ្ឋអាមេរិកវិញនោះឡើយ ។
យ៉ាងណាក៏ដោយ បើតាមទីភ្នាក់ងារសារព័ត៌មានបារាំង AFP បានឱ្យដឹងថា សេចក្តីថ្លែង ការណ៍របស់កូរ៉េខាងជើងនៅពេលនេះ គឺជាបទអត្ថាធិប្បាយរបស់បុគ្គលនៅក្នុងប្រទេសកូរ៉េខាងជើង មិនមែនចេញពីស្ថាប័នរដ្ឋាភិបាលនោះទេ ។ ដូច្នេះ វាអាចឱ្យគេសន្និដ្ឋានបានដែរថា កូរ៉េខាងជើងប្រហែលនៅតែចង់រក្សាចន្លោះនៃការចរចាជាមួយរដ្ឋបាលប្រធានាធិបតីអាមេរិកលោក ចូ បៃដិន ដដែល ។
លោក គីម ម្យុង ចុល (Kim Myong Chol) ដែលគេដឹងថា ជាអ្នកធ្វើអត្ថាធិប្បាយអំពីកិច្ចការ អន្តរជាតិរបស់កូរ៉េខាងជើង បាននិយាយនៅលើទូរទស្សន៍រដ្ឋកូរ៉េខាងជើង KCNA ថា វិធានការបិទបញ្ចប់ការរឹតត្បិតទៅលើការផលិតមីស៊ីលរបស់អាមេរិកចំពោះកូរ៉េខាងត្បូង គឺជា ការរំលឹកឡើងវិញនូវគោលនយោបាយអរិភាពរបស់សហរដ្ឋអាមេរិកចំពោះកូរ៉េខាងជើង និងជាការដោះស្រាយមានលក្ខណៈស្តង់ដាទ្វេពោរពេញដោយភាពអាម៉ាស់ ។
លោក គីម ម្យុង ចុល បញ្ជាក់បន្ថែមថា «សហរដ្ឋអាមេរិកកំពុងយល់ច្រលំ ។ វាគឺជាកំហុសដ៏ ធ្ងន់ធ្ងរសម្រាប់សហរដ្ឋអាមេរិកក្នុងការដាក់សម្ពាធលើកូរ៉េខាងជើងដោយបង្កើតឱ្យមាន អតុល្យភាពនៅក្នុង និងជុំវិញតំបន់ឧបទ្វីបកូរ៉េ ដែលជាការនាំទៅរកស្ថានភាពមួយប្រកបដោយ អស្ថិរភាពនៅតំបន់ឧបទ្វីបកូរ៉េដែលជាទូទៅត្រូវបានចាត់ទុកថាកំពុងនៅមានសង្គ្រាមជាមួយគ្នា នៅឡើយ» ។
ក្នុងពេលកន្លងទៅ សហរដ្ឋអាមេរិកបានហាមប្រាមមិនឱ្យប្រទេសកូរ៉េខាងត្បូងអភិវឌ្ឍមីស៊ីល ដែលអាចបាញ់ក្នុងចំងាយលើពី ៨០០ គីឡូម៉ែត្រ ដោយសារតែមានការបារម្ភពីការប្រកួត ប្រជែងសព្វាវុធនៅក្នុងតំបន់ ។ ការកំណត់ដូចនេះ មានន័យថា កូរ៉េខាងត្បូងអាច ផលិតមីស៊ីលដែលអាចបាញ់ទៅដល់គ្រប់ទីកន្លែងចូលទឹកដីកូរ៉េខាងជើង ប៉ុន្តែអាចមាន លទ្ធភាពតិចតួចក្នុងការវាយប្រហារទៅលើទឹកដីចិន និងប្រទេសជប៉ុនដែលនៅក្បែរខាងរបស់ ខ្លួន ។
អ្នកអង្កេតការណ៍មួយចំនួននៅក្នុងប្រទេសកូរ៉េខាងត្បូងសាទរចំពោះការបញ្ចប់ការរឹតត្បិត របស់អាមេរិកនៅពេលនេះដោយសារវាបង្ហាញពីការស្តារឡើងវិញនូវអធិបតេយ្យភាពផ្នែកយោធារបស់កូរ៉េខាងត្បូង ។ ប៉ុន្តែទន្ទឹមនឹងនេះ ក៏មានការសង្ស័យដែរថា ការសម្រេចចិត្តនេះ ក៏អាចជាគោលបំណងរបស់អាមេរិកក្នុងការជំរុញសមត្ថភាពយោធាសម្ព័ន្ធមិត្តរបស់ខ្លួន ក្នុង ពេលដែលអាមេរិកកំពុងតែមានភាពតានតឹងជាមួយប្រទេសចិនផងដែរ ។
លោក គីម ម្យុង ចុល អត្ថាធិប្បាយថា សកម្មភាពរបស់អាមេរិកក្នុងការអនុញ្ញាតឱ្យកូរ៉េខាង ត្បូងអាចផលិតគ្រាប់មីស៊ីលដោយគ្មានកំណត់ចំងាយបាញ់នេះ គឺជាការបង្កឱ្យមានការប្រកួត ប្រជែងផ្នែកសព្វាវុធនៅក្នុងឧបទ្វីបកូរ៉េ និងតំបន់ដែលនៅជុំវិញ និងពិនិត្យនូវការអភិវឌ្ឍរបស់ កូរ៉េខាងជើង ។
ប្រតិកម្មរបស់កូរ៉េខាងជើងនេះ ក្នុងពេលដែលរដ្ឋបាលប្រធានាធិបតីអាមេរិក លោក ចូ បៃដិន កំពុងរៀបចំយុទ្ធសាស្រ្តថ្មីក្នុងការឆ្លើយតបទៅនឹងកម្មវិធីអាវុធនុយក្លេអ៊ែររបស់កូរ៉េខាងជើង ។ ក្នុងជំនួបនៅសហរដ្ឋអាមេរិក ទាំងលោក ចូ បៃដិន និងប្រធានាធិបតីកូរ៉េខាងត្បូង បានឱ្យដឹង ថា ការពិនិត្យមើលឡើងវិញនូវគោលនយោបាយរបស់អាមេរិកចំពោះកូរ៉េខាងជើង គឺមាន លក្ខណៈបើកចំហ និងស្វែងរកដំណោះស្រាយទៅតាមបែបការទូត ៕
